¿YAJTZUN TEYA? ¿O KUBʼ T-XJELINA JLU TEJ TTZAJ JUN NYA BʼAʼN? ¿O TZIKʼA TOJ JUN NYA BʼAʼN AJU BʼIʼX SEKʼPAJE TUʼN EX KUBʼ T-XIMANA QA MINTIʼ ONIN DIOS TIʼJA?

Tzaj tqʼamaʼn Sheila jlu, jun xuʼj in nanqʼin Estados Unidos ex jaw chʼiy toj jun ja xjal okslal: «Atxix tej tal txin qine, qʼuqli nkʼuʼje tiʼj qa at Dios tuʼnju a kubʼ bʼinchante qe, noqtzun tuʼnj mintiʼx nnaʼye qa atine ttxlaj. Ojtzqiʼntoq wuʼne qa in keʼyin wiʼje, pero kubʼ nximane qa mintiʼ in nok tqʼoʼn twiʼ wiʼje. Mintiʼ kubʼ nximane qa ikʼun qine tuʼn, ex qa in ximen wiʼje». ¿Tiquʼn ten t-ximbʼetze ikju? In tzaj tqʼamaʼn: «Tzaj nim nya bʼaʼn kyiʼj toj njaye, ex mer ik tzeʼn mintiʼx onin chʼin Dios qiʼje».

Bʼalo ax teya t-ximbʼetz ik tzeʼn te Sheila, qʼuqli tkʼuʼja tiʼj Dios, noqtzun tuʼnj, in kubʼ t-xjelina qa axpetzulo tok at tkʼuʼj tiʼja. Ax ikx te Job kubʼ t-xjelin jlu, jun xjal tzʼaqli ok qeʼ tkʼuʼj tiʼj tipumal ex tiʼj tnabʼil Dios (Job 2:3; 9:4). Tej otoqxi tzaj nim nya bʼaʼn tiʼj ex tej tnaj qʼuqbʼil tkʼuʼj, xi tqanin jlu te Dios: «¿Tiquʼntzun nneʼl tewan tibʼa nwitze? ¿Tiquʼn in tbʼinchaʼna wiʼje ik tzaʼn tiʼj jun aj qʼoj?» (Job 13:24).

Yajtzun te Tyol Dios, ¿tiʼ in tzaj tqʼamaʼn? ¿Ape Dios at tpaj tiʼj yajbʼil? ¿Atpe tkʼuʼj kyiʼj kykyaqil xjal ex tiʼj teyele junjun qe? ¿Jakupe tzʼel qnikʼ tiʼj qa ojtzqiʼn teyele junjun qe tuʼn, qa in nel tnikʼ qiʼj ex qa in qo tzaj tonin aj qok weʼ kywitz nya bʼaʼn?

Kyoj xnaqʼtzbʼil che ul, kʼelel qnikʼ tiʼj tzeʼn in nonin tbʼinchen Dios qiʼj ex aju Tyol tuʼn tel qnikʼ tiʼj qa in ximen Dios qiʼj (Romanos 1:20). Aj tel mas tnikʼa tiʼj Dios, aju Bʼinchal qe, mas kʼokel qeʼ tkʼuʼja qa kʼujlaʼna tuʼn (1 Juan 2:3; 1 Pedro 5:7).