ME ALUA KHÖU GABULA DÖDÖ, TE MANOFU NDRAʼUGÖ, ’HEZO SO LOWALANGI?’ MAZUI, HADIA NO IRAI ALUA KHÖU WAMAKAO SI TEBAI ÖʼOLIFUGÖ IREGE ÖSOFU HADIA IʼAMEʼEGÖ TÖDÖ NDRAʼUGÖ LOWALANGI?

Tola manö fagölö nirasoimi Sheila si toröi ba Amerika Serikat. Laʼebuaʼö ia ba nösi nomo si lö faröi ba agama. Imane, ”Iʼotarai iraono, adöni dödögu khö Lowalangi börö me yaʼia Zomböi yaʼita. Hizaʼi, lö irai urasoi wa ahatö ndraʼo khönia. Uraso tödögu ifaigi-faigi ndraʼo ha moroi ba zaröu. Lö irai tumbu ba dödögu wa fatuwu Lowalangi khögu, ba lö göi faduhu dödögu wa iʼomasiʼö ndraʼo.” Hana wa so khö Sheila waʼaombö dödö simane daʼö? Imane, ”Lö tebulö alua gabula dödö ba nösi nomoma, ba maʼifu lö itologa Lowalangi.”

Simane Sheila, tola manö faduhu dödömö wa so Lowalangi Fondrege Zabölö. Hizaʼi, te manofuʼö hadia sindruhu-ndruhu iʼameʼegö tödö ndraʼugö.  Niha satulö tödö Yobi ba so khönia wamati saro hegöi faʼatua-tua moroi khö Zomböi. Hizaʼi, so göi khönia waʼaombö dödö. (Yobi 2:3; 9:4) Hulö lö hadöi sanolo yaʼia me alua khönia gabula dödö si lö aetu-aetu irege manofu ia khö Lowalangi, ”Hana wa öbiniʼö mbawau, ba hana wa öbeʼe si faʼudu khöu ndraʼodo?”​—Yobi 13:24.

Hadia niwaʼö Zura Niʼamoniʼö? Hadia moguna tatahigö Lowalangi na alua gabula dödö? Hadia so dandra wa iʼameʼegö tödö fefu niha Lowalangi hegöi yaʼita zamösana? Hadia sindruhu-ndruhu taʼila wa iʼameʼegö tödö ita, aboto ba dödönia, irasoi mazui itolo ita ba gabula dödöda?

Ba duho aefa daʼa, tafahaʼö ita sanandrösa khö Lowalangi moroi ba lala wamazökhinia yaʼita. (Roma 1:20) Aefa daʼö, tafareso ba Zura Niʼamoniʼö hewisa lala woʼameʼegö tödö Lowalangi yaʼita. Na itugu ”aboto ba dödöda ia” moroi ba niwöwöi hegöi ba Daromalinia, itugu faduhu dödöda wa ’so so sa dödönia ita’.​—1 Yohane 2:3; 1 Fetero 5:7.