HARABAIREHO AKAGWE REERO OKEEBUUZA NGU ‘RUHANGA AKABA ARI NKAHI?’ NARI ORARABIRE OMU MBEERA EGUMIRE OKEEBUUZA YAABA RUHANGA NAAKUFAHO?

Obundi nooyehurira nk’oku Sheila orikutuura omuri United States yaayehuriire. Akakurira omu ka erikukunda munonga ediini. Naagira ati: “Kuruga omu buto, nkaba ninkunda Ruhanga ahakuba niwe Muhangi waitu. Kwonka nkaba ntakehurirahoga ngu ndi haihi nawe. Nkaba ninteekateeka ngu naandeebera hangahari. Nkaba ntarikuteekateeka ngu Ruhanga naanyanga, kwonka nabwo nkaba ntarikwikiriza ngu naanfaho.” Ahabw’enki Sheila yaabaire aine okubangaanisa? Naashoboorora ati: “Eka yaitu ekahikwaho oburemeezi bukurataine, kandi okaba nooshusha ngu Ruhanga tarikutuhwera na kakye.”

Nka Sheila, noobaasa kuba noohamya ngu Ruhanga ow’Obushoboorozi Bwona ariho. Kwonka noobaasa kuba nooyebuuza yaaba buzima naakufaho. Yobu owaabaire ahikiriire, kandi owaabaire naikiririza omu maani ga Ruhanga n’obwengye bwe, nawe akaba aine okubangaanisa. (Yobu 2:3; 9:4) Bwanyima ya Yobu kuhikwaho oburemeezi butari bumwe na bumwe, atarikureeba kuhwerwa kwona, akabuuza Ruhanga ati: “Ahabw’enki noonyima amaisho, okanteekateekaho nk’omuzigu waawe?”​—Yobu 13:24.

Baibuli neeyegyesa ki? Mbwenu shi haabaho akagwe twine kuta orubanja ahari Ruhanga? Hariho obuhame bwona ngu Ruhanga naafayo aha bantu boona na buri omwe ahariitwe? Mbwenu shi buri omwe ahariitwe naabaasa kumanya yaaba buzima Ruhanga naatureeba, naatwetegyereza, naatusaasibwa, nari naatuhwera omu buremeezi bwaitu?

Omu kicweka ekirikukurataho, nituza kwega oku ebyahangirwe birikutuhwera kumanya yaaba Ruhanga naatufaho. (Abarooma 1:20) Bwanyima, nituza kushwijuma oku Baibuli erikworeka ngu Ruhanga naatufaho. Waaguma nooyeyongyera ‘kumumanya’ kurabira omu bi yaahangire n’Ekigambo kye, noija kweyongyera kugira obuhame ngu ‘naakufaho.’​—1 Yohaana 2:3; 1 Petero 5:7.