ORA UN CALAMIDAD SOSODE, BO A YEGA DI PUNTRA BO MES: NA UNDA DIOS TABATA? OF UN SUCESO TRAUMATICO DEN BO PROPIO BIDA A PONE BO DUDA SI DIOS TA INTERESA DEN BO?

Kisas bo ta pensa loke Sheila, kende ta biba na Merca, tabata pensa un tempo. El a lanta den un famia hopi religioso. El a bisa: “For di chikito, mi tabata interesa den Dios pasobra e ta nos Creador. Pero nunca mi tabata sinti mi pega cu ne. Mi tabata pensa cu e ta wak mi, pero solamente di leu. Mi no tabata pensa cu e ta odia mi, pero tampoco mi tabata pensa cu e ta stima mi.” Dicon Sheila tabata duda cu Dios ta stim’e? El a splica: “Mi famia tabata pasa den un tragedia tras di otro, y tabata parce cu nunca Dios no tabata yuda nos.”

Mescos cu Sheila, kisas bo ta pensa cu Dios Todopoderoso ta existi. Pero kisas toch bo ta duda si realmente e ta interesa den bo. Si ta asina, bo no ta bo so. Job, kende tabata un hende husto, tabatin fe den e poder y sabiduria di e Creador, pero toch e tabatin su dudanan. (Job 2:3; 9:4) Despues cu Job a pasa den un tragedia tras di otro y tabata parce cu no tin alivio na caminda, el a puntra Dios: “Pakico bo ta sconde bo cara, y ta considera mi bo enemigo?”—Job 13:24.

Kico Bijbel ta bisa? Acaso Dios ta culpabel di nos tragedianan? Tin prueba cu Dios ta interesa den hende en general y den cada un di nos? Anos mes por haya sa si di berdad e ta interesa den nos, si e ta compronde nos, ta sinti pa nos of ta yuda nos cu nos problemanan?

Den e siguiente articulonan, nos lo bay wak kico e manera cu hende a ser crea ta siña nos tocante Dios su interes den nos. (Romanonan 1:20) Y nos lo analisa kico Bijbel ta siña nos tocante Dios su interes den nos. Mas bo siña conoce Dios mediante e manera cu nos a ser crea y Bijbel, mas sigur lo bo ta cu “e ta interesa den [bo].”—1 Pedro 5:7.