NAKUGADLE INHLEKELELE, WAKE WATIBUTA YINI KUTSI, ‘BEKAKUPHI NKULUNKULU?’ NOMA KWAKE YINI KWENTEKA INHLEKELELE LETSITE EMPHILWENI YAKHO LEYAKWENTA WATIBUTA KUTSI NKULUNKULU UNENDZABA YINI NAWE?

Kungenteka utiva njenga-Sheila lohlala eMelika. Njengobe akhulela emndenini lokholwa kakhulu, watsi: “Kusukela ngisemncane bengimtsandza Nkulunkulu ngobe unguMdali wetfu. Nobe kunjalo, bengingativa ngisondzelene naye. Bengati kutsi uyangibona, kodvwa ungibukela khashane. Bengingacabangi kutsi uyangenyanya, bengiphindze ngingakholelwa nekutsi uyangitsandza.” Kungani Sheila bekangabata kutsi Nkulunkulu uyamtsandza? Utsi: “Emndenini wakitsi kwenteka tinhlekelele ngekulandzelana kwato, futsi bekubonakala shengatsi Nkulunkulu akanendzaba natsi.”

Njenga-Sheila, kungenteka uyaciniseka kutsi Nkulunkulu Somandla ukhona. Kodvwa kungenteka uyatibuta nekutsi unendzaba yini nawe. Nendvodza lelungile lenguJobe, lebeyikholelwa emandleni kanye nasekuhlakanipheni kweMdali, nayo yake yatibuta lombuto. (Jobe 2:3; 9:4) Ngemuva kwekutsi Jobe avelelwe tinhlekelele ngekulandzelana kwato, angati nekutsi tibangelwa yini, wabuta Nkulunkulu watsi: “Ubufihlelani buso bakho, ungitsatse njengesitsa sakho?”​—Jobe 13:24.

Litsini liBhayibheli? Kufanele yini simsole Nkulunkulu nakwenteka tinhlekelele? Bukhona yini bufakazi bekutsi Nkulunkulu uyavelana nebantfu nekutsi unendzaba nemuntfu ngamunye? Ngekucabanga kwemuntfu, ukhona yini lowatiko kutsi Nkulunkulu uyasinaka, uyasati, uyavelana natsi, nobe uyasisita nasinetinkinga?

Etihlokweni letilandzelako, sitawucoca ngekutsi indalo isifundzisa kanjani kutsi Nkulunkulu unendzaba natsi. (Roma 1:20) Sitawubese sicoca kabanti ngekutsi liBhayibheli liyakufakazela yini kutsi Nkulunkulu unendzaba natsi. Nawuchubeka ‘umati’ ngekubuka indalo kanye nekufundza liVi lakhe, utawuciniseka kutsi ‘uyakukhatsalela.’​—1 Johane 2:3; 1 Phetro 5:7.