MUSI HU TSHI VHA NA MAKHAULAMBILU, NAA NI A ḒIVHUDZISA URI ‘MUDZIMU O VHA E NGAFHI?’ KANA ARALI VHUTSHILONI HAṊU HO VHUYA HA ITEA ZWITHU ZWI SI ZWAVHUḒI, NAA NO NO ḒIVHUDZISA ARALI MUDZIMU E NA NDAVHA NA INWI?

Khamusi ni ḓipfa u fana na Sheila ane a dzula ngei Amerika. O aluwa muṱani wo ḓidzhenisaho tshoṱhe kha zwa vhurereli, o ri: “U bva musi ndi tshee muṱuku ndo vha ndi tshi takalela Mudzimu ngauri ndi Musiki washu. Fhedzi a tho ngo vhuya nda pfa u nga u khonani yanga. Ndo vha ndi tshi vhona u nga u khou mmbona, fhedzi e kule. Ndo vha ndi tshi pfa u nga ha mmbengi kana u mpfuna.” Ndi ngani Sheila o vha a tshi nga yeneyi nḓila? O ri: “Muṱa wahashu wo sedzana na makhaulambilu a tshi khou tou tevhekana nahone zwi tshi vhonala u nga Mudzimu ha khou vhuya a ri thusa.”

U fana na Sheila, na inwi ni nga ḓipfa u nga Mudzimu ane a vha Ramaanḓaoṱhe ha tshili. Ni nga ḓivhudzisa arali e na ndavha na inwi. Yobo munna wa u luga we a vha e na lutendo lwa uri Musiki u na maanḓa na vhuṱali o ḓipfa nga nḓila i fanaho. (Yobo 2:3; 9:4) Musi Yobo a tshi khou tou bva u sedzana na makhaulambilu a tshi khou tou tevhekana, o vhudzisa Mudzimu uri: “U itela’ni U tshi ntsanda? U itela’ni U tshi ṋyita swina ḽau?”—Yobo 13:24.

Bivhili i ri mini? Naa ri tea u vhona Mudzimu mulandu musi hu tshi vha na makhaulambilu? Naa hu na vhuṱanzi vhune ha sumbedza uri Mudzimu u na ndavha na vhathu na uri u na ndavha na muṅwe na muṅwe? Naa hu na muthu ane a ḓivha arali Mudzimu a tshi ri ṱhogomela, u ri pfesesa, u ri dzhiela nṱha kana u ri thusa musi ri na dzithaidzo?

Kha thero dzi tevhelaho, ri ḓo ṱolisisa nḓila ine tsiko ya nga ri funza ngayo nga ha uri Mudzimu u na ndavha na riṋe. (Vharoma 1:20) Ri ḓo dovha ra ṱolisisa zwine Bivhili ya zwi dzumbulula nga ha uri Mudzimu u na ndavha na riṋe. Musi ni tshi shumisa tsiko yawe na Ipfi ḽawe u itela u “mu ḓivha,” ni ḓo vha na vhungoho ha uri “u a ni ṱhogomela.”—1 Yoh. 2:3; 1 Pet. 5:7.