“Uw e Immoy Got Riy?”
“UG PAR MA GU BE FITH NI BE LUNGUG: UW E IMMOY GOT RIY?”—Thin rok Pope Benedict XVI, u nap’an ni yan nga reb e concentration camp ni immoy kafram u Auschwitz u Poland.
NAP’AN NRA BUCH BAN’EN NIB TOMGIN NI BOOR E GIRDI’ NI KE GAFGOW RIY, MA GUR, GA MA LEMNAG FARE DEER NI BE GAAR, ‘UW E IMMOY GOT RIY?’ FA GUR, BAY BAN’EN NIB TOMGIN NI KE BUCH U LAN E YAFOS ROM NI KE K’ARING E GAFGOW ARA KIREBAN’ NGOM, MIKI K’ARINGEM NI NGAM LEMNAG KO RRIYUL’ NI MA LEMNAGEM GOT FA DANGA’?
Sana taareb rogon e lem romew Sheila ni ma par u Meriken. Nni chuguliy u reb e tabinaw nri yad ba m’ing ko teliw, ere yog ni gaar: “Nap’an ni ku gub bitir nib ga’ fan Got u wan’ug ni bochan e Ir e Ke Sunmiydad. Machane, da gur ma lemnag nib chugur e tha’ u thilmow. Gu ma lemnag ni ma yaliyeg, machane ba palog rog. Da gur ma lemnag ni be fanenikayeg, machane ku de mich u wan’ug ni ma lemnageg.” Mang fan ni i maruwar e pi n’ey u wan’ Sheila? I weliy ni gaar: “Boor ban’en nib tomgin ni buch ko tabinaw rog nug gafgowgad riy nnap’an nra m’ay reb miki yib reb, ma nap’an ni i buch e pi n’em ma gowa bod nder ayuwegmad Got.”
Sana taareb rogomew Sheila ya ba mich u wan’um ni bay Got ni Gubin Ma Rayog Rok. Machane, sana ga ma lemnag ko rriyul’ ni ma lemnagem fa danga’. Job ni ir be’ nib mat’aw e ba mich u wan’ nib gel gelngin e En Tasunmiy ma kub gonop, machane ki i maruwar e re n’ey u wan’. (Job 2:3; 9:4) Tomuren ni yib boor e gafgow ngak Job nra dawori m’ay reb ma kki taw reb, maku dakuriy bang nrayog ni nge pogofan ngay, ma aram me fith ngak Got ni gaar: “Mang ni kam fek owchem rog? Mang ni kam teg ni gowa gub toogor?”—Job 13:24, BT.
Mang e be yog e Bible? Gur, Got tapgin e pi n’en ni ma buch nib tomgin ni ma k’aring e gafgow ko girdi’? Gur, bay e mich riy ni ma lemnag Got e girdi’ ni gubin maku ma lemnagdad ni be’ nge be’, fa? Gur rayog ni nge bagadad me nang rok ko rriyul’ ni ma lemnag Got, ara manang rarogon, ara manang rogon laniyan’, ara ayuweg ko pi magawon rok, fa?
Tin migid e article nga tomuren e biney e gad ra weliy riy murung’agen boch ban’en ni ke sunmiy Got nge n’en ni be fil ngodad u rogon ni ma lemnagdad Got. (Roma 1:20) Tomuren ma aram mad weliyed e n’en ni be yog e Bible u murung’agen rogon ni ma lemnagdad Got. Ra yoor ban’en nda “nanged” u murung’agen Got ko tin ni ke sunmiy nge pi n’en ni bay u lan e Thin rok, ma aram e rayog ni nge pagan’um ni ma ‘lemnagem.’—1 John 2:3; 1 Peter 5:7.
