¿NÉ LOOY GA? ¿MA GONABDIITZLO NDEʼ ÓRNI BIBIʼLO TOIB DESGRASY LA? ¿MA GOSACLOLO TOIB DESGRASY NI BISIOʼOB XCALNABANYLO NÉ BUNYLO PENSARY QUE DIOS DITI RIOʼ GALRRASAʼ POR LOOY LA?

Sheila, ni rabés gudx Estados Unidos ni goniʼs lad family ni buny crer lóo Dios, raniʼbu ndeʼ: «Desde dzú naca mbiox rony crer lóo Dios portín naana que láabu Bisaʼ lóono, per diti bidzaktzay láabu. Ná biduidy cuent que láabu rabiʼbu naʼ, buni pensary que diti racadiagbu naʼ. Diti buny crer que rianladxbu naʼ, per gosaca que diti rioʼbu galrrasaʼ por naʼ». ¿Xigony góc xpensarybu modreʼ? Láabu rabexabu láani: «Xfamila godudy ló xidal desgrasy, gosaca que Dios diti gocné lóodo».

Xomod Sheila, looy labúu guiluladxlo que noʼ toib Dios ni nap xiroʼgolu galnadip per ná scú ranabdiitzlo pal rioʼbu galrrasaʼ por looy. Modreʼ gosac Job toib buñguieeu ni buny xinésni ni gop confianz ló xcalnadip né ló xcalnan ni Bisaʼ láabu (Job 2:3; 9:4). Después ni godudybu ló desgrasy né bidopy xcalnabanybu, gonabdiitzbu Dios: «¿Xigony racachlanlo lólo né rabiʼlo naʼ xomod xi enemiglo?» (Job 13:24).

Per ¿xí ná la Biblia? ¿Nap Dios dool por ni cadudyno ló galrrioʼob la? ¿Rioʼ Dios ló galrrasaʼ por buñgudxlio, né por tigaagano la? ¿Labúu ganno pal rimbubu, riembu né racnébu lóono órni cadudyno ló galnagan la?

Ló stipnés árticulos ni guisuidyno saduidyno cuent ximod guirá ni bisaʼ Dios né ni sieed ló la Biblia raslooy que rioʼbu galrrasaʼ por lóono (Romanos 1:20). Conforma más guimbulo ni Bisaʼ looy más saplo confianz que nadxiʼbu looy (1 Juan 2:3; 1 Pedro 5:7).