Saonari rimangi ma taringot halak na kembar. Masiantusan do nasida. Sahalak direktur ni Pusat Penelitian Anak Kembar na margoar si Nancy Segal mandok, “Piga-piga halak na kembar boi do rap masiantusan.” Si Nancy on pe adong do kembaranna. Asing ni i, sahalak borua na adong kembaranna pe mandok, “Huboto do pangkilalaan ni kembaranku. Ibana pe diboto do pangkilalaanku.”

Boasa boi songon i? Penelitian mandok, inganan dohot cara ni natua-tua pagodang-godangkon halak na kembar, boi mambahen na kembar i lam solhot jala masiantusan. Tutu do i nian. Alai na mambahen nasida boi masiantusan, i ma ala sarupa do gen ni na kembar i.

RIMANGI MA: Ala Debata do na manompa gen na adong di dirinta, tontu tangkas do diboto Ibana taringot hita. Didok si Daud do songon on, “Dipadomu Ho do [ahu] di bortian ni dainang. Di tingki dipature angka holiholingku, jala manat dipadomu di bortian ni dainang, . . . diida Ho do ahu andorang so tubu dope. Angka ari naung tinontuhonMu di ahu nunga tarsurat hian i di bukuM.” (Psalmen 139:13, 15, 16, Bibel siganup ari) Jadi Debata ndang holan mamboto taringot dirinta, alai diantusi Ibana do angka na masa di ngolunta. Pos ma rohanta, diparrohahon Debata do hita ganup marsada-sada.

Tingki martangiang tu Jahowa, didok si Daud do songon on, “Ale Jahowa, disulingkit jala ditanda Ho do ahu! Sai diboto Ho do manang na hundul manang na jongjong ahu, gari sian na dao diantusi Ho do pingkiranku. Ai ndang adong nanggo sada hata di atas dilangku, tongon do ale Jahowa, diboto Ho do sudena i.” (Psalmen 139:1, 2, 4) Diboto Jahowa do muse taringot pangkilalaanta jala ‘diantusi do nasa sangkap ni rohanta’. (1 Kronika 28:9; 1 Samuel 16:6, 7) Sian angka ayat on, aha do na taboto taringot Debata?

Tingki martangiang, nang pe ndang tapaboa na di roha dohot di pingkiranta tu Debata, diboto Ibana do aha na laho taulahon jala diantusi do boasa taulahon i. Asing ni i, diboto Ibana do angka na denggan na laho taulahon, nang pe sipata maol mangulahon i. Jadi ala dibahen Debata do adong holong ni roha di dirinta, lomo do rohana mangida caranta patuduhon holong i.​—1 Johannes 4:7-10.

 Angka Ayat na paposhon rohanta

• “Diparrohahon Jahowa do halak na mangulahon na sintong jala ditangihon do pangidoan ni nasida.”​—1 PETRUS 3:12.

• Marjanji do Debata, “Huparrohai jala hupodai pe ho taringot tu dalan sidalananmu, huiringiring pe ho dohot pamereng ni matangku.”​—PSALMEN 32:8.

Diboto Debata do angka na masa di ngolunta jala diantusi do pangkilalaanta. Alai boha do molo masa hasusaan tu hita? Parrohahon ma pengalaman ni si Anna, sian Nigeria. Didok ibana, “Gok do hasusaanku. Ndang adong labana ahu mangolu.” Didok ibana muse, “Nunga mabalu ahu, jala borungku di rumah sakit ala marsahit hidrosefalus (penumpukan cairan di otak). Ahu pe hona kanker payudara jala ingkon dioperasi, kemoterapi, dohot radioterapi. Mansai borat do on di ahu, ala rap marsahit ahu dohot borungku di rumah sakit.”

Aha do na diulahon si Anna? Didok ibana, “Hurimangi ma ayat di Pilippi 4:6, 7 na mandok, ‘Lehonon ni Debata ma tu hamu hadameon na so boi diantusi jolma, na boi manjaga roha dohot pingkiranmuna.’ Tingki hurimangi ayat i, lumbang ma pangkilalaanku. Holong do roha ni Jahowa mangida ahu. Umbotoan do Ibana taringot diringku sian ahu sandiri. Asing ni i, dipatogu angka dongan sahaporseaonku do ahu.”

Didok ibana muse, “Hansit situtu do huhilala sahithon. Alai dame do huhilala jala borungku pe nunga lam sehat. Ala marhaposan tu Jahowa, ndang sai marsak be hami nang pe adong hasusaan. Alana didok di Jakobus 5:11, ‘Hudok hami do marlas ni roha halak na martahan manaon hasusaan. Nunga dibege hamu, martahan do si Job manaon hasusaan jala nunga diboto hamu songon dia Jahowa mamasu-masu ibana. Sian i ma diboto hamu na parholong do Jahowa jala parasi roha.’ Diantusi Jahowa do angka na masa di ngolu ni si Job. Jadi pos ma rohanta, diantusi Jahowa do angka na mambahen susa ngolunta.”