Ñaʼtancu bajcheʼ yilal chaʼtiquil xlutob junlajaloʼ bʌ, wen ñocholob i chaʼan i bʌ. An chuqui wen utsʼatax bʌ miʼ yujtel tiʼ tojlelob, jin chaʼan wen temelob. Nancy Segal, juntiquil directora yaʼ baqui miʼ tsajintel xlutob, am bʌ juntiquil i yijtsʼin xlut bʌ yicʼot, miʼ yʌl chaʼan an xlutob «utsʼatax bʌ miʼ chʼʌmbeñob i bʌ isujm chuqui miʼ yʌlob, mach wersajic chaʼan miʼ tsictesʌbeñob i bʌ». Juntiquil xʼixic tsiʼ yʌlʌ bajcheʼ yilal an yicʼot i yijtsʼin xlut bʌ yicʼot jaʼel: «Wen j cʌñʌ lon c bʌ».

¿Chucoch cheʼ yilalob bajcheʼ jiñi? Isujm chaʼan jiñʌch bajcheʼ yilal baqui miʼ colelob yicʼot bajcheʼ yilal miʼ cosʌntelob, pero cʼotem ti qʼuejlel chaʼan junchajp ñuc bʌ i cʼʌjñibal jin cheʼ wen lʌcʼʌ lajal jiñi ADN * añoʼ bʌ i chaʼan.

ÑAʼTANCU ILIYI: Dios jiñʌch tsaʼ bʌ i Meleyonla (Pʌtʌyonla), jin chaʼan i cʌñʌyonla ti wen, maʼañic yambʌ. Jin chaʼan, juntiquil tsaʼ bʌ tsʼijbu jiñi salmo i cʼabaʼ David tsiʼ yʌlʌ: «Pejtel chuqui tac an tic malil a melbalʌch. Tsaʼ meleyon cheʼ añon to tiʼ ñʌcʼ c ñaʼ. Mach mʌcbilic c bʌquel ti a wut, cheʼ cʌntʌbilon i chaʼan c ñaʼ [...]. Tsaʼ wʌn ñaʼta bajcheʼ an quejtal cheʼ maxto añonic» (Salmo 139:13, 15, 16). Cojach Dios i cʌñʌyonla ti wen yicʼot miʼ chʼʌmben isujm bajcheʼ yilal melbilonla, pero mach cojach jiñi, yujil pejtelel chuqui ñusʌbil lac chaʼan am bʌ i qʼuexta lac melbal. Jin chaʼan, miʼ mejlel lac ñop chaʼan jin jach muʼ bʌ i chʼʌmben isujm ti wen chuqui mi lac ñusan.

David tsiʼ yʌlʌ ti oración: «C Yum, tsaʼ wen qʼueleyon. Cʌmbiloñʌch a chaʼan. A wujil cheʼ mic buchtʌl yicʼot cheʼ mic waʼtʌl. Maʼ luʼ cʌmbeñon c pusicʼal cheʼ ñajt añon. Cheʼ maxto loqʼuemic c tʼan ti quej, a wujilix chuqui mi caj c sub» (Salmo 139:1, 2, 4). Jin chaʼan, Jehová miʼ cʌn chuqui an ti lac pusicʼal anquese wen tam an, i miʼ cʌn jaʼel chuqui mi lac ñaʼtan lac mel (1 Crónicas 28:9; 1 Samuel 16:6, 7). ¿Chuqui miʼ cʌntesañonla tiʼ tojlel Dios iliyi?

Miʼ cʌntesañonla chaʼan cheʼ wocol mi la cubin chaʼan mi lac suben ti oración chuqui mi lac ñaʼtan yicʼot chuqui mi la cubin, Jehová ñaʼtʌbilix i chaʼan. Miʼ qʼuel muʼ bʌ lac mel, yicʼot miʼ chʼʌmben isujm jaʼel chucoch mi lac mel. Pero Dios miʼ mejlel i ñaʼtan jaʼel chuqui mi lac mel i wentʌlel cheʼ yambʌyic chuqui woli (choncol) lac ñusan. Dios tsiʼ meleyonla chaʼan miʼ mejlel lac pʌs jiñi cʼuxbiya, jin chaʼan miʼ mejlel lac ñop chaʼan Dios yomʌch i cʌn yicʼot i chʼʌmben isujm jiñi wen bʌ chuqui mi lac ñaʼtan yicʼot am bʌ ti lac pusicʼal (1 Juan 4:7-10).

Jiñi Biblia miʼ subeñonla:

• «Come lac Yum woliʼ wen qʼuel jini tojoʼ bʌ. Miʼ yubibeñob i yoración» (1 PEDRO 3:12).

• Dios miʼ yʌcʼ i tʼan: «Mi caj j cʌntesañet. Mi caj c pʌsbeñet jini bij baqui yom maʼ majlel. Mi caj c tojʼesañet majlel tic wut» (SALMO 32:8).

¿Muʼ ba mejlel i coltañonla lac ñusan wocol tac cheʼ la cujil chaʼan Dios mucʼʌch i cʌn lac wocol? Ñaʼtancu tiʼ tojlel jiñi Anna chʼoyol bʌ ti Nigeria. Miʼ yʌl: «Maʼañix tsaʼ c ñaʼta chuqui yom mic mel, mij cʼajtiben c bʌ mi anto i cʼʌjñibal j cuxtʌlel. Cheʼ bʌ tsaʼ subentiyon chaʼan an cáncer tic chuʼ, chʌmeñix (sajtemix) jiñi c ñoxiʼal i jiñi cʌlʌ chʼoc an ti hospital jaʼel come an i chaʼan Hidrocefalia (jiñʌch cheʼ miʼ chuytʌl jaʼ ti lac sicojc). Wen wocol tsaʼ cubi cheʼ yaʼ lajal añon quicʼot cʌlʌ chʼoc yaʼ ti hospital, ti tsejpiyon, tsaʼ c chʼʌmʌ cabʌl tsʼac yicʼot tsaʼ pulbentiyon ti láser jiñi am bʌ tic chuʼ».

¿Chuqui tsiʼ colta jiñi Anna chaʼan miʼ cuch? «Mic mulan c wen ñaʼtan jiñi texto tac am bʌ ti Biblia bajcheʼ Filipenses 4:6, 7, baqui miʼ yʌl chaʼan jiñi ‹i ñʌchʼtʌlel lac pusicʼal chʼoyol bʌ ti Dios mi caj i cʌntan lac pusicʼal yicʼot lac ñaʼtʌbal›. Cheʼ mic chʌn cʼajtesan iliyi ñoj lʌcʼʌl tsaʼ cubi c bʌ tiʼ tojlel Jehová, i cujil chaʼan jinto wen i cʌñʌyon bajcheʼ tic bajñelil. Yicʼot jaʼel tiʼ wen coltayoñob jiñi c piʼʌlob lajal bʌ lon c ñopbal».

«Anquese bej cʼamonto, ñumen weñix añon lon. Tsaʼix lon j cʌñʌ chaʼan wen chuqui yom mi lon c ñaʼtan anquese an wocol tac, come Jehová chʌn lʌcʼʌl mi caj i yajñel ti lon c tojlel. Ti Santiago 5:11 miʼ yʌl: ‹La cujil tijicñayobix chaʼan tsiʼ cuchuyob wocol. Tsaʼix laʼ wubi bajcheʼ tsiʼ cuchu wocol ti utsʼat jini Job. Tsaʼix laʼ wubi chuqui tsiʼ chaʼle lac Yum tiʼ tojlel Job cheʼ tiʼ yujtibal, come uts i pusicʼal lac Yum. Wen yujil pʼuntaya›». Jehová tsiʼ wen chʼʌmbe isujm jiñi wocol tac tsaʼ bʌ i ñusa Job, i miʼ mejlel lac ñop chaʼan mucʼʌch i chʼʌmben isujm lac wocol jaʼel.