Binagbinaga ang pinakasuod nga kaangtanan sa mga tawo, ang kapid nga pareho sing hitsura (identical twins). Pinasahi gid ang ila kasuod. Ang pila gani “pirme nagaintiendihanay nga wala na nagakinahanglan sang paathag,” siling ni Nancy Segal, nga may kapid mismo kag direktor sang Twin Studies Center. Amo sini ang pagpaathag sang may kapid nga babayi: “Nabal-an gid namon ang tanan sa kada isa.”

Ngaa nagahangpanay gid sila? Ginapakita sang pagtuon nga bisan may labot ang ila palibot kag ang pagpadaku sang mga ginikanan, ang panguna nga rason amo nga pareho ang ila mga gene.

BINAGBINAGA: Nahibaluan gid sang Manunuga sining tumalagsahon nga mga gene ang kada isa sa aton. Si salmista David nagsiling: “Ginputos mo ako sa taguangkan sang akon iloy. Ang akon mga tul-an wala matago sa imo sang ginhimo ako sing likom. . . . Nakita mo na ako sang wala pa ako mabun-ag; nasulat sa imo libro ang tanan ko nga bahin.” (Salmo 139:13, 15, 16) Ang Dios lamang ang nakahibalo kag nakahangop sang aton mga gene kag sang tanan nga hitabo sa aton kabuhi. Ginapasalig kita sini nga nahangpan gid Niya ang tanan sa aton.

Si David nangamuyo: “O Jehova, gin-usisa mo ako gani nakilala mo ako. Nahibaluan mo kon magpungko ako kag kon magtindog ako. Nahibaluan mo ang akon ginahunahuna bisan yara ka sa malayo. Sa wala pa ako makamitlang sing isa ka tinaga, O Jehova, nahibaluan mo na ini.” (Salmo 139:1, 2, 4) Dugang pa, nahibaluan ni Jehova kon ano ang yara sa aton tagipusuon kag “nahantop niya ang tanan nga huyog sang [aton] panghunahuna.” (1 Cronica 28:9; 1 Samuel 16:6, 7) Ano ang ginasugid sini parte sa Dios?

Bisan pa nga wala naton ginahambal ang aton mga pangamuyo kag ginabatyag, wala lamang nakita sang aton Manunuga kon ano ang aton ginahimo kundi nahangpan man niya kon ngaa ginahimo naton ini. Dugang pa, nahangpan niya ang gusto pa naton nga himuon, bisan pa indi naton ini mahimo bangod sang aton mga limitasyon. Gani, bangod gintuga kita sang Dios nga may gugma, handa gid sia kag gusto gid niya nga hibaluon kag hangpon ang aton mga panghunahuna kag mga motibo.—1 Juan 4:7-10.

Ang Biblia nagapasalig sa aton

• “Ang mga mata ni Jehova nagatulok sa mga matarong, kag ang iya mga dulunggan nagapamati sa ila pag-ampo.”—1 PEDRO 3:12.

• Ang Dios nagsaad: “Hatagan ko ikaw sing paghangop kag tudluan ko ikaw sang dalanon nga dapat mo laktan. Laygayan ko ikaw samtang nagatulok ako sa imo.”—SALMO 32:8.

Makabulig bala sa aton nga maatubang ang mga kabudlayan kon mahibaluan naton nga nahangpan sang Dios ang aton kahimtangan kag balatyagon? Binagbinaga ang natabo kay Anna, nga taga-Nigeria. “Nagapalibog ako kon bala may pulos pa ang akon kabuhi kay kabudlay gid sang akon kahimtangan,” paathag niya. “Balo ako kag ginasagod ko ang akon bata nga babayi nga naospital kay may hydrocephalus sia (madamo sing tubig sa utok), sang nabal-an ko nga may kanser ako sa suso kag dapat magpaopera, magpa-chemotherapy, kag magpa-radiotherapy. Mabudlay gid nga ara ako sa ospital kag atipanon ko pa ang akon nagabalatian nga bata.”

Ano ang nakabulig kay Anna? “Ginpamensaran ko ang Filipos 4:6, 7, nga nagasiling nga ‘ang paghidait sang Dios nga labaw sa tanan nga paghangop magabantay sang inyo tagipusuon kag ikasarang sa paghunahuna.’ Kon madumduman ko ini nga teksto, nagasuod pa gid ako kay Jehova, kay nahibaluan ko nga mas nahangpan niya ako. Napalig-on man ako sang mga kauturan sa amon kongregasyon.

“Bisan pa nga nagamasakit gihapon ako, nag-ayo-ayo na ang amon pamatyag sang akon bata. Natun-an namon nga indi kita dapat maluyahan sing buot kon may mga kabudlayan kay buligan kita ni Jehova. Ang Santiago 5:11 nagapasalig sa aton: ‘Ginakabig naton nga malipayon ang mga nagbatas. Nabatian ninyo ang pagbatas ni Job kag nahibaluan ninyo ang pagpakamaayo nga ginhatag ni Jehova, kag nakita ninyo nga si Jehova mapinalanggaon gid [ukon, “tuman ka mainawaon,” footnote] kag maluluy-on.’” Nahangpan gid ni Jehova ang sitwasyon ni Job, amo nga makasalig man kita nga mahangpan niya ang aton mga kabudlayan.