Ɛyaa mba pakpaɣ ɖama hɔɔlɩŋ sakɩyɛ taa nɛ pasɩm ɖama wɛtʋ camɩyɛ yɔ lɛ ɖomaa. Nɔɔ kʋɖʋmaɣ ŋga kɛwɛ pɛ-hɛkʋ taa yɔ, kɛwɛ ŋgee. Nancy Segal, weyi ɛkɛ ɖom nɛ ɛkɛ ɖɔɖɔ ɛgbɛyɛ nɖɩ ɖɩtazɩɣ ɖomaa wɛtʋ taa nɛ payaɣ-ɖɩ se Twin Studies Center yɔ, ɖɩ-ñʋʋdʋ yɔ, ɛyɔɔdaa se: Nabʋyʋ taa, “ɖom nɔɔyʋ tɩlɩɣ mbʋ e-ɖomɖa caɣ-ɩ heyuu yɔ camɩyɛ, paa ɛlɛ ɛtɩlɩzɩ pɩ-taa kpayɩ kpayɩ yɔ.” Halʋ nɔɔyʋ weyi ɛkɛ ɖom yɔ, ɛyɔɔdɩ ɛ nɛ e-ɖomɖa pɔ-tɔm se “paa weyi ɛsɩm mbʋ pɩ-taa lɛlʋ wɛɛ yɔ.”

Suwe ɖɩkpɛlɩkɩɣ ŋgee nɔɔ kʋɖʋmaɣ ŋga ka-taa? Ñɩnɩyaa tazaa nɛ pana se nɔɔ kʋɖʋmaɣ ŋga kapɩzɩɣ kalɩɩnɩ lone nɛ hɔʋ ŋgʋ kɩ-taa palʋlɩ ɖomaa yɔ, ɛlɛ kɔzɩ kɔzɩ lɛ, ɖɛzʋʋ mayaɣ (Constitution génétique) cɔlɔ kalɩɣna.

MAƔZƖ NƐ ŊNA: Weyi ɛlɩzɩ wondu tɩŋa payɩ nɛ pɩkpɛndɩnɩ ɖɛzʋʋ mayaɣ yɔ, paa pɩɩla ɛzɩma yɔ, ɛnɩɣ mbʋ pɩ-taa ɖa-tɩŋa payɩ ɖɩwɛɛ yɔ, nɛ pɩkɩlɩ ɖa-maɣmaɣ. Pʋyɔɔ keɣa maɖʋ Daviid yɔɔdaa se: “Ñalʋnɩ mo-hosi nzɩ sɩ-tɩŋa mon-ɖoo taa. Pɩtɩkɛ se ŋtaasɩ mɔ-mɔɔ pama-m mɛsaɣ tɛɛ . . . lɛ. Maakɛ sogolaɣ lɛ, ñɛ-ɛsa naɣaɣ-m.” (Keɣa 138:13, 15, 16) Ɛsɔ ɖeke pɩzɩɣna nɛ ɛnɩɩ paa weyi ɛ-tɔm taa kpayɩ kpayɩ, paa pɩtɩɩkɛ ɖɛzʋʋ masɩ hɔɔlʋʋ taa yaa mbʋ payɩ pɩtalɩɣ-ɖʋ ɖe-wezuu caɣʋ taa yɔ. Ɛzɩma Ɛsɔ sɩm ɖɛ-wɛtʋ nɛ ɖɛzʋʋ masɩ camɩyɛ yɔ, pɩwɩlɩɣ-ɖʋ se mbʋ pɩ-taa ɖɩwɛ yɔ, ɛnɩɣ pɩ-taa camɩyɛ.

Daviid tɩmaa se: “[Yehowa], ŋwili-m nɛ ŋsɩmɩ-m. Mancaɣaɣ yaa mankʋyaa, ŋsɩma, ma-lɩmaɣza ana a-tɩŋa payɩ ŋsɩm-yɛ ɖooo lɔŋ. Tɔm taatɩɩkpatɩ mɔ-nɔɔ taa, ɛlɛ ŋsɩm-tʋ tɩ-tɩŋa kɩɖɩɖɩ.” (Keɣa 138:1, 2, 4) Pɩwɩlɩɣ ɖɔɖɔ se Yehowa sɩm ɖa-lɩmaɣza nɛ ewiliɣ “laŋa kpeekpe taa.” (3 Awiya 28:9; 1 Samɩyɛɛlɩ 16:6, 7) Suwe Masɩ sɩnɛ sɩkpɛlɩkɩɣ-ɖʋ Ɛsɔ yɔɔ?

Paa pɩwɛ-ɖʋ kaɖɛ se ɖiheyi Ɛsɔ adɩma taa, ɖa-lɩmaɣza tɩŋa yaa mbʋ pɩcɛyɩɣ-ɖʋ yɔ, ɖa-Lɩzɩyʋ naɣ mbʋ ɖɩlakɩ nɛ mbʋ pʋyɔɔ ɖɩlakɩ-pʋ yɔ. Kɔzɩ kɔzɩ lɛ, ɛnɩɣ pɩ-taa se ɖɩsɔɔlɩ labʋ kɩbam, paa ɖɛ-ɛjandʋ ɛlakɩ nɛ ɖɩɩpɩzɩɣ se ɖɩla kɩbam mbʋ payɩ ɖɩsɔɔlaa yɔ. Ɛzɩma Ɛsɔ ɖʋ ɖa-laŋa taa sɔɔlɩm kajalaɣ ɖeɖe yɔ, pɩwɩlɩɣ se ɛsɔɔlɩ siŋŋ se ɛtɩlɩ ɖa-lɩmaɣza nɛ mbʋ ɖɩsɔɔlɩ labʋ yɔ.​—1 Yohanɛɛsɩ 4:7-10.

 Masɩ hɛzɩɣ ɖa-laŋa

• “[Yehowa] ɛsa wɛ ɛyaa siɣsiɣ tɩnaa yɔɔ nɛ ɛɖʋʋ nɩŋgbaŋʋʋ pa-adɩma cɔlɔ.”​—1 PƖYƐƐRƖ 3:12.

• Ɛsɔ labɩ-ɖʋ tamaɣ se: “Malakɩ mawɩlɩ-ŋ nʋmɔʋ ŋgʋ ŋtɩŋ yɔ, mɔnsɔzʋʋ-ŋ lɔŋ nɛ mankandɩyɩ ñɔ-yɔɔ.”​—KEƔA 31:8.

Ɛzɩma ɖɩnawa se Ɛsɔ nɩɣ ɖɔ-tɔm taa nɛ ɛsɔɔlaa se ɛsɩnɩ-ɖʋ yɔ, pɩɩkpazɩɣ-ɖʋ ɖoŋ se ɖɩlʋbɩnɩ kala yaa we? Maɣzɩ mbʋ pɩɩtalɩ Anna weyi ɛwɛ Naajeeriya yɔ, pɩ-yɔɔ nɛ ŋna. Ɛyɔɔdaa se: “Mɔnpɔzaɣ man-tɩ tam se wɛtʋ ndʋ tɩ-taa mɛwɛɛ yɔ, ɛbɛ wezuu caɣʋ wazɩɣ-m? Mɛnkɛ lelu nɛ mɔncɔnɩ mɛn-pɛlɛ weyi pasɩ-ɩ ɖɔkɔtɔ mbʋ pʋyɔɔ yɔ, ɛwɛnɩ fɩtɩyɩm taa lɩm kpeɣluu kʋdɔŋ (hydrocéphalie) yɔ, ɛ-yɔɔ. Nɛ pɔkɔɔ pana se mɛwɛnɩ hɩɖɛ tɛ kansɛɛrɩ, nɛ pɩpɔzaa se palabɩ-m tʋmɩyɛ nɛ palabɩ-m ɖɔɖɔ chimiothérapie nɛ radiothérapie. Alɩwaatʋ ndʋ, pɩɩlabɩ-m kaɖɛ kpem, mbʋ pʋyɔɔ yɔ, paasɩ ma-maɣmaɣ ɖɔkɔtɔ tɛ, nɛ pɩwɛɛ ɖɔɖɔ se mɔncɔnɩ mɛn-pɛlɛ yɔɔ.”

Ɛbɛ kpazɩ Anna ɖoŋ? Ɛyɔɔdaa se: “Mamaɣzaɣ masɩ yɔɔ, ɛzɩ Filiipi 4:6, 7 mbʋ yɔ; mayaɣ ŋga kɔtɔm se: ‘Ɛsɔ tɛ laŋhɛzɩyɛ nɖɩ ɖɩkpaɖɩ lɔŋ kpeekpe yɔ, ɖɩɖɔkɩ mɩ-laŋa nɛ mɩ-maɣzɩm.’ Mayaɣ ŋga kɔkɔŋ ma-ñʋʋ taa lɛ, mɔntɔzʋʋ se Yehowa nɩɣ mɛ-wɛtʋ taa camɩyɛ nɛ ɛsɩm mbʋ pɩcɛyɩɣ-m yɔ nɛ pɩkɩlɩ ma-maɣmaɣ. Koobiya halaa nɛ abalaa ɖɔɖɔ kpazɩ-m ɖoŋ.

“Paa menɖiɣni nɩʋ siziŋ yɔ, ma nɛ mɛn-pɛlɛ ɖɛ-wɛtʋ maɣzɩ ñɔɔzʋʋ. Mbʋ pʋyɔɔ yɔ, Yehowa wɛ ɖɔ-cɔlɔ nɛ ɖɩkpɛlɩkɩ ɛzɩma ɖɩtaaka ɖa-lɩmaɣza kala wena ɖɩkatɩɣ yɔ a-yɔɔ yɔ. Yakubu 5:11 kpazɩɣ-ɖʋ ɖoŋ se: ‘Ðɩyaɣ se koboyaɣ tɩnaa mba pɔɖɔkɩ pa-tɩ kpam yɔ. Ɩnɩ pɔyɔɔdɩ Yɔɔb tɩ ɖɔkʋʋ tɔm nɛ ɩna [Yehowa] tamaɣ, mbʋ pʋyɔɔ yɔ [Yehowa] kɛ pʋtɔdɩyɛ nayʋ weyi ɛsɩm ɛ-tɩ ɖɔkʋʋ yɔ.’” Yehowa kaanɩ mbʋ pɩtalɩ Yɔɔb yɔ, pɩ-taa camɩyɛ, nɛ ɖɩpɩzɩɣ ɖɩtaa liu ɖɔɖɔ se ɛnɩɣ wɛtʋ ndʋ tɩ-taa ɖɩwɛɛ yɔ camɩyɛ.