តើព្រះយល់អំពីអ្នកឬទេ?
តើអ្វីៗដែលព្រះបានបង្កើត បង្រៀនយើងអ្វីខ្លះ?
សូមពិចារណាអំពីទំនាក់ទំនងជិតស្និទ្ធបំផុតដែលមនុស្សអាចមាន ពោលគឺទំនាក់ទំនងរវាងកូនភ្លោះ។ * ពួកគេមានអារម្មណ៍ជិតស្និទ្ធជាពិសេសចំពោះគ្នា។ នែនស៊ី សេហ្គាល ដែលជាប្រធាននៃមជ្ឈមណ្ឌលសិក្សាអំពីកូនភ្លោះ ហើយខ្លួនគាត់ផ្ទាល់ក៏ជាកូនភ្លោះដែរ និយាយថា កូនភ្លោះខ្លះ«ដឹងអ្វីដែលម្នាក់ទៀតចង់និយាយហើយយល់យ៉ាងច្បាស់ ដោយមិនចាំបាច់ពន្យល់ច្រើន»។ ស្ត្រីម្នាក់បានរៀបរាប់អំពីទំនាក់ទំនងរវាងនាងនិងបងប្អូនភ្លោះរបស់នាងថា៖ «យើងដឹងអ្វីទាំងអស់អំពីគ្នា»។
ហេតុអ្វីកូនភ្លោះអាចយល់អំពីគ្នាដូច្នេះ? ការសិក្សាស្រាវជ្រាវផ្សេងៗបង្ហាញថាបរិយាកាស និងការអប់រំពីឪពុកម្ដាយគឺសំខាន់ តែជាពិសេសនោះមកពីលក្ខណៈក្នុងហ្សែន ដែលធ្វើឲ្យកូនភ្លោះដូចគ្នា។
សូមពិចារណា: អ្នកបង្កើតហ្សែនដ៏អស្ចារ្យនេះប្រាកដជាយល់អំពីយើងម្នាក់ៗច្បាស់ជាងអ្នកណាទាំងអស់។ ដាវីឌដែលជាអ្នកតែងចម្រៀងសរសើរព្រះបានប្រកាសថា៖ «លោកបានបាំងខ្ញុំនៅក្នុងផ្ទៃម្ដាយ។ ពេលដែលលោកសូនខ្ញុំនៅក្នុងទីកំបាំង ពេលដែលខ្ញុំលូតលាស់នៅក្នុងផ្ទៃម្ដាយ នោះឆ្អឹងរបស់ខ្ញុំមិនបានលាក់បាំងពីលោកទេ។ . . . ភ្នែកលោកបានឃើញខ្ញុំហើយ កាលដែលខ្ញុំមិនទាន់ចេញជារូបរាងនៅឡើយ។ លោកបានកត់អវយវៈទាំងអស់នៃរូបកាយខ្ញុំទុកក្នុងសៀវភៅរបស់លោក»។ (ចម្រៀងសរសើរព្រះ ១៣៩:១៣, ១៥, ១៦) មានតែព្រះប៉ុណ្ណោះដឹងហើយអាចយល់ច្បាស់មិនគ្រាន់តែហ្សែនរបស់យើងទេ តែលោកដឹងរាល់ព្រឹត្តិការណ៍ទាំងអស់ក្នុងជីវិតដែលមានឥទ្ធិពលមកលើយើង។ ព្រះស្គាល់យ៉ាងច្បាស់អំពីយើងនិងហ្សែនរបស់យើង នេះពង្រឹងទំនុកចិត្តយើងថាលោកពិតជាយល់អំពីយើងយ៉ាងល្អិតល្អន់។
តើគម្ពីរបង្រៀនយើងអ្វីអំពីការយល់ធ្លុះជ្រៅរបស់ព្រះ?
ដាវីឌបានអធិដ្ឋានថា៖ «ឱព្រះយេហូវ៉ាអើយ លោកបានស្វែងយល់អំពីខ្ញុំយ៉ាងល្អិតល្អន់ ហើយលោកស្គាល់ខ្ញុំច្បាស់ណាស់។ ពេលខ្ញុំអង្គុយ ពេលខ្ញុំក្រោក លោកជ្រាបទាំងអស់។ លោកដឹងគំនិតរបស់ខ្ញុំពីចម្ងាយ។ មើល! ព្រះយេហូវ៉ាអើយ ខ្ញុំមិនទាន់បាននិយាយផង លោកក៏ជ្រាបច្បាស់អស់ទៅហើយ»។ (ចម្រៀងសរសើរព្រះ ១៣៩:១, ២, ៤) បន្ថែមទៅទៀត ព្រះយេហូវ៉ាស្គាល់អារម្មណ៍កប់ជ្រៅបំផុតរបស់យើង ហើយលោកក៏«ឃើញគ្រប់ទាំងបំណងចិត្តនិងគំនិត»របស់យើងដែរ។ (ប្រវត្តិហេតុទី១ ២៨:៩; សាំយូអែលទី១ ១៦:៦, ៧) តើខគម្ពីរទាំងនេះបង្ហាញយ៉ាងណាអំពីព្រះ?
ទោះជាយើងមិនអាចអធិដ្ឋានប្រាប់អំពីគំនិតនិងអារម្មណ៍របស់យើងទាំងអស់ក៏ដោយ ប៉ុន្តែអ្នកបង្កើតរបស់យើងយល់អំពីយើងយ៉ាងច្បាស់ ដោយសារលោកមិនគ្រាន់តែសង្កេតមើលអ្វីដែលយើងធ្វើប៉ុណ្ណោះទេ តែលោកក៏យល់មូលហេតុដែលយើងធ្វើដូច្នោះដែរ។ លើសពីនេះទៅទៀត លោកដឹងថាយើងចង់ធ្វើអំពើល្អ ទោះជាសមត្ថភាពមានកម្រិតរបស់យើងរារាំងយើងមិនឲ្យធ្វើតាមបំណងចិត្តដ៏ស្មោះរបស់យើងក្ដី។ ពិតណាស់ ដោយសារព្រះបានបង្កើតយើងឲ្យមានសេចក្ដីស្រឡាញ់តាំងពីដំបូង នោះលោកមានបំណងចង់ពិនិត្យមើល ហើយយល់អំពីគំនិតនិងបំណងចិត្តដែលប្រកបដោយសេចក្ដីស្រឡាញ់របស់យើង។—យ៉ូហានទី១ ៤:៧-១០
ព្រះចាប់អារម្មណ៍នឹងរឿងទាំងអស់។ លោកក៏ឃើញទុក្ខលំបាករបស់យើង ទោះជាអ្នកឯទៀតមិនឃើញ ឬមិនយល់ទាំងស្រុងក្ដី
បទគម្ពីរពង្រឹងទំនុកចិត្តយើង
-
«ព្រោះភ្នែករបស់ព្រះយេហូវ៉ាមើលពួកអ្នកសុចរិត ហើយត្រចៀករបស់លោកស្ដាប់ការអង្វរសុំរបស់ពួកគេ»។—ពេត្រុសទី១ ៣:១២
-
ព្រះសន្យាថា៖ «ខ្ញុំនឹងឲ្យអ្នកមានការយល់ធ្លុះជ្រៅ ហើយណែនាំអ្នកឲ្យដើរតាមផ្លូវដែលគួរដើរ ខ្ញុំនឹងផ្ដល់ឱវាទដល់អ្នក ហើយមើលថែអ្នកមិនឲ្យឃ្លាតពីភ្នែករបស់ខ្ញុំឡើយ»។—ចម្រៀងសរសើរព្រះ ៣២:៨
ព្រះពេញទៅដោយសេចក្ដីមេត្តាករុណា
តើការដឹងថាព្រះយល់អំពីស្ថានភាពនិងអារម្មណ៍របស់យើងអាចជួយយើងឲ្យស៊ូទ្រាំនឹងទុក្ខលំបាកឬទេ? សូមពិចារណាអ្វីដែលបានកើតឡើងចំពោះអាណា ដែលមកពីប្រទេសនីហ្សេរីយ៉ា។ នាងពន្យល់ថា៖ «ដោយសារខ្ញុំជួបទុក្ខលំបាក ដូច្នេះខ្ញុំឆ្ងល់ថា តើខ្ញុំរស់នៅមានប្រយោជន៍អ្វី? ខ្ញុំជាស្ត្រីមេម៉ាយ ហើយត្រូវថែរក្សាកូនស្រីរបស់ខ្ញុំដែលដេកឈឺនៅមន្ទីរពេទ្យដោយសារជំងឺម្យ៉ាង (hydrocephalus) ដែលបណ្ដាលមកពីមានទឹកច្រើនពេកក្នុងខួរក្បាល។ ដំណាលគ្នានោះ ខ្ញុំមានជំងឺមហារីកដោះ ហើយត្រូវទទួលការព្យាបាលដោយវះកាត់ ចាក់គីមី និងកាំរស្មី។ ខ្ញុំនិងកូនស្រីរបស់ខ្ញុំដែលមានជំងឺធ្ងន់ធ្ងរត្រូវនៅមន្ទីរពេទ្យក្នុងពេលតែមួយ ដូច្នេះខ្ញុំពិតជាពិបាកខ្លាំងណាស់»។
តើអ្វីបានជួយអាណាឲ្យស៊ូទ្រាំ? នាងនិយាយថា៖ «ខ្ញុំបានរំពឹងគិតបទគម្ពីរផ្សេងៗដូចជាភីលីព ៤:៦, ៧ ដែលចែងថា៖ «សេចក្ដីសុខសាន្តរបស់ព្រះដែលហួសពីការនឹកស្មាន នឹងការពារចិត្តនិងសមត្ថភាពរិះគិតរបស់អ្នករាល់គ្នា»។ រាល់ដងពេលខ្ញុំនឹកឃើញខគម្ពីរនេះ ខ្ញុំមានអារម្មណ៍កក់ក្ដៅនិងជិតស្និទ្ធនឹងព្រះយេហូវ៉ា ព្រោះខ្ញុំដឹងថាលោកយល់អំពីខ្ញុំច្រើនជាងខ្ញុំយល់អំពីខ្លួនឯងទៅទៀត ហើយខ្ញុំក៏បានទទួលការលើកទឹកចិត្តជាច្រើនពីបងប្អូនរួមជំនឿជាទីស្រឡាញ់នៅក្នុងក្រុមជំនុំគ្រិស្តសាសនិកផងដែរ។
«ទោះជាខ្ញុំនៅតែមានបញ្ហាសុខភាព ស្ថានភាពខ្ញុំនិងកូនស្រីរបស់ខ្ញុំបានប្រសើរឡើង។ ដោយសារព្រះយេហូវ៉ានៅខាងយើង យើងមិនគិតអវិជ្ជមានពេលយើងជួបការពិបាកទេ។ យ៉ាកុប ៥:១១ ពង្រឹងទំនុកចិត្តយើងថា៖ ‹យើងចាត់ទុកពួកអ្នកដែលបានស៊ូទ្រាំថាជាអ្នកមានសុភមង្គល។ អ្នករាល់គ្នាធ្លាប់ឮអំពីការស៊ូទ្រាំរបស់យ៉ូប ក៏ដឹងអំពីពរដែលព្រះយេហូវ៉ាបានឲ្យដល់គាត់ ហើយតាមរយៈការនោះ អ្នកឃើញថាព្រះយេហូវ៉ាមានមនោសញ្ចេតនាដ៏ជ្រាលជ្រៅ និងពេញទៅដោយសេចក្ដីមេត្តាករុណា›»។ ព្រះយេហូវ៉ាយល់អំពីស្ថានភាពរបស់យ៉ូបច្បាស់ណាស់ ហេតុនេះយើងអាចប្រាកដថាលោកក៏យល់អំពីការពិបាកណាក៏ដោយដែលយើងមានដែរ។
^ វគ្គ 3 កូនភ្លោះដែលបានត្រូវរៀបរាប់ក្នុងអត្ថបទនេះ គឺជាកូនភ្លោះដែលមានលក្ខណៈក្នុងហ្សែនដូចគ្នា រួមទាំងភេទផងដែរ។