Wәрен әм бьфькьрьн сәр һәләqәтийа незик, чь кö ортʹа мәрьвада һәйә; әw һәйә һәләqәтийа щевийа. Әм дькарьн бежьн кö һәвгьредана wан гәләк незик ә. Директорәк бь наве Ненси Сеган, кö хwәха щеви йә у щабдар ә бона леколина щевийа, öса дьбежә: «Һьнәк жь wан, һәвал щевийед хwә öса фәʹм дькьн, кö заньн әw чь дьхwазә бежә». Кʹöлфәтәк жи дәрһәqа һәләqәтийа хwә тʹәви һәвалщевийа хwә, öса дьбежә: «Әм дәрһәqа һәв һʹәму тьшти заньн».

Гәло чь али wан дькә һәв фәʹм бькьн? Ль гора леколине һатә кʹьфше, wәки тьштед дәр-дор, ширәткьрьн у генетика мина һәв, һʹöкöм дькьн сәр wан щевийа.

ШЕWЬР КЬН: Әʹфьрандаре генетикайе кʹижани кö әм әʹфьрандьнә, бе шьк жь һʹәмушка баштьр мә һәр кәси нас дькә у фәʹм дькә. Даwьде зәбурбеж дьбежә: «Навдьле мьн Тә чекьрьнә, зьке дийа мьнда щәбьрандьмә. Һʹәстуйед мьн жь Тә вәшарти нәман, гава щийе вәшарти һатьмә хöльqандьн. . . . Тә әз дитьм һе нә һатьбум мәйандьн. Һʹәму рʹожед кʹьфшкьрийә бона мьн, кʹьтеба Тәда һатьбунә ньвисандьн» (Зәбур 139:13, 15, 16). Бь рʹасти, тʹәне Хwәде занә генед мә чь щурʹәйи нә у жийина мәда чь дьqәwьмә, кö хәйсәте мә те гöһастьн. Әw кö Хwәде, мә рʹьнд занә у генетика мә, избат дькә кö Әw һʹәму алийава мә фәʹм дькә.

Даwьд дöа дькьр: «Хöдан Тә әз әʹнәнә кьрьм у нас кьрьм. Тö зани рʹабун у рʹуньштьна мьн, дурва Тәва әʹйан ә фькьред мьн. Һәла һе хәбәр нә сәр заре мьн ә Хöдан, фькьр иди Тәва әʹйан ә» (Зәбур 139:1, 2, 4). Бәле, Йаһоwа һʹәму һәстед мәйә кʹур фәʹм дькә у һәла һе «леколине ль һʹәмуйа дьлан дькә» (1 Дирок 28:9; 1 Самуйел 16:6, 7). Әв рʹез дәрһәqа Хwәде чь мәрʹа әʹйан дькьн?

Дьqәwьмә щарна әм нькарьн дöакьрьнеда һʹәму фькьр у һәстед хwә бь гьлийа бежьн, ле Әʹфьрандаре мә нә кö тʹәне дьвинә әм чь дькьн, ле öса жи фәʹм дькә кö чьма әм фьлан тьшти дькьн. Хенщи wе йәке әw мә фәʹм дькә чахе әм дьхwазьн тьштед qәнщ бькьн, ле дәсте мә найе әwе хwәстьне биньн сери. Һәмьки Хwәде һʹьзкьрьн кьрә дьле мә, әw хwәха жи һазьр ә, у дьхwазә дина хwә бьдә фькьр у хwәстьнед мә, йед кö һʹьзкьрьнева гьредайи нә у әw мә фәʹм дькә (1 Йуһ′әнна 4:7-10).

Әw Рʹезед Кʹьтеба Пироз мә qәwи дькьн

• «Чьмки ч′ә′ве Хöдан ль сәр р′аста йә у гöһе wи сәр дöайе wан ә» (1 ПӘТРУС 3:12).

• Хwәде соз дьдә: «Әзе тә аqьл у сәрwахт кьм у рʹийа кö теда һәрʹи бәр тә вәкьм чʹәʹве мьне ль сәр тә бә, тә ширәт кьм» (ЗӘБУР 32:8).

Чахе әм заньн кö Хwәде һʹал у һәстед мә фәʹм дькә, әв йәк дькарә али мә бькә чәтьнайада тәйах кьн? Wәрен әм бьньһʹерьн кö чь һатә сәре Аннайе жь Нижәрйайе. Әw дьбежә: «Әз тʹьме дькʹәтьмә шьке у дьфькьрим кö нәһежа мә бьжим, чьмки һʹале мьн гәләк хьраб бу. Әз жьнәби бум у мьqати qиза хwә дьбум, йа кö нәхwәшханеда бу. Qиза мьн бь нәхwашийа һидротсефалйайе нәхwәш бу (демәк дь мәжуйе wеда ав тʹоп дьбу). Һьм жи һьнге әз пеһʹәсийам кö бьстане мьнда кʹансәр (рәq) һәйә у мьн гәрәке хwә qәнщ кьра, һьм жи кʹимйатерапйа у радйотерапйа бькьра. Әв бона мьн гәләк чәтьн у зәһмәт бу һьм мьqати хwә бьм, һьм жи дь нәхwәшханеда бәр qиза хwә бьм, йа кö гьран нәхwәш бу».

Гәло чь али Аннайе кьр хwә qайим бьгьрә? Әw дьбежә: «Әз дьфькьрим ль сәр рʹезед жь Кʹьтеба Пироз, мәсәлә Филипи 4:6, 7, кʹидәре кö те готьне, wәки әʹдьлайа Хwәде кö жь һәр һʹьш-аqьли дәрбазтьр ә, wе дьл у фькьред wә хwәй кә. Һәр щар әв рʹез дьһатә бира мьн у мьн тʹәхмин дькьр, wәки әз һе незики Йаһоwа дьбум, чьмки мьн заньбу кö әw мьн даһа баш фәʹм дькә, нә кö әз хwәха хwә. Мьн öса жи дьлбини у һеланкьрьнәкә мәзьн дьстанд жь хушк-бьред щьвата хwәда.

«Һәмьки һʹәта ньһа сьһʹәт-qәwата мьн педа баш нәбуйә, ле һʹале мьн у qиза мьн ида баш ә. Чьмки Йаһоwа тʹәви мә йә у әм һин бун нава чәтьнайед ви щурʹәйида жи, ньһерʹандьна рʹаст у позитив хwәй кьн. Аqуб 5:11 öса дьбежә: «Әм хwәзийа хwә ль йед сәбьр дькьн тиньн. Wә бона сәбьра Ибо бьһистийә у wә дит, Хöдан ахьрийа wи чаwа хер кьр. Хöдан чьqаси исаф у р′ә′м ә!» Йаһоwа һʹале Ибо рʹьнд фәʹм дькьр, ләма әм жи дькарьн баwәр бьн, кö Йаһоwа һʹәму чәтьнайед мә у һʹале мә баш фәʹм дькә.