Elabi meji bua malanda makole atu nawu bana ba mapasa batu bafuanangane bikole. Batu balamatangane bikole mu mushindu wa pa buawu. Nancy Segal (mulombodi wa Tshibambalu tshia dilonga bana ba mapasa ne yeye muine dipasa) udi wamba ne: Bua amue mapasa mene “dipasa dimue ndimanye tshidi dikuabu disua kuamba ne ditshiumvua bimpe menemene kabiyi bilomba bua badiumvuije to.” Mamu mukuabu udi umvuija malanda adi pankatshi pende ne dipasa diende didi dimufuane bikole wamba ne: “Tudi bamanyangane bimpe menemene.”

Tshidi tshienza bua bikale bumvuangana mu mushindu wa pa buawu nunku ntshinyi? Malu makebulula adi aleja ne: nansha mudi muaba udi bana bakolela ne mudi baledi babakolesha bienza nanku, tshidi tshitamba kuambuluisha mmushindu wa dikema udi mapasa adi mafuanangane bikole mapiane bintu bia muomue bidi bienza bua bikale tshidibu atshi.

ELABI MEJI: Mufuki udi mufuke bantu mushindu wa dikema eu mmumanye yonso wa kutudi kupita muntu mukuabu yonso. Bulelela, muimbi wa misambu Davidi wakamba ne: “Wakansokoka mu difu dia mamuanyi. Mifuba yanyi kayivua mikusokoka pamvua ngenjibua mu musokoko. . . . Mêsu ebe mine akammona pantshivua mukuji; bitupa biawu bionso bivua bifunda mu mukanda webe.” (Misambu 139:13, 15, 16) Anu Nzambi nkayende ke udi mumanye tshidi tshienza bumuntu buetu ne utshiumvua bimpe menemene ne mmumanye malu adi matufikile adi menze bua tuikale tshitudi etshi. Ditumanya dia Nzambi dia pa buadi ne mudiye mumanye tshidi tshienza bumuntu buetu bidi bitujadikila ne: udi utumvuila too ne mu katoba.

Davidi wakasambila ne: “Yehowa wanyi, wewe udi mukonkonone munda muanyi, ne udi mummanye. Wewe udi mumanye pandi nsomba ne pandi njuka. Udi ujingulula meji andi nawu anu ku bule. Dîyi kadiyi dianji kuikala pa ludimi luanyi, kadi tangila! Wewe Yehowa ukadi mudimanye bimpe.” (Misambu 139:1, 2, 4) Bualu bukuabu, Yehowa mmumanye mutudi tudiumvua munda muetu menemene ne udi kabidi “ujingulula meji onso ne dijinga dionso.” (1 Kulondolola 28:9; 1 Samuele 16:6, 7) Mvese eyi idi ileja tshinyi bua Yehowa?

Nansha mutudi katuyi mua kupatula malu adi munda muetu mu mêyi ne kuleja mutudi tudiumvua patudi tusambila, Mufuki wetu udi umona tshitudi tuenza, umvua kabidi bua tshinyi tudi tutshienza. Mmumanye kabidi malu mimpe atudi basue kuenza, nansha tuetu katuyi ne mushindu wa kukumbaja dijinga dikole ditudi nadi. Bushuwa, bu mudi Nzambi muteke dinanga mu muoyo wetu pa muaba wa kumpala, mmusue, ne udi mene ne dijinga dikole dia kumona ne kumvua meji  etu mimpe ne tshidi tshitusaka bua kuenza malu kampanda.​—1 Yone 4:7-10.

Bible udi utujadikila ne:

• “Mêsu a Yehowa adi kudi bantu bakane, ne matshi ende adi ateleja disengelela diabu.”​—1 PETELO 3:12.

• Nzambi udi utulaya ne: “Nenkupeshe busunguluji ne nenkulongeshe njila uudi ne bua kuendela. Nenkupeshe mibelu ne dîsu dianyi kuudi.”​—MISAMBU 32:8.

Kumanya ne: Nzambi mmumanye nsombelu wetu ne mutudi tudiumvua kudiku kutuambuluisha bua kupita ne ntatu bimpe anyi? Tumone tshivua tshifikile Anna wa mu Nigéria. Udi wamba ne: “Mvua ndiebeja ni bivua bimpe bua kuikala ne muoyo bua nsombelu mikole ivua intulukila. Mvua mukaji mukamba ndama muananyi uvua mu lupitadi ne disama dia mu buongo pakangambilabu ne: mvua ne kansere ka ku dibela ne bivua bikengela bampande ne bangondope. Mvua mupange tshia kuenza bu muvua muananyi mu lupitadi usama eku bandombe panyi bua kuya ku lupitadi bua bangondope.”

Ntshinyi tshivua tshiambuluishe Anna? Udi wamba ne: “Mvua ngelangana meji bua mvese bu mudi Filipoyi 4:6, 7 udi wamba ne: ‘Ditalala dia Nzambi didi dipite dijingulula dionso dia malu nedilame mioyo yenu ne bieledi bienu bia meji.’ Misangu yonso imvua mvuluka mvese eu mvua ndiumvua pabuipi ne Yehowa bikole, mumanye ne: mmummanye bimpe kupita mundi meme mudimanye. Bana betu ba mu tshisumbu bavua kabidi bankankamija bikole.

“Nansha muntshidi anu nsama, nsombelu wanyi ne wa muananyi mmuakanaku. Bu mudi Yehowa ku luseke luetu, tudi balonge bua kubenga kumona anu luseke lubi lua malu patudi tutuilangana ne ntatu. Yakobo 5:11 udi utujadikila ne: ‘Tudi tuangata bantu badi bananukile bu bena diakalenga. Nudi bumvue lumu lua dinanukila dia Yobo ne bamone muvua Yehowa mumuenzele malu ku ndekelu, ne bamone mudi Yehowa muikale ne dinanga dikole menemene [anyi, “uditeka pa muaba wa bakuabu bikole,” dimanyisha dia kuinshi kua dibeji] ne luse.’” Yehowa uvua mumanye nsombelu wa Yobo bimpe menemene, ne tudi ne bua kuikala bashindike ne: mmumanye kabidi nsombelu yonso mikole itudi tutuilangana nayi.