Zia e gbu li na ndö ti songo so ayeke na popo ti azo so a dü ala angbo. * Songo so ayeke na milieu ti ala ayeke tâ nde mingi. Nancy Segal so ayeke directrice ti mbeni ndo so ayeke manda ye na ndö ti azo so a dü ala angbo, so lo nga kue a dü lo ngbo atene so angbo ayeke sara ka lisoro pendere mingi nga ala yeke comprendre terê nzoni mingi. Mbeni wali afa songo so ayeke na popo ti lo na mbage ti ngbo ti lo, lo tene: “E hinga ye kue na ndö ti mba.”

Nyen la asara si azo so a dü ala angbo ayeke comprendre terê pendere tongaso? Kota ye so asara si ala yeke comprendre terê tongaso ayeke ngbanga ti so lege so a leke na acellule ti ala ayeke oko, atâa so ambeni ye so ayeke nga na gunda ni ayeke ndo so ala kono dä nga fango ye so ala wara na mbage ti ababâ na mama ti ala.

GBU LI NA NDÖ TI TËNË SO: Kite ayeke dä ape so Zo so acréé e la ahinga e nzoni mingi ahon tanga ti azo kue. David atene: “Mo honde mbi na yâ ti mama ti mbi. Abio ti mbi ahonde na lê ti mo pëpe na ngoi so a sara mbi na hondengo ni. . . . Lê ti mo abâ mbi même na ngoi so mbi ngbâ gï mênë, mo sû na lê ti mbeti ti mo tënë ti ambage nde nde kue ti terê ti mbi.” (Psaume 139:13, 15, 16). Gï Nzapa oko la ahinga e nzoni mingi nga gï lo oko la lo hinga aye nde nde so asi na yâ ti gigi ti e so asara si e wara ambeni sarango ye so a hinga e na ni. Nzapa, so ahinga lege so lo leke e na ni, adë bê ti e so lo comprendre aye kue so asi na e.

David asambela lani lo tene: “Jéhovah, mo gi yâ ti bê ti mbi awe, na mo hinga mbi. Mo hinga ngoi so mbi yeke duti nga na ngoi so mbi yeke londo. Mo ngbâ yongoro kâ mo hinga apensé ti mbi. Kozo si langue ti mbi atene mbeni tënë, mo Jéhovah, mo hinga tënë ni awe.” (Psaume 139:1, 2, 4). Na ndö ni, Jéhovah ahinga nga atënë ti gbe ti bê ti e na lo “hinga aye kue so bê ti [e] aye ti sara.” (1 Chronique 28:9; 1 Samuel 16:6, 7). Aversê so afa na e nyen na ndö ti Nzapa?

Nzapa so acréé e ayeke bâ aye so e sara me nga lo hinga ngbanga ti nyen la e sara aye ni so, même si e fa na lo aye ni so kue ape na temps so e sambela lo. Na ndö ni, lo hinga anzoni ye so e ye ti sara, même si ambeni ye akanga lege na e ti sara ni. Teti so Nzapa la azia ndoye na yâ ti bê ti e, e yeke sûr so lo ye mingi ti bâ e na sarango aye so ndoye la apusu e ti sara ni.—1 Jean 4:7-10.

 Mbeti ti Nzapa adë bê ti e

• “Lê ti Jéhovah ayeke na ndö ti azo ti mbilimbili, na mê ti lo ayeke mä sambela ti ala ti voro terê na lo”.​—1 PIERRE 3:12.

• Nzapa atene: “Mbi yeke sara si mo hinga ti bâ yâ ti aye nzoni nga mbi yeke fa na mo lege so a lingbi mo mû ni. Mbi yeke mû na mo wango, na lê ti mbi ayeke gï na ndö ti mo.”​—PSAUME 32:8.

Tongana e hinga so Nzapa ayeke comprendre situation ti e nga so lo hinga atënë ti bê ti e, eskê a yeke aidé e ti gbu ngangu na yâ ti akpale? Bâ ye so asi na Anna na Nigéria. Lo tene: “Mbi tingbi lani na angangu kpale so asara si mbi hunda terê ti mbi wala eskê a yeke nzoni ti ngbâ na fini. Mbi yeke lani wali-mua, na gï mbi oko la mbi yeke bâ lege ti kete molenge ti mbi ti wali so a ngbanzi lo na hôpital, ndali ti so lo yeke na mbeni kobela so andu cerveau ti lo so a iri ni hydrocéphalie. A yeke na ngoi ni so la a wara cancer ti me na terê ti mbi, na pekoni a opéré mbi, a sara na mbi chimiothérapie nga na radiothérapie. A sara lani mbi nzoni ape ti tene mbi na molenge ti mbi kue a ngbanzi e na hôpital na même ngoi.”

Nyen la a-aidé Anna ti gbu ngangu na yâ ti kpale ni so? Lo tene: “Mbi gbu li na ndö ti aversê tongana aPhilippien 4:6, 7, so atene: ‘Fade siriri ti Nzapa so ahon ndö ti bibe kue ayeke bata bê ti ala nga na lege ti hingango ndo ti ala.’ Lakue tongana mbi pensé na versê so, mbi yeke sentir terê ti mbi nduru na Jéhovah; mbi hinga so lo comprendre mbi nzoni ahon mbi wani. Aita ti bungbi ti mbi a-encouragé lani mbi mingi.”

Lo kiri lo tene: “Atâa so akpale ti mbi ti seni ni angbâ, dutingo ti mbi na ti molenge ti mbi aga nzoni kete. Tongana akpale asi na e, e manda ti duti pëpe na asioni pensé, teti so Jéhovah ayeke dä lakue ti aidé e. Jacques 5:11 adë bê ti e, atene: ‘Azo so agbu ngangu, ala la si ayeke na ngia. Ala mä tënë ti gbungo ngangu so Job agbu na ala bâ ye so Jéhovah asara na lo na nda ni, so afa so Jéhovah ayeke tâ na ndoye mingi nga lo yeke sara nzoni bê na zo.’” Jéhovah acomprendre lani situation so Job ayeke na yâ ni. Ni la, a lingbi e hinga na bê ti e kue so lo yeke comprendre nga akpale ti e kue.