Sokolola eci catiamẽla kukamba u kasi pokati komanu vana okuti olonjamba via lisetahãla. Olonjamba vi kuete ukamba umue ulikasi. Usongui umue o tukuiwa hati Nancy Segal, o talavaya pocitumãlo ci kũlĩhĩsa olonjamba okuti, eye umue pokati kolonjamba, wa popia hati: “Ku vamue, oku citiwa olonjamba ci lomboloka oku kuata omunu umue wa ku kũlĩha ciwa, okuti ku sukila alomboluilo.” Ukãi ukuavo poku lombolola ukamba u kasi pokati kaye lanjamba yaye, wa popia hati: “Omunu lomunu pokati ketu wa kũlĩha ovina viosi viatiamẽla kukuavo.”

Momo lie olonjamba via likũlĩhĩla ciwa? Ndomo akonomuiso a lekisa, ekalo, ocitumãla kuenda ndomo va tatiwa, ci va kuatisa oku kuata ukamba waco ulikasi. Pole, olonjamba via lisetahãla vi kuete ukamba umue ulikasi momo vi kuete ombuto ya lisetahãla.

KŨLĨHĨSA: Ululiki wolombuto viaco vi komõhisa, wa tu kũlĩha ciwa okuti omunu ukuavo ci sule. Ukualosamo Daviti wa popia hati: “Ovimatamata viange viovokati ove wa vi lulika. Wa ndulika vimo lia mai. Akepa ange ka a wundile kokuove cina nda lulikiwa vuyombeki. . . . Ovaso ove a ndete eci ovimatamata vietimba liange ka via lulikiwile handi. Velivulu liove oloneke viosi via nukuiwila omo via sonehiwa osimbu ka viko handi.” (Osamo 139:13, 15, 16) Suku eye lika wa kũlĩha olombuto vietu kuenda eye lika o kuete elomboloko liovina vi pita komuenyo wetu vi situlula ekalo lietu. Ukũlĩhĩso Suku a kuete watiamẽla kokuetu kuenda kolombuto vietu, u tu kuatisa oku kolela okuti eye wa tu kũlĩha ciwa.

Daviti wa likutilila ndoco: “A Yehova, ove wa ñulĩhisa, wa ñuliha muẽle. Wa ñuliha poku tumãla lo poku votoka. Wa limbuka ovisimilo viange tunde kupãla. Ka ku li ondaka kelimi liange te ove, a Yehova, wa yi kũlĩha yosi.” (Osamo 139:1, 2, 4) Handi vali, Yehova wa kũlĩhavo utima wetu kuenda “o limbuka ovipangelo viosi viovisimilo.” (1 Asapulo 28:9; 1 Samuele 16:6, 7) Ovinimbu evi vi tu longisa nye catiamẽla ku Suku?

Ndaño okuti volohutililo vietu ka tu pondola oku lombolola ovisimĩlo vietu viosi, levi tu yeva, Ululiki wetu ka kũlĩhĩle lika ovina tu linga, pole wa kũlĩhavo esunga lieci tu ci lingila. Handi vali eye wa kũlĩha eci tu yongola oku linga ocina cimue ciwa, pole, ka tu tẽla oku ci linga omo liekambo lietu lioku lipua. Suku wa tu lulika lepondolo lioku lekisa ocisola. Omo liaco, eye o yongola oku mõla ndomo tu lekisa ocisola kovisimĩlo vietu kuenda kolonjongole vietu.—1 Yoano 4:7-10.

 Embimbiliya li tu likuminya

• “Momo ovaso a Yehova a kasi la vakuesunga kuenda ovatũi aye a yevelela apingilo avo, puãi ocipala ca Yehova ci suvuka vana va linga ovina vĩvi.”—1 PETULU 3:12.

• Suku wa likuminya ndoco: “Hu longisa, hu imbaimba onumbi yonjila wenda. Hu lungula, hu imba ovaso.”—OSAMO 32:8.

Anga hẽ oku kũlĩha okuti Suku wa kapako ekalo lietu kuenda ovisimĩlo vietu, ci tu kuatisa hẽ oku pandikisa poku liyaka lovitangi? Kũlĩhĩsa eci ca pita la Anna, wo ko Nigeria. Eye wa popia hati: “Nda kala oku liyaka locitangi cimue. Kuenje nda enda oku lipula nda ci kuete esilivilo oku amamako oku kala lomuenyo. Nda kala ocimbumba kuenda nda kala kosipitali oku tata omõlange wa kuata uveyi wo hidrocefalia (ale ovava alua vowoño). Kotembo yaco nda kuatiwavo lokanser vevele kuenda ca sukilile oku pelaliwa, oku siũliwa lomakina kuenda oku linga o radioterapia. Ka ca lelukile kokuange oku kala kosipitali osimbu omõlange a kalavo oku vela.”

Nye ca kuatisa Anna oku liyaka locitangi caco? Eye hati: “Nda enda oku sokolola kovisonehua ndeci, Va Filipoi 4:6, 7 ku popia hati: ‘Ombembua ya Suku yina ya piãla olondunge viosi, yi lava ovitima viene kuenda ovisimĩlo viene.’ Olonjanja viosi ndi sokolola kocisonehua eci, ukamba wange la Yehova u livokiya, poku ivaluka okuti eye wa ndi kũlĩha ciwa okuti ame muẽle ci sule. Vamanji valua vekongelo liange, va ñuatisa calua.

“Ndaño okuti toke cilo ñuete ocitangi coku vela, ekalo liange kuenda liomõlange lia mioñoloha. Omo okuti Yehova o kasi konele yetu, tua lilongisa oku yuvula oku kuata ovisimĩlo ka via sungulukile poku liyaka lovitangi. Elivululu lia Tiago 5:11, li tu likuminya hati: ‘Vana va pandikisa tu va tenda okuti va sumũlũha. Wa yevi epandi lia Yovi kuenda wa moli onima Yehova o wĩha, momo Yehova ukuacisola calua [ale, “ukuacikembe calua,” etosi] haeye ukuahenda.’” Yehova wa kũlĩhĩle ciwa ekalo lia Yovi kuenje tu pondolavo oku kolela okuti eye wa kũlĩha ovitangi viosi tu kasi oku liyaka lavio.