Salpuhonon ni Debata nama Hasusaanta
Hea do sahalak panurirang na margoar si Habakuk mandok songon on, “Sadia leleng on, ale Jahowa, joujou ahu, matua so ditangihon ho? Sai hualualuhon tu ho hadoboon, matua so manumpak ho?” (Habakuk 1:2, 3) Boasa ma didok ibana songon i? Na hurang do haporseaonna tu Debata? Ndang songon i. Dipapos Debata do roha ni si Habakuk, na laho salpuhononna ma sude hasusaan.—Habakuk 2:2, 3.
Tingki susa hita manang keluarganta, pintor tadok do ndang hatop Debata mangurupi hita. Hape didok di Bibel, “Ndang na lambat Jahowa pasauthon janjina, songon na nidok ni na deba. Sabar do Ibana tu hamu, ai ndang lomo rohana mago manang ise pe, alai naeng ma sude jolma marhamubaon.”—2 Petrus 3:9.
ANDIGAN DO SAUT SANGKAPNA?
Saut nama i satongkin nai! Sian dia taboto? Dipaboa Jesus, adong sada sundut (generasi) na laho mangida angka “tanda ni panutup ni jaman on”. (Mateus 24:3-42) Asing ni i, nunga godang surirang ni Jesus naung digohi. On patuduhon, ndang sadia leleng nai, saut nama sangkap ni Debata di tano on. *
Jadi, aha do na laho ulahonon ni Debata? Tingki di tano on, marhite huaso na sian Debata boi do Jesus manalpuhon hasusaan. Taida ma piga-piga contoh.
Bencana Alam: Tingki markapal Jesus dohot angka apostelna di Laut Galilea, ro ma haba-haba jala naeng lonong kapal ni nasida. Alai di tingki i, dipatudu Jesus do huaso na sian Debata laho pasohon haba-haba i. (Kolosse 1:15, 16) Holan songon on do didok Jesus, “Hus! So ma!” Boha do ujungna? “So ma alogo i jala mansai tenang ma.”—Markus 4:35-39.
Sahit: Boi do dipamalum Jesus sude angka sahit. Umpamana, dipamalum ibana do na mapitung, na lumpuh, na solpoton (ayan), na marsahit kusta, dohot angka sahit na asing. “Dipamalum do sude na marsitaonon i.”—Mateus 4:23, 24; 8:16; 11:2-5.
Haraparon: Dilehon Jahowa do huaso tu Jesus asa boi mambahen godang sipanganon marhite tanda halongangan, tarlumobi tu angka na pogos. Disurat di Bibel, dua hali ma Jesus mangalehon mangan marribu halak.—Mateus 14:14-21; 15:32-38.
Hamatean: Dilehon Jahowa do muse huaso tu Jesus laho pahehehon halak naung mate. Tingki di tano on Jesus, adong tolu halak na dipahehe ibana. Sada sian na tolu i, adong do naung opat ari mate.—Markus 5:35-42; Lukas 7:11-16; Johannes 11:3-44.
^ par. 5 Laho mamboto gumodang hatorangan taringot panutup ni jaman on, ida ma pelajaran 32 bukku Mangolu Saleleng ni Lelengna na dibahen Saksi Jahowa jala boi do didownload hamu di www.pr418.com/bbc.
Mungkin Lomo do Rohamuna Mamboto
JOUJOU PABOAHON
Holong ni Debata Mambahen Dame Roha
Angka ayat di Bibel mangurupi hita patoguhon haporseaon tu janji ni Jahowa di ari na naeng ro.
ALUS NI BIBEL
Aha do na Lao Diulahon Harajaon ni Debata?
Akka on ma na lao dinikmati hamu molo dung mamaretta Harajaon ni Debata tu tano on.
JOUJOU PABOAHON—EDISI SIPARSIAJARAN
