Ɔ ka kan Ɲanmiɛn núnnún ɲrɛnnɛn kwlaa
Be flɛ Ɲanmiɛn i sufuɛ kun kɛ Abakiki. Ɲanmiɛn klun jɔ i wun kpa. Sanngɛ ɔ seli kɛ: “?Anannganman, naan flɛlɛ nga m’an flɛ wɔ lele kɛ a wa de ye’n, a su tɛ-man min su le? ?Sa tɛtɛ nga be yo bɔ n kpan n kan n kle wɔ’n, cɛn onin ko yɛ á dé ye be nun-ɔn?” (Abakik 1:2, 3) ?Ndɛ sɔ’n kle kɛ ɔ lafiman Ɲanmiɛn su kun? Cɛcɛ. Ɲanmiɛn seli Abakiki kɛ w’a sie blɛ kun naan sɛ blɛ sɔ’n ju’n, ɔ́ núnnún ɲrɛnnɛn sa kwlaa.—Abakik 2:2, 3.
Kɛ e bɔbɔ annzɛ e sran kpa wie wun ɲrɛnnɛn’n, e kwla bu i kɛ Ɲanmiɛn cuɛncuɛn i ja ase. Afin e kunndɛ kɛ ɔ yi e su afɛ’n dɔ nga su. Sanngɛ, Biblu’n gua e awlɛn su nzue se kɛ: “Like nga e Min’n se kɛ ɔ́ yó, ɔ cuɛn-cuɛn-mɛn i ase kɛ sran’m be bu i’n sa. Sanngɛ ɔ trɛ i anwlɛn amun wun, ɔ klo-man kɛ sran kun sa mlin, ɔ klo kɛ sran’m be kwlaa be kaci be nzuɛn’n.”—2 Piɛr 3:9.
?CƐN BENIN YƐ ƝANMIƐN YÍ E SU AFƐ’N NIƆN?
Ɔ su cɛman kun mlɔnmlɔn! Zezi seli kɛ sran wie’m bé wún sa nga bé klé kɛ “mɛn’n i awieliɛ’n” w’a mantan koko’n, be wlɛ. (Matie 24:3-42) Ndɛ nga Zezi kannin’n, ɔ su kpɛn su e blɛ liɛ nga nun. I sɔ’n kle kɛ ɔ ka kan’n, Ɲanmiɛn wá yó maan e su afɛ’m bé wíe. *
?Sanngɛ wafa sɛ yɛ Ɲanmiɛn wá yí e su afɛ wafawafa kwlaa-ɔ? I nun nga Zezi o asiɛ’n su wa’n, ɔ yili i nglo kɛ Ɲanmiɛn le tinmin naan ɔ kwla yi sran’m be su afɛ’n kwlaa. Maan e fa e ɲin e sie i sa nga’m be su.
Sanvuɛsa mun: Cɛn kun’n, Zezi nin i akoto’m be fuli alie kun nun be ɔli Galile jenvie’n su. Kpɛkun aunmuan dan kpa kun fitali jenvie’n su. I ti’n, ɔ ka kan naan alie’n w’a utu. Blɛ sɔ nun’n, Zezi kleli kɛ i bɔbɔ nin i Si be le tinmin naan be kwla like kwlaa yo. (Kolɔsfuɛ Mun 1:15, 16) Zezi seli kɛ: “Yaci bolɛ’n, jran diin! Kpɛkuun kpe yɛ aunngban’n kpɛli-ɔ, naan lika’n w’a tɔ bliin.”—Mark 4:35-39.
Tukpacɛ’n: Sran’m be sieli i nzɔliɛ kɛ Zezi kwla yo aɲinsifuɛ mun, nin be nga be ja timan kpa’n, nin ngbitiɛfuɛ mun, nin kokowefuɛ mun, yɛ be nga tukpacɛ uflɛ o be wun’n, be juejue. Biblu’n se kɛ: Zezi “yoli tukpacɛfuɛ’m be kwlaa be juejue.”—Matie 4:23, 24; 8:16; 11:2-5.
Aliɛ ndɛ’n: Ɲanmiɛn fanngan nun’n, Zezi mannin sran kpanngban kpa be aliɛ be dili. Biblu’n kle kɛ Zezi yoli sɔ kpɛ nɲɔn.—Matie 14:14-21; 15:32-38.
Wie’n: Zoova fanngan nun’n, Zezi cɛnnin sran nsan. I sɔ’n kle kɛ Zoova kwla nunnun wie’n mlɔnmlɔn. Be nga Zezi cɛnnin be’n, be nun kun liɛ’n kɛ ɔ wuli’n ɔ dili cɛn ba nnan ka naan Zezi w’a cɛn i.—Mark 5:35-42; Lik 7:11-16; Zan 11:3-44.
^ ndɛ kpɔlɛ 5 Sɛ amun kunndɛ kɛ amún sí sa sɔ’n i su ndɛ wie mun ekun’n, amun nian fluwa ?Ngue like yɛ Biblu’n kle i sakpasakpa ɔ? i ndɛ tre 9 nun. Zoova i Lalofuɛ mun yɛ be yili-ɔ. A kwla kɔ e ɛntɛnɛti adrɛsi www.pr418.com/bci su ko fa wie. A su tuɛmɛn i ti sika.
Ninnge wie mɔ be kwla yo ɔ fɛ ekun'n
SASAFUƐ TRANWLƐ'N
Wafa nga Ɲanmiɛn kle kɛ e ndɛ lo i’n
Ɲanmiɛn Ndɛ’n uka e maan e lafi ninnge nga Zoova waan ɔ́ yó man e’n, be su.
KOSAN MƆ BIBLU’N TƐ BE SU’N
?Ngue yɛ Ɲanmiɛn Sielɛ’n wá yó-ɔ?
Nian like nga kɛ Ɲanmiɛn Sielɛ’n wá síe asiɛ wunmuan’n ɔ́ wá yó’n.
