“Oa Jehoava, how lang Ah haftu krai owt fi help, bot yu noh lisn? How lang Ah haftu aks fi help sayka aala di vailens rong mi, bot yu noh du notn?” (Habakkuk 1:2, 3) Habakok da-mi wahn gud man weh Gaad mi pleez wid. Wen hihn mi aks dehndeh kweschan, yu tink da bikaaz ih fayt mi week? Non ataal! Gaad mi pramis Habakok dat Hihn ga wahn set taim fi geh rid a aal sofarin.—Habakkuk 2:2, 3.

Wen yoo er sohnbadi weh yu kloas tu di sofa, ih eezi fi tink dat Gaad di tek ih oan sweet taim ahn dat ih shuda mi don step een aredi. Bot di Baibl pramis wi: “Jehoava noh wahn tek ih oan sweet taim fi mek fi hihn pramis dehn kohn chroo, laik weh som peepl tink, bot hihn payshent wid unu bikaaz ih noh waahn nobadi geh dischrai, bot ih waahn evribadi geh di chaans fi ripent.”—2 Peeta 3:9.

Veri soon! Jeezas mi seh dat wahn sertn jenarayshan wuda si spesifik tingz di hapm aal tugeda weh wuda shoa dat dehn di liv kloas tu di en a wahn “sistem a tingz.” (Machyu 24:3-42) Jeezas prafesi di kohn chroo eena fi wee taim, soh dat meenz dat Gaad soon step een. *

Bot how Gaad wahn geh rid a aal sofarin? Wen Jeezas mi deh pahn di ert, hihn shoa wi dat Gaad ga di powa fi geh rid a hyooman sofarin. Mek wi luk pahn sohn egzampl.

Nachral Dizaasta: Wen Jeezas an ih apasl dehn mi-di sayl pahn di See a Gyalilee, wahn bad staam mi-di luk fi sink dehn boat. Bot Jeezas mi shoa dat hihn an ih Faada ku kanchroal naycha. (Koloashanz 1:15, 16) Jeezas mi jos seh: “Shhh! Bee kwaiyet!” Ahn weh mi hapm? “Di breez stap, an evriting geh kaam kaam afta dat.”—Maak 4:35-39.

Siknis: Wahn lata peepl mi noa Jeezas bikaaz hihn kuda mi heel di blain ahn di kripl. Hihn mi aalso heel peepl weh sofa fits, leprosi, er eni ada kaina siknis ahn dizeez. “Hihn kyoar aala dehn.”—Machyu 4:23, 24; 8:16; 11:2-5.

Food Shaatij: Jeezas mi yooz di powa weh ih Faada giv ahn fi mek lata food owta lee bit. Too taimz di Baibl seh dat joorin ih minischri, ih mi feed towznz a peepl.—Machyu 14:14-21; 15:32-38.

Det: Di Baibl tel wi bowt chree rezorekshan weh Jeezas mi du, ahn dat shoa wi dat Jehoava ga di powa fi bring peepl bak tu laif. Wan a di peepl Jeezas mi rezorek mi ded fi foa dayz.—Maak 5:35-42; Look 7:11-16; Jan 11:3-44.