“Yehova ndo mwiji muka munguteta ungukwase mba yena kushi kwivwa? Ndo mwiji muka munguteta ngwami, upupilo! alioze yena kushi kulamwina?” (Habakuke 1:2, 3) Maliji wano kali a Habakuke, lunga mupema yoze te Zambi akuzanga. Shina chino chinasolola ngwo iye kakapwile ni ufulielo? Ka! Zambi yatakamisa Habakuke ngwo, Iye hanase tangwa lize makahwisa lamba lieswe.—Habakuke 2:2, 3.

Muze yena hanji mutu yoze wazanga chinji munumona lamba, muchihasa kupwa chashi kunyonga ngwo, Zambi kanashimbula chinji ha kuhwisa lamba, nawa ngwo kachi katamba kulihwisa haliapwila. Alioze, Mbimbiliya yinambe ngwo: “Mwene [Yehova] keshi kuvumiwa ni chilakenyo chenyi, ngwe amwe akunyonga kupwa kuvuma; alioze iye kapwa ni uhomboloji kuli yenu, se kazangile niumwe kutoka, alioze eswe alikonyeke.”—2 Petulu 3:9.

Kwasala hakehe! Yesu kasolwele ngwenyi, chimwe chisemuko te muchimona yuma yize te muyisolola ngwo, tuli ha matangwa a “kumanunuka cha miaka.” (Mateu 24:3-42) Umanunuko wa uprofeto wa Yesu ha matangwa jetu unasolola ngwo, kwasala hakehe hanga Zambi ahwise lamba lieswe hano hashi. a

Alioze kuchi Zambi makahwisa lamba? Muze Yesu apwile hano hashi, iye kasolwele ndundo ja Zambi ha kukwasa atu waze te anamono lamba. Tala yilweza yino.

Tukundukundu ni Tungonga: Muze Yesu ni tumbaji jenyi te anazawuka Kalunga-Lwiji wa ku Ngalileya, yikwiza kakundukundu munene wa fuji, nawa yaputuka kushimbamisa wato. Alioze, Yesu kasolwele ngwenyi, iye ni Tato kali ni ndundo ja kukinda kakundukundu ni tungonga. (A-Kolosu 1:15, 16) Yesu yamba wika ngwenyi: “Hwima! Hola!” Yika yalingiwile? “Mba fuji yiyihwima, yikupwa kuhola kuuluu.”—Marku 4:35-39.

Yikola: Atu te kanyingika kanawa Yesu ha lufuma wenyi wa kuuka tupuputa, yitonji, akwa-kukonya, akwa-mbumba ni misongo yeka ni yeka. Iye kawukile “waze eswe anayiji.”—Mateu 4:23, 24; 8:16; 11:2-5.

Tupunga: Yesu kazachishile ndundo jize amuhele kuli Tato hanga okese kulia. Mbimbiliya yinambe ngwo, muze Yesu apwile hano hashi kalishile tununu twa atu, kaali keswe.—Mateu 14:14-21; 15:32-38.

Kufwa: Yehova kali ni ndundo ja kuhwisa kufwa, chino chinasoloka pundu ha uhindukilo utatu uze Yesu alingile. Mukachi ka atu waze iye ahindwishile umwe te halinga kulu matangwa awana mu ufwe.—Marku 5:35-42; Luka 7:11-16; Yoano 11:3-44.