“Maw BAWIPA, zeicandah nangmah cu kaan auh lengmang lai i let loin na ka um lai? A kenkip ah zaang-ennak lawng a um ko, tiah na sinah ka au, Sihmanhsehlaw khamhnak zeihmanh na tuah hlei lo. Zeicandah ka au lengmang ko rih lai? (Habakkuk 1:2, 3) Mah bia cu Pathian mithmai ṭha a hmumi, miṭhapa Habakkuk nih a chimmi a si. Zumhnak a ngeih lo caah a chimmi a si maw? A si lo. Pathian nih Habakkuk kha sifah harnak donghter awkah caan a khiah cang ti kha a zumhter.—Habakkuk 2:2, 3.

Nangmah asiloah nangmah he aa naihmi pakhat nih harnak nan ton tikah Pathian cu a khul a nuar tuk, atu tiang zeihmanh a tuah rih lo tiah fawi tein bia nan khiah khawh men. Asinain Baibal nih hitin a ti: “Bawipa cu a biakam tlinter awkah a khul a nuar ko tiin mi a cheu nih an ruah bang hin a si lo, nanmah cung i lungsaunak a ngeih ca tu ah hin a si deuh. Zeitintiah pakhat tlau hmanh hi a duhmi a si lo i mi vialte hi sual ngaihchihnak ngei hna seh ti tu hi a duhmi a si.”—2 Peter 3:9.

A rau ti lai lo. “Chan donghnak” caan ah a um dingmi thil sining le mah thil a tong dingmi chankhat ah a nungmi hna kong kha Jesuh nih a chim. (Matthai 24:3-42) Tuchan ah Jesuh chimchungbia a tlinmi nih a rauhhlan ah Pathian nih minung kongkau a tawnghtham cang lai ti kha a langhter. *

Asinain Pathian nih sifah harnak hi zeitindah a donghter lai? Jesuh vawleicung a um lioah Pathian ṭhawnnak kha hmangin minung tonmi sifah harnak pawl kha a rak hloh. Tahchunhnak cheukhat kha zohhmanh hna u sih.

Leiser Ral: Jesuh le lamkaltu pawl Galilee Rili i lawng an i cit lioah thlichia nih an lawng kha a rak den. Asinain Jesuh nih amah le a Pa nih kokek thil an uk khawh kha a rak langhter. (Kolose 1:15, 16) Jesuh nih “hrang ti hlah,” “dai tuah” tiah a ti tikah “thli cu a dai zuahmah i rili cu dai zirziar tein a um.”—Marka 4:35-39.

Zawtnak: Jesuh cu mitcaw, kebei, tluk zawtnak, thinghmui zawtnak le zei bantuk zawtnak paoh a damter khawh tiah mi nih an hngalh. “A zawmi vialte kha a damter hna.”—Matthai 4:23, 24; 8:16; 11:2-5.

Mangṭam: Jesuh nih a Pa pekmi ṭhawnnak kha hmangin rawl tlawmte kha khuaruahhar lam in a karhter. Phungchim rian a ṭuan lioah mi thong tampi kha voihnih tiang rawl a dangh hna tiah Baibal nih a ti.—Matthai 14:14-21; 15:32-38.

Thihnak: Jehovah nih thihnak hrawh khawhnak ṭhawnnak a ngeih kha Jesuh nih a thawhtermi mi pathum nih fiang tein an langhter. A thawhtermi hna lak i pakhat cu a thihnak nili hmanh a si cang.—Marka 5:35-42; Luka 7:11-16; Johan 11:3-44.