“Iehova fe, tro ni a xëwe koi enëtilai uti hë eu, nge tha dei ni kö hnei enëtilai ; me teije koi enëtilai fë la iangazo, nge tha amelene hnei enëtilai ?” (Habakuka 1:2, 3) Celë hi trengewekë i Habakuka, atr ka loi nge hna hnim hnei Akötresie. Hapeu, kolo kö lai a hape, ka nanazije la lapaune i angeic? Ohea! Hnei Akötresie hna ahnith koi Habakuka laka, hetre ijine kö hnei Nyidrëti hna sa, matre troa apatrene la itre akötr.—Habakuka 2:2, 3.

Ame la easa akötr, maine ketre sinee së pena, canga tro hi sa mekune ka hape, hmitre palaha Akötresie, nge loi e tro Nyidrëti a canga apatrene la ngazo enehila. Ngo,Tusi Hmitrötr a ithuecatre koi së, ka hape: “Tha hmite kö [“Iehova,” MN], ngöne la hnei nyidëti hna thinge hnaean, tune la mekune ite xan, ka hape, hmit, ngo nyidëti a xomi hnine ahoeanyi nyipunie, tha ajane kö tro kete at a hnëjin, loi pe tro angat’ asëjëihë a ietra.”—2 Peteru 3:9.

Easenyi hë! Hnei Iesu hna amamane ka hape, tro la ketre xötre atr a öhne la itre hatrene ne la ijine troa nyipune la fen. (Mataio 24:3-42) Kola mama laka, eatre hë la itre hna perofetan hnei Iesu enehila, matre easenyi hë tro Akötresie a apatrene la itre akötr. *

Ngo, nemene la aqane tro Akötresie a apatrene la nöjei akötr elany? Ame lo Iesu e celë fen, hnei nyidrëti hna amamane la mene i Akötresie ngöne la nyidrëti a nyinyine la itre akötr ne la itre atr. Hanawang la itre xa hnei Iesu hna kuca.

Itre Hulö: Ame lo Iesu me itre aposetolo hune la ketre he ngöne la Hneopegejë Ne Galilaia, hna xulu la ketre janacas, nge xönë hi troa lö la he i angatr. Ame e cili, hnei Iesu hna amamane ka hape, nyidrë me Keme i nyidrë a musinëne la trengecatrene la itre ewekë hna xup. (Kolose 1:15, 16) Öni Iesu hi: “The ilu kö, humuju; ame hna pateju la eny, me haodrai atraqate pi.”—Mareko 4:35-39.

Itre Sine Mec: Ka hlemu catre Iesu, ke, hnei nyidrëti hna aloine la itre timek, me itre ka peje ca, me itre ka meci fë ön, me itre ka si lepera, me itre xa meci ju kö. Nyidrëti a “aloine la ite meci asë.”—Mataio 4:23, 24; 8:16; 11:2-5.

Itre Jiin: Hnei Iesu hna huliwane hnyawan la men hna kapa qaathene la Keme i nyidrë. Hnei nyidrëti hna ithuane la ka alanyim. Öni Tusi Hmitrötr, alua ithuane nyidrëti la itre thauzan lao atr ngöne la nyidrëti a cainöje trootro.—Mataio 14:14-21; 15:32-38.

Mec: Hetrenyi Iehova la mene nyine troa apatrene la mec, nge celë hi ka mama ngöne lo Iesu a amelene la köni atr. Ame la ketre e angatr, tre, foa ha lao drai ne meci angeic.—Mareko 5:35-42; Luka 7:11-16; Ioane 11:3-44.