Gadu o puu pina dyonson
„Kee Yehofa, on langa mi mu bali kai i fi i yeepi mi? On langa sama o du ogii anga mi, fosi i yeepi mi?” (Habakuk 1:2, 3) A Habakuk, wan man di Gadu be lobi, be taki a sani ya. A biibi Habakuk á be e biibi meke a be akisi Gadu den sani ya? Nono. Gadu be taigi Habakuk taki a o puu pina na a yuu di a poti.—Habakuk 2:2, 3.
Te wi e pina efuso te wan famii fu wi e pina, da wi e si enke Gadu e daaidaai fu yeepi u. Wi e wani a yeepi u wanten. Ma Beibel taki: „Yehofa nai daaidaai fu du san a paamisi, ma a abi pasensi anga u, bika a á wani nawan sama dede. A wani ala sama fende a okasi fu tapu anga den sondu fu den.”—2 Peitilisi 3:9.
ON TEN GADU O PUU PINA?
A á langa moo! Yesesi be taki wan kulu sama be o si wantu maiki di be o soi taki den „lasiti dei fu goontapu” doo (Mateyesi 24:3-42). A polofeititoli di Yesesi be taki ya kon tuu aini a ten fu u ya. A sani ya e soi taki a ná o teke langa moo fu Gadu yeepi libisama. *
Fa Gadu o puu pina gi libisama? Den sani di Yesesi be du di a be de a goontapu e soi taki Gadu abi a makiti fu puu pina gi libisama. Meke u luku wantu sani di a be du.
Gaan winta: Wan leisi di Yesesi anga den bakaman fi en be de aini a Se fu Galileya, wan gaan winta be e wai fu sungu a boto fu den. Ma Yesesi soi taki en anga en Dda abi a makiti fu koo gaan winta (Kolosesama 1:15, 16). Di Yesesi taki: „Kaba! Tan pii!”, „Neen a winta á wai moo. Ala a peesi koo pii”.—Malikisi 4:35-39.
Siki: Sama be sabi Yesesi enke a man di be e deesi sama di beendi, sama di lan, sama di be abi pikinnengee-siki, sama di be kokobe anga taa sowtu siki. „A be e deesi ala sowtu siki.”—Mateyesi 4:23, 24; 8:16; 11:2-5.
Nyanyan angii: Yesesi be koboloiki a makiti di en Dda be gi en fu meke pikinso nyanyan kon toon tyaipi nyanyan. Beibel e taki fu tu leisi di Yesesi be gi omen dunsu sama nyanyan di a be de a goontapu.—Mateyesi 14:14-21; 15:32-38.
Dede: Di Yesesi be de a goontapu, a dii leisi a weki dede sama. A sani ya e soi taki Yehofa abi makiti fu weki den sama di dede. Wan fu den sama di Yesesi be weki be dede fo dei kaba.—Malikisi 5:35-42; Lukasi 7:11-16; Yohanisi 11:3-44.
^ paragraaf 5 Efi i wani sabi moo fu den lasiti dei, luku toli 32 fu a I sa piisii fu teego! buku. A Yehofa Kotoigi meke en. I sa download en teke a www.pr418.com/djk. I ná abi fu pai.
You May Also Like
A WAKITITOLEN
Den wini di yu o fende fu di Gadu e booko en ede anga i
Beibel e yeepi u fu biibi den sani di Gadu paamisi taki a o du gi u aini a ten di e kon.
