“A Yehova, na bele̱ nde wa nate̱na njik’etum, nde o senge e? Na takedi wa ońola njo, nde o s’ongwan.” (Habakuk 1:2, 3) Ben byala be nde ba Habakuk, mot’a bwam, nu ta nu do̱lisane̱ Loba. Mo̱ muka mao mu malee̱le̱ nde si be̱ne̱ la dube̱ e? Tomtom! Loba a boli Habakuk mbaki ná a te̱se̱ ponda a me̱nde̱no̱ bo̱le̱ take.​—Habakuk 2:2, 3.

Niponda wame̱ne̱ to̱ moto ńe wa batabata eno̱ o taka, e bo̱bi o pomane̱ kwala ná Loba e muńo̱ngo̱, e ta yangame̱n be̱ ná o nin ponda ke̱ a máwana jongwane̱. Nde Bibe̱l e mabola biso̱ mbaki ná: “Sango [Yehova] a titi muńo̱ngo̱ o londe̱ dikaki lao, kana dongo ba mo̱nge̱le̱no̱ ná e muńo̱ngo̱; nde a be̱nedi nde bińo̱ we̱lisane̱, ebanja a si mapula ná dongo ba bumbe, nde ná be̱se̱ bate̱le̱.”​—2 Petro 3:9.

Son a ponda! Yesu a bīse̱ ná ńo̱ṅo̱n po̱ tobotobo e me̱nde̱ be̱ mboṅ a mambo ma longi mpo̱m m’eyemban e malee̱le̱ ná jā nde o mińa misukan ma “su la wase.” (Mateo 24:3-42) Kana y’eding’a Yesu yeno̱ nde o londa o min mińa masu nika e malee̱ ná Loba a mala wana su la yen ebe̱yed’a mambo son a ponda. *

Nde ne̱ni Loba a me̱nde̱no̱ bo̱le̱ take ńe̱se̱ e? Ponda Yesu a tano̱ o wase, a lee̱le̱ ná Loba a be̱n ngińa o wamse̱ take ńa mbel’a moto. Jombweye byembilan bō̱.

A domedi ngo̱: Niponda Yesu na bokwedi bao ba tano̱ ba kata Munja ma Galilea, ngo̱ a mùdi ninde̱ne̱ e ta ńunga, e pula lo̱ise̱ bo̱lo̱. Nde Yesu a lee̱le̱ ná bā na Sango ba be̱n ngińa omo̱ń a mambo me̱se̱ ma wekabe̱. (Kolose 1:15, 16) Yesu a kwali nde buka te̱ ná: “Ko̱ na pī, be̱ na sao!” Nje e bolan e? “Na ngo̱ e wo̱ye̱, na mbo̱le̱ ninde̱ne̱ e ko̱.”​—Marko 4:35-39.

Maboa: E ta e biane̱ ná Yesu a be̱n ngińa o bo̱lise̱ bandima, bam’boko, baboe̱ mudo̱ngi na bamulo̱ngo̱, na ńai a sese ye̱se̱. “A bo̱lise̱ . . . baboedi be̱se̱.”​—Mateo 4:23, 24; 8:16; 11:2-5.

Njai ninde̱ne̱: Yesu a bolane̱ ngińa Sango a bolino̱ mo̱ o to̱nde̱le̱ son a da. Bibe̱l e makwala ná a dese̱ lokoli la bato ngedi iba ponda a tano̱ o wase.​—Mateo 14:14-21; 15:32-38.

Kwedi: Yehova a be̱n ngińa o bo̱le̱ kwedi, nika ńe̱ne̱ne̱ o bepumbwedi belalo Bibe̱l e makwalano̱ ná Yesu a boli. Moto mō̱ ńa ba bena Yesu a pumbwe̱le̱no̱ a ta a máwo̱ mińa mine̱i.​—Marko 5:35-42; Lukas 7:11-16; Yohane 11:3-44.