“O Jehovah, adan̄a didie ke nditua nyom un̄wam, ndien afo ukopke? Adan̄a didie ke ndiseme n̄kot fi nyom un̄wam man mbọhọ afai, ndien afo unyan̄ake?” (Habakkuk 1:​2, 3) Habakkuk emi ekedide prọfet Abasi okobụp Abasi mme mbụme emi. Ndi mbụme esie emi owụt ke enye ikenyeneke mbuọtidem? Iwụtke. Abasi ama ọdọn̄ Habakkuk esịt onyụn̄ anam enye ọdiọn̄ọ ke imọ imenịm ini emi idinamde ufen etre.​—Habakkuk 2:​2, 3.

Ke ini nnyịn m̀mê owo nnyịn ọbọde ufen, esitie nnyịn nte ke Abasi ebịghi akaha ndinam ufen etre, ke akpana enye anam ufen itre idahaoro idahaoro. Edi Bible ọdọhọ ke “Jehovah inuọnke ke ndinam un̄wọn̄ọ esie, nte ndusụk owo ẹkerede ke enye ọnuọn, edi enye akam enyene ime ye [nnyịn] koro enye mîyomke baba owo kiet atak edi oyom kpukpru owo ẹkabade esịt.”​—2 Peter 3:9.

Ata esisịt ini ayak! Jesus ọkọdọhọ ke enyene emana emi mîdibehe ifep tutu mmọ ẹkụt kpukpru se iditịbede ke mme akpatre usen “editịm n̄kpọ emi.” (Matthew 24:​3-42) Prọfesi oro Jesus eketịn̄de aban̄a eyo nnyịn emi ke osu, ndien oro owụt ke Abasi ọmọn̄ ọsọsọp anam ufen etre ke isọn̄ emi. *

Edi Abasi edinam didie inam kpukpru ufen etre? Ke ini Jesus okodude ke isọn̄, enye ama owụt ke Abasi enyene odudu ndinam ufen etre. Yak ineme ndusụk se Jesus akanamde.

Mme Oto-obot Afanikọn̄: Ke ini Jesus ye mme mbet esie ẹkewatde ke ubom ẹbe Inyan̄ Galilee, ata akamba oyobio ama ọwọrọ onyụn̄ anam ubom mmọ ekpere ndisịp. Edi Jesus ama anam n̄kpọ emi okowụtde ke imọ ye Ete imọ imekeme nditre oto-obot afanikọn̄ ekededi. (Colossae 1:​15, 16) Jesus ama ọdọhọ ete: “Dobo! Na sụn̄!” Nso iketịbe? “Ofụm [ama] odobo, akwa ndobo onyụn̄ odu.”​—Mark 4:​35-39.

Udọn̄ọ: Mme owo ẹma ẹdiọn̄ọ ke Jesus enyene odudu ndikọk nnan, mbụn̄ọ, ndisi, akpamfia, ye kpukpru orụk udọn̄ọ. Enye ama “ọkọk kpukpru mbon emi idem mîsọn̄ke.”​—Matthew 4:​23, 24; 8:16; 11:​2-5.

Akan̄: Jesus ama ada odudu oro Ete esie ọkọnọde enye anam ekpri udia awak ekem ata ediwak owo. Bible ọdọhọ ke enye ama ọnọ ediwak tọsịn owo udia ikaba ke ini enye okodude ke isọn̄.​—Matthew 14:​14-21; 15:​32-38.

N̄kpa: Owo ita oro Jesus akanamde ẹset owụt ke Jehovah enyene odudu ndinam mme akpan̄kpa ẹset. Kiet ke otu mbon emi enye akanamde ẹset ama akpa ofụri usen inan̄.​—Mark 5:​35-42; Luke 7:​11-16; John 11:​3-44.