“Iehova, e na maanra tangiu ni kani buokaki ma ko aki ongo? E na maanra au bubutii bwa ko na kamaiuai man te iowawa, ma ko aki karaoa te bwai teuana?” (Abakuka 1:2, 3) Aikai ana taeka Abakuka ae te aomata ae raoiroi ao n akoaki iroun te Atua. Te koaua bwa e karako ana onimaki ngkai e bubutii? E aki! E karaua nanon Abakuka te Atua bwa e a tia ni bairea te tai are e na kamauna iai te rawawata.—Abakuka 2:2, 3.

Ngkana ko rawawata ke temanna ae tangiraki iroum, e kai rio iangoan ae e baenikai te Atua, bwa e riai ni kaman tia ni karaoa te bwai teuana. Ma e karaui nanora te Baibara ni kangai: “E aki baenikai Iehova ni kaineti ma ana berita n aron ae a iangoia tabemwaang bwa e baenikai, ma e taotaona nanona nakoimi, ibukina bwa e aki tangira kamaunaan temanna ma e tangiriia aomata nako bwa a na rairi nanoia.”—2 Betero 3:9.

E a rangi ni kaan! E kaotia Iesu bwa iai te roro teuana ae e na nora te kanikina ae mwaiti kanoana ake a na kaota kabaneani bongin “te waaki ae ngkai i aon te aba.” (Mataio 24:3-42) Kakororaoan ana taetae ni burabeti Iesu n ara bong aikai, e oti iai bwa e nang karaoa te bwai teuana te Atua nakon aia waaki aomata. *

Ma e na kangaa te Atua ni kamauna te rawawata ni kabane? Ni menan Iesu n te aonnaba ao e kaotiota mwaakan te Atua ni kabebeteia aomata. Iangoi katoto tabeua.

Kabuanibwai Aika Karina: N aia tai n ieie n Namani Kariraia Iesu ao ana abotoro, ao e a korakora te angibuaka ike e nang iinako iai aia booti. Ma e kaotia Iesu bwa ngaia ma Tamana, a kona n taua aron te ang ao te karau. (I-Korote 1:15, 16) E kangai Iesu: “Raoi! Tai Karongoa!” Tera ae riki? “E a toki naba karen te ang, ao e a bung te ariki.”—Mareko 4:35-39.

Te Aoraki: E rangi n ataaki Iesu ibukin ana konabwai ni kamarurunga ae mataki ao ae mwauku, n ikotaki naba ma naake a kakaatikitiki, a rebera, ao aeka n aoraki nako. “E kamarurungia ake a karawawataaki ni kabane.”—Mataio 4:23, 24; 8:16; 11:2-5.

Taren te Amwarake: E kabonganai mwaakana Iesu ake e anganna Tamana ni kamwaiti iai amwarake ake a aki tau. E taekinaki n te Baibara bwa uatai ana tai ni kaamwarakeia aomata aika iranga, n ana tai ni mwakuri ni minita.—Mataio 14:14-21; 15:32-38.

Te Mate: E oti mwaakan Iehova ni kona ni kauta te mate mani kautiuti ake tenua ake e karaoi Iesu. Temanna i buakoia naake e kautiia man te mate, e mate i nanon abong.—Mareko 5:35-42; Ruka 7:11-16; Ioane 11:3-44.