«Jeʼwaakalee, ¿jeʼratuainjachikai maʼin taya achuntuin kaalinwaa pümüin sümaa nnojoluin paapajüin tanüiki? ¿Jamüshi nnojoika pusoutüin tamüin jee pajaʼttirüin na mojulaashiikana?» (Habacuc 1:2, 3). Tüü nünüiki wanee wayuu anakai akuwaʼipa noʼuluʼu Maleiwa, Habacuc nünülia. ¿Nünüikiche tia süka manoulain nia? Nnojorüleejaʼa, nüküjainjeseʼe Maleiwa nümüin Habacuc kettaain nutuma tü kaʼi najaʼttirajatkalü oʼu tü müliaakat (Habacuc 2:2, 3).

Müliale pia jee niale müliain wanee kasa pünain, eesüjaʼa jülüjale paaʼin kakaliain maʼin chi Maleiwakai süpüla najaʼttirüin tü müliakalü atuma pia. Saashin tü Wiwüliakat, nnojoishi Maleiwa kakaliain süpüla ekeraajaa tü nümakat. Aʼatapajüshi nia süka nnojolin nücheküin outuin wayuu, keeʼireesü naaʼin shiyaawajaain wayuu süpüshuaʼa suulia saainjala (2 Pedro 3:9, TNM).

Najaʼttireerü soʼu palitchon kaʼi. Nüküjain Jesuu sülatajatüin wainma kasa wayaawatüinjatka anainjee sülüʼülüin sükalia sajaʼttüinjatka oʼu kasaka süpüshuaʼa. Naashin Jesuu, nayeena eʼrakana tia na wayuu eejeenakana suʼunnaa sülatüin tia (Mateo 24:3-42). Ekeraajüsü tia maaʼutpünaa, müsüjeseʼe watüjaain saaʼu sülüʼütshaanain sükalia süpüla najaʼttirüin Maleiwa tü kasa mojusükat. *

¿Eesüche süpüla najaʼttirüin Maleiwa tü müliaakat? Jamüsaʼa shia, watüjaa aaʼu tia sünainjee tü kasa naaʼinrakat Jesuu wanaa sümaa yaajachin nia saaʼu tü Mmakat. Wekirajaa süchiki waneirua kasa naaʼinraka Jesuu.

Süsetüle wüin, sukutkujaale mma jee eere wawai. Soʼu wanee kaʼi, anuwaluʼushi Jesuu namaa na nikirajüinkana shiroku tü palaa chajatkat Galilea, eejaaka wanee wawai katsüinsü maʼin jee apoolijaweesü tü anuwakat namaa. Niiʼiyatüin Jesuu sükajee tü naaʼinrakat nnojoluin isain nüchiki jee nüchiki chi Nüshikai neimaleʼerüin wanee wawai jee nataʼülüin wüin eekai süseteein (Colosas 1:15, 16). Müshi neʼe sümüin tü wawaikat: «¡Yüüta pia! ¡Piimalaa!». Shiimalaaka tü wawaikat jee tü palaakat (Marcos 4:35-39, TNM).

Tü ayuuliikat. Watta saalii wayuu atüjaaka saaʼu eein süpüla niiyajüin Jesuu wayuu eekai moʼupaʼain, eekai masaʼain, eekai sajaʼttüin süta, eekai suʼuchichajaain jee tü kanainkat waneirua ayuulii. Saashin tü Wiwüliakat, «niiyajüin tü ayuuisükalüirua süpüshua» (Mateo 4:23, 24; 8:16; 11:2-5).

Tü jamükat. Piantua naaʼinrüin Jesuu kasa pülasü süpüla kojuyajaain eküülü nutuma süpüla nikirüin watta saalii wayuu. Naaʼinrüin tia sükajee nüpülain Maleiwa (Mateo 14:14-21; 15:32-38).

Tü outaakat. Soʼu yaajachin Jesuu saaʼu tü Mmakat, apünüinsü wayuu nüsoʼireʼeraka aaʼin. Eejachi wanee nüsoʼireʼeraka aaʼin pienchi kaʼi süchikijee outaa. Tü naaʼinrakat Jesuu shiiʼiyatüin eein süpüla nüsoʼireʼerüin Jeʼwaa saaʼin wayuu (Marcos 5:35-42; Lucas 7:11-16; Juan 11:3-44).