Aranni Ngana Alsan na Dios i Pazziga-riga
“Kunnasi kabayag, O Jehova, nga mappoffun ngà, ngem ari ka magginna? Kunnasi kabayag ngà mappakurag megafu ta kinavayolente, ngem awan tu kuammu?” (Habakuk 1:2, 3) Yatun i kinagi ni Habakuk, masippo nga tolay nga egga sa i fabor na Dios. Kawan kari na pangurug yatun nga pakimemallona? Ari vuluvuga! Nipasiguradu na Dios kani Habakuk nga egga i natunno nga tiempo nga alsanna i pazziga-riga.—Habakuk 2:2, 3.
Nu mazziga-riga ka onu i tadday nga madukko nikaw, mabi nonopan nga mabibbinnay i Dios, anna egga ngana nakuan i kingnguana. Ngem nipasiguradu nittam na Biblia: “Ari nga mattalattan i Yafu ta pangngua na ta nitabba na, ta kunna pagabbo na karuan nga totolay. Pasa-pasensian nakamu lallagu ta arian na nga ikaya tu egga i madaral, ngem ikaya na tu pallikuran na ngamin nga totolay i katagaruliad-da.”—2 Pedro 3:9.
SONU ANNI NGA KUAN YATUN NA DIOS?
Aranni ngana! Kinagi ni Jesus nga egga partikular nga henerasion nga makasingan ta nadduruma nga mesissimmu nga seniales na pangurianan ira nga aggaw na sistema na ganna-gannug. (Mateo 24:3-42) Ipasingan na ketuppal na profesiya ni Jesus ta kaggawattam nga aranni ngana i pangitunung na Dios ta kukukuan na totolay. *
Ngem kunnasi nga alsan na Dios i ngamin nga pazziga-riga? Ta kegga ni Jesus ta davvun, nipasinganna i pakapangngua na Dios tapenu mapakarianan i ziga-riga na totolay. Ikonsidera i karuan nga angngarigan.
Natural nga Kalamidad: Ta paddaki ni Jesus anna na apostolesna ta Bebay na Galilea, maggi lummag i barangayda megafu ta bayabbag. Ngem nipasingan ni Jesus nga makontrolda na Yamana i natural ira nga elemento. (Colosas 1:15, 16) Kunna laman ni Jesus: “Magimmang ka!” Anni resultana? “Nagimmang i paddag anna nakkalma i palung.”—Marcos 4:35-39.
Taki: Madumu-dumug si Jesus ta abilidadna nga pammapian i vuling anna i pilay, maski danuri ma-epilepsy, mallepproso, onu egga pakkafian na baggida. “Pinammapia na gapa ngamin i makkataki.”—Mateo 4:23, 24; 8:16; 11:2-5.
Pakkurang na Makan: Inusa ni Jesus i pakapangngua nga niyawa sa na Yamana tapenu mapakaru i baddi nga makan. Nerekord nga mamiddua ta ministeriona nga pinakanna i rinivu.—Mateo 14:14-21; 15:32-38.
Patay: Manawag nga ipasingan na tallu nga nerekord na pamaginnolay ni Jesus nga egga pakapangngua ni Jehova nga pawanan i patay. Appa aggaw ngana nga natay i tadday tari ta pinaginnolena.—Marcos 5:35-42; Lucas 7:11-16; Juan 11:3-44.
^ par. 5 Para ta mas aru nga informasion meyannung ta pangurianan ira nga aggaw, innan i leksion 32 na libru nga Magayayya nga Mattolay tu Mannanayun! nga nipublisa na Saksi ira ni Jehova anna libre nga me-download ta www.pr418.com/ibg.
Baka Kaya Mu Gapa i
PASSIFUSIFUTAN
Nu Kunnasi Ka Mabenefisiowan ta Pangikavurung na Dios
Uffunan ittam na Biblia nga mapeggan tu pangurug ta promesa ira na Dios ta makasta nga mappange.
