“Kasano kabayag nga agpatulongak, O Jehova, ngem saanka a dumngeg? Kasano kabayag nga agpatulongak gapu iti kinaranggas, ngem saanka a makibiang?” (Habakuk 1:2, 3) Imbaga dayta ti naimbag a tao a ni Habakuk nga inanamongan ti Dios. Ipakita kadi ti pakaasina a kurang ti pammatina? Saan a pulos! Impasigurado ti Dios ken Habakuk nga addanto tiempo a pagpatinggaenna ti panagsagaba.​—Habakuk 2:2, 3.

No agsagsagabaka wenno ti maysa a nadekket kenka, baka maibagam a nagbayag nga agtignay ti Dios, nga idi pay koma a nagtignay. Ngem ipasigurado ti Biblia: “Saan nga itantan ni Jehova a tungpalen ti karina, kas ipagarup ti dadduma a tattao. Ngem an-anusannakayo ta saanna a kayat a madadael ti asinoman no di ket kayatna nga agbabawi ti amin.”​—2 Pedro 3:9.

Nakaas-asidegen! Impakaammo ni Jesus nga adda espesipiko a henerasion a makakita kadagiti naidumduma a kasasaad kas tanda ti maudi nga al-aldaw daytoy a “sistema ti bambanag.” (Mateo 24:3-42) Ipakita ti pannakatungpal ti padto ni Jesus iti kaaldawantayo nga asidegen a bumallaet ti Dios kadagiti dakes a mapaspasamak iti tao. *

Ngem kasano a pagpatinggaen ti Dios ti amin a panagsagaba? Idi adda ni Jesus ditoy daga, impakitana ti pannakabalin ti Dios a mangbang-ar kadagiti tattao nga agsagsagaba. Kitaentayo ti dadduma a pagarigan.

Natural a Didigra: Bayat nga aglaylayag ni Jesus ken dagiti apostolna iti Baybay ti Galilea, adda napigsa a bagyo a mabalin a mangpalned iti bangkada. Ngem impakita ni Jesus a kabaelanda ken Amana a kontrolen dagiti puersa ti nakaparsuaan. (Colosas 1:15, 16) Kinuna laeng ni Jesus: “Agsardengka! Agtalnaka!” Ti resultana? “Nagsardeng ti angin ken limminak.”​—Marcos 4:35-39.

Sakit: Pagaammo ni Jesus gapu iti pannakabalinna a mangpaimbag iti bulsek ken pilay, kasta met dagiti agkissiw, agkukutel, wenno dadduma pay. “Pinaimbagna amin a masakit.”​—Mateo 4:23, 24; 8:16; 11:2-5.

Bisin: Inusar ni Jesus ti pannakabalin nga inted ti Amana a mangpaadu iti bassit laeng a makan. Ibaga ti Biblia a namindua a pinakanna ti rinibu bayat ti ministeriona.​—Mateo 14:14-21; 15:32-38.

Ipapatay: Nalawag nga ipakita ti tallo a panangpagungar nga inaramid ni Jesus nga adda pannakabalin ni Jehova a mangikkat iti ipapatay. Ti maysa kadagiti pinagungar ni Jesus ket uppat nga aldawen a natay.​—Marcos 5:35-42; Lucas 7:11-16; Juan 11:3-44.