Ọghẹnẹ O ti Si Uye-Oruẹ Kpobi No Otọ Kẹle
“O ỌNOWO, ẹvẹ me re bo ubo obọufihọ se owhẹ krite, nọ owhẹ ore yo ho? Hayo bo se owhẹ nọ ‘Oja yo,’ no who re siwẹ hẹ?” (Habakuk 1:2, 3) Nọ enọ nọ ọruẹaro nọ a re se Habakuk ọ nọ Ọghẹnẹ. Kọ onana u dhesẹ nọ o wo ẹrọwọ họ? O rrọ ere vievie he. Ọghẹnẹ ọ ta kẹ Habakuk nọ o wo oke nọ o fihọ nọ o ti ro si uye-oruẹ no otọ.—Habakuk 2:2, 3.
Nọ uye o tẹ be bẹ omai hayo oyoyou mai jọ, o lọhọ re ma ku ei họ nọ Ọghẹnẹ ọ be kpẹlẹ obọ, o gbẹ rrọ ere he, ọ hai ti ru oware jọ no. Ghele na, Ebaibol na ọ ta kẹ omai nọ: “Jihova ọ be kpẹlẹ obọ evaọ erugba eyaa riẹ hẹ, wọhọ epanọ ahwo jọ a bi roro, rekọ o bi wo odiri kẹ owhai keme ọ gwọlọ nọ a raha ohwo ọvo ho rekọ ọ gwọlọ nọ ahwo kpobi a wo uvẹ nọ a re ro kurẹriẹ.”—2 Pita 3:9.
OKE VẸ ỌGHẸNẸ Ọ TE RỌ JOWỌ?
Ọ te jowọ kẹle! Jesu ọ fodẹ eware sa-sa nọ e te via evaọ oge jọ. Eware nana i ti kpoka họ urere “uyero-akpọ na.” (Matiu 24:3-42) Eware kpobi nọ Jesu ọ fodẹ na i bi rugba evaọ oke mai na. Onana u dhesẹ nọ Ọghẹnẹ ọ te jowọ kẹle re ahwo-akpọ a wo ufuoma. *
Rekọ ẹvẹ Ọghẹnẹ ọ te sai ro si uye-oruẹ no otọ? Nọ Jesu ọ jọ otọakpọ, o dhesẹ nọ Ọghẹnẹ o wo ogaga nọ ọ sai ro ku uye-oruẹ họ. Joma ta kpahe iriruo jọ.
Okpẹtu nọ A r’Obọ So Ho: Nọ Jesu avọ ikọ riẹ a jẹ fa Abade Galili vrẹ, okpofou ọgaga o te muhọ efou, yọ o ga te epanọ okọ na o rọ gwọlọ zue. Jesu o dhesẹ nọ tei te Ọsẹ riẹ a wo ogaga nọ a sae rọ kpọ ofou gbe ẹkporo. (Ahwo Kọlọsi 1:15, 16) Ẹme nọ Jesu ọ ta kpobi họ: “Seba! Fọ!” Kọ eme ọ via? “Ofou na o te serihọ, oria kpobi o tẹ fọ rirẹ.”—Mak 4:35-39.
Ẹyao: Ahwo kpobi a riẹ nọ Jesu o wo ogaga nọ ọ sai ro siwi enọ i tuaro gbe enọ e ko, makọ enọ i re kie ewawa, enọ e rẹ mọ oti gbe oghẹrẹ eyao efa kpobi. Jesu o “siwi enọ e jẹ mọ kpobi.”—Matiu 4:23, 24; 8:16; 11:2-5.
Ohọo: Jesu ọ rọ ogaga nọ Ọghẹnẹ ọ kẹ riẹ ru emu nọ o tulo ho vihọ. Evaọ etoke usiuwoma ota riẹ, isiava soso ọ ko idu ahwo buobu.—Matiu 14:14-21; 15:32-38.
Uwhu: Jesu ọ kpare imasa soso nọ i whu no ze evaọ okenọ ọ jọ otọakpọ. Onana u dhesẹ nọ Jihova o wo ogaga nọ ọ sai ro si uwhu no otọ. Omọvo jọ nọ Jesu ọ tubẹ kpare ze dede o whu te edẹ ene no.—Mak 5:35-42; Luk 7:11-16; Jọn 11:3-44.
^ edhe-ẹme 5 Re whọ gbẹ riẹ kpahe edẹ urere na, se uwuhrẹ avọ 32 ọrọ obe na Reawere Uzuazọ Bẹdẹ Bẹdẹ! onọ Isẹri Jihova a kere. Whọ sae danlodu riẹ ọvọvẹ evaọ www.pr418.com/iso.
Enana E Sae jẹ Were Owhẹ
UWOU-ERORO NA
Ọghẹnẹ Ọ be Daezọ Ra
Ebaibol na o re fiobọhọ kẹ omai wo ẹrọwọ ọgaga je fievahọ eyaa nọ Ọghẹnẹ ọ yaa kẹ omai kpahe obaro na.
ENỌ NỌ EBAIBOL Ọ KẸ IYO RAI
Eme Uvie Ọghẹnẹ U ti Ru?
Riẹ eware nọ ma bi rẹro rai evaọ oke nọ Uvie Ọghẹnẹ u ti su akpọ na.
