O Mĩtũkĩ Ngai Akavetanga Mathĩna Onthe
“Ame Yeova, ngaĩa ĩvinda yĩana ata, naku ndũkwenda kwĩwʼa? Nĩngũkwĩkaĩla ũndũ wa ũngʼendu wĩ kwʼo, na ndũkwenda kũtangĩĩa.” (Avakuki 1:2, 3) Ndeto isu syaneeniwe nĩ Avakuki, mũndũũme mũseo ũla wamwendeeasya Ngai. Syo ndeto syake syĩonanyʼa kana ndaĩ na mũĩkĩĩo? Ti wʼo o na vanini! Ngai nĩwamũĩkĩĩthisye Avakuki kana nĩwatwʼĩte ĩvinda yĩla ũkamina ũthũku kana mathĩna.—Avakuki 2:2, 3.
Ĩla ũũthĩna kana mũnyanyau ũkũthĩna, nĩ laisi kwasya kana Ngai ndeenda kũmina thĩna ũsu na mĩtũkĩ nũndũ wĩona aĩle kwĩthĩwa alikĩlĩĩle na kũveta thĩna ũla wĩ vo. Ĩndĩ Mbivilia ĩtũĩkĩĩthasya kana “Mwĩaĩi nde kĩkono ũndũ wa kwĩanĩsya watho wake, tondũ amwe matalaa kĩkono; ĩndĩ nũnũkũmĩĩsya ũndũ wenyu, atekwenda ũmwe o na wĩva ae, ĩndĩ endaa onthe mavikĩe ũalyũlonĩ wa ngoo.”—2 Vetelo 3:9.
NGAI AKOOSA ĨTAMBYA ĨNDĨĨ?
O mĩtũkĩ Ngai nũkwosa ĩtambya ya kũmina mathĩna! Yesũ nĩwawetie kana ũsyao mũna ũkoona mawonanyʼo ala makonanyʼa kana twĩ mĩthenyanĩ ya mũminũkĩlyo wa “ĩvinda yĩĩ.” (Mathayo 24:3-42) Kwĩanĩa kwa wathani wa Yesũ ĩvindanĩ yĩĩ kwĩonanyʼa kana o mĩtũkĩ Ngai akilyĩ analikĩlĩĩla maũndũ ma andũ. a
Ĩndĩ Ngai akatũmĩa nzĩa yĩva kũmina mathĩna onthe? Yĩla Yesũ waĩ vaa ĩũlũ wa nthĩ, nĩwoonanisye ũtonyi wa Ngai wa kũmina mathĩna ma andũ. Kwasũanĩa ngelekanyʼo ii.
Mĩisyo: Yĩla Yesũ na amanyĩwʼa make maĩ Ũkanganĩ wa Kalilii, nĩkweethĩiwe na kĩuutani kĩnene kya kĩseve kĩla kyesaa kũtuma ngalawa ĩlika kĩwʼũnĩ. Ĩndĩ Yesũ nĩwoonanisye kana e na Ĩthe wake me na ũtonyi wa kũsiĩĩa syĩndũ ta iuutani isu. (Akolosai 1:15, 16) Yesũ aisye, “Usya, kilya. Na kĩseve kyausya, na kwaya ũuu mũnene.”—Maliko 4:35-39.
Mowau: Yesũ nĩweesĩkĩe nesa nũndũ wa ũtonyi ũla waĩ nawʼo wa kũvosya ililinda, na syonze, o vamwe na ala maĩ na ũwau wa mangũ, mũngʼathũko, na mowau angĩ maingĩ. ‘Nĩwavoasya onthe ala maĩ awau.’—Mathayo 4:23, 24; 8:16; 11:2-5.
Mayũa: Yesũ nĩwatũmĩie ũtonyi ũla wanengetwe nĩ Ĩthe wake atuma lĩu waĩ mũnini wingĩva. Mbivilia yaĩtye kana mavinda elĩ e ũtavanyʼanĩ wake, nĩwaĩthisye andũ ngili mbingĩ.—Mathayo 14:14-21; 15:32-38.
Kĩkwʼũ: Ũtonyi wa Yeova wa kũmina kĩkwʼũ wonanĩtwʼe nesa ngewanĩ ila ieleetye Yesũ aithayũũkya andũ atatũ maĩ akwʼũ. Ũmwe wa andũ asu mathayũũkiwʼe aminĩte mĩthenya ĩna e mũkwʼũ.—Maliko 5:35-42; Luka 7:11-16; Yoana 11:3-44.
a Nĩ kana ũkwate ũvoo mwingangĩ ĩũlũ wa mĩthenya ya mũminũkĩlyo, sisya ĩsomo ya 32 ĩvukunĩ Tanĩa Thayũ Tene na Tene!, yĩla yumĩthĩtwʼe nĩ Ngũsĩ sya Yeova. O na no ũyĩkwate vate ndĩvi nthĩnĩ wa www.pr418.com/kam.
No Wendeewʼe Nĩ Ii
MŨSYAĨĨSYA
Kũmanya Kana Ngai Nũtũsũvĩaa Kũtonya Kũtũtethya Ata?
Maandĩko nĩmatũtetheeasya kwĩthĩwa na mũĩkĩĩo mũlũmu nthĩnĩ wa mawatho ma Ngai ma ĩvinda yũkĩte.
MOSŨNGĨO MA MAKŨLYO MA MBIVILIA
Ũsumbĩ wa Ngai Ũkeanĩsya Kyaũ?
Ĩmanyĩsye maũndũ ala ũsumbĩ wa Ngai ũkeka wasumbĩka nthĩ.
MŨSYAĨĨSYA (ĨKASETI YA KWĨMANYĨSYA)
