قۇداي بار قايعى-قاسىرەتتى توقتاتادى
«ۋا، ەحوبا، قاشانعى كومەك سۇرايمىن، ال سەن قۇلاق سالار ەمەسسىڭ؟ قاشانعى زورلىق-زومبىلىقتان قورعاۋىڭدى سۇرايمىن، ال سەن اراشا تۇسەر ەمەسسىڭ؟» (اباقۇق 1:2، 3). بۇل — قۇدايدىڭ ادال قىزمەتشىسى اباقۇق پايعامباردىڭ ايتقان ٴسوزى. سوندا ونىڭ قۇدايعا دەگەن سەنىمى از بولعان با؟ جوق، مۇلدەم ولاي ەمەس. قۇداي وعان قايعى-قاسىرەتتى جوياتىن ۋاقىتتى بەلگىلەپ قويعانىن ايتىپ سەندىردى (اباقۇق 2:2، 3).
ٶزىڭىز نە جاقىن ادامىڭىز قينالعاندا، بىردەن «قۇداي نەگە باياۋلاتىپ جاتىر، نەگە قازىر-اق جاماندىقتى جويا سالمايدى؟» دەپ ويلاۋىڭىز مۇمكىن. ٴبىراق كيەلى كىتاپتا: «كەيبىرەۋلەر ويلاعانداي، ەحوبا ۋادەسىن ورىنداۋدى باياۋلاتىپ جاتقان جوق، قايتا، سەندەرگە شىدامدىلىق تانىتىپ وتىر، ويتكەنى ول بىردە-ٴبىر ادامنىڭ جويىلماي، ٴبارىنىڭ وكىنگەنىن قالايدى»،— دەلىنگەن (پەتىردىڭ 2-حاتى 3:9).
قۇداي قاشان ىسكە كىرىسەدى؟
وتە جاقىن ارادا! يسا پايعامبار زاماننىڭ اقىرى تاياپ قالعانىن بىلدىرەتىن ەرەكشە وقيعالاردىڭ ورىن الاتىنىن جانە سول وقيعالاردى بەلگىلى ٴبىر ۇرپاق ٶز كوزىمەن كورەتىنىن ايتقان (ماتاي 24:3—42). يسا پايعامبار ايتقان وسى وقيعالار بۇگىندە ورىن الىپ جاتىر. بۇل قۇدايدىڭ ىسكە كىرىسەتىن ۋاقىتىنىڭ وتە جاقىن قالعانىن بىلدىرەدى. a
قۇداي بارلىق قايعى-قاسىرەتتى ٴسوزسىز جويادى. يسا پايعامبار جەردە بولعاندا، قۇدايدىڭ قايعى-قاسىرەتتى جويۋعا قۇدىرەتتى ەكەنىن كورسەتتى. سونىڭ كەيبىر مىسالدارىن قاراستىرايىق.
تابيعي اپاتتار. يسا پايعامبار ەلشىلەرىمەن عاليلەيا تەڭىزىندە قايىقپەن ٴجۇزىپ كەلە جاتقاندا، سۇراپىل داۋىل تۇرىپ، قايىق سۋعا باتا باستادى. وسى كەزدە يسا پايعامبار ٶزىنىڭ دە، قۇدايدىڭ دا تابيعات كۇشتەرىنە ٵمىر جۇرگىزە الاتىنىن كورسەتتى (قولوستىقتارعا 1:15، 16). يسا پايعامبار: «تىنا قال، باسىل!»— دەپ بۇيىردى. سوندا جەل باسىلىپ، جىم-جىرت تىنىشتىق ورنادى» (مارقا 4:35—39).
اۋرۋلار. كوپ ادام يسا پايعامباردىڭ ٴتۇرلى اۋرۋ-سىرقاۋلاردى، سونىڭ ىشىندە زاعيپتاردى، اقساقتاردى، الاپەسپەن اۋىراتىنداردى ساۋىقتىرا الاتىنىن بىلگەن. كيەلى كىتاپتا ونىڭ «بارلىق ناۋقاستاردى ساۋىقتىرعانى» ايتىلعان (ماتاي 4:23، 24؛ 8:16؛ 11:2—5).
ازىق-تۇلىك تاپشىلىعى. يسا پايعامبار قۇدايدىڭ بەرگەن كۇشىنىڭ ارقاسىندا از تاماقپەن كوپ ادامدى تويىندىرعان. كيەلى كىتاپتا ونىڭ ەكى رەت مىڭداعان ادامدى تاماقتاندىرعانى ايتىلعان (ماتاي 14:14—21؛ 15:32—38).
ٶلىم. يسا پايعامبار ٷش ادامدى ٴتىرىلتۋ ارقىلى ەحوبا قۇدايدىڭ ولىمگە دە ٵمىرى جۇرەتىنىن انىق كورسەتكەن. ول ٴتىپتى ولگەنىنە ٴتورت كۇن بولعان ادامدى دا تىرىلتە العان (مارقا 5:35—42؛ لۇقا 7:11—16؛ جوحان 11:3—44).
a زاماننىڭ اقىرى جايلى كوبىرەك بىلگىڭىز كەلسە، ەحوبا كۋاگەرلەرى باسىپ شىعارعان «ماڭگى باقي ٶمىردىڭ راقاتىن كورىڭىز!» كىتابىنىڭ 32-ساباعىن قاراڭىز. ونى www.pr418.com تور بەكەتىنەن تەگىن جۇكتەۋگە بولادى.