“Ngi dikola katé bhebhi, Ngana, eye ki wa mu fula ku ngivwa? Ngi ta mutendu, ngixi: Uswé’yê: Eye-phe u kamba ku bhulula?” (Habakuke 1:2, 3) Yiyi izwelu ya Habakuke, diyala dyambote wexile ni ujitu bhu pholo ya Nzambi. O kwila kudikola kwê kwa londekesa kukamba kixikanu? Kana! Nzambi wa lembalesa Habakuke kwila, Mwene wa solele kyá o kithangana kya kuzubha o hadi.—Habakuke 2:2, 3.

Se eye mba ndandu yé mwa mu tala hadi, u tena kubanza kwila, nange Nzambi wa mu kokoloka, ni kwila kindala kiki mwene ka mu bhanga kima. Né kiki o Bibidya i tu kanena: “Ngana kala ni kaxixi mu kubhitisa kizwelu kyê, wila amoxi ki a mu fika kaxixi. Oko ki kyene, kuma enu-phe a mi xididikila, mukonda mwène ka mesena kwila ku kala muthu u texika, mbata wa mesena ene oso eza mu kudyelela.”—2 Phetele 3:9.

Kwa kambe ngó! Jezú wa londekesa kwila, sayi kibuka kya athu kyeji mona o izulukutu yoso yeji kala ijimbwete ya “dizubhilu dya [izulukutu ya] mundu.” (Matesu 24:3-42) O kikumbidilu kya kikanenu kya Jezú mu izuwa yetu ki londekesa kwila, Nzambi u tena kubatula o maka ene mu dibhana nawu o athu mu kithangana ni mbandu. a

Maji, Nzambi wa-nda zubha kyebhi o hadi yoso? Kyoso kyexile mu ngôngo, Jezú wa londekesa o kutena kwa Nzambi kwa kuzubha o hadi ya athu. Tala ifika iwana, yalungu ni maka ya.

Mavuwa: Kyoso Jezú ni maxibulumê kyexile mu kwenda mu musanza wa Kalunga ka Ngalileya, kwa moneka kitembu kyonene ni mabhuku kyeji bobesa o ulungu wâ. Maji Jezú wa londekesa kwila, mwene ni Tat’ê a tena kuximbakatesa o kitembu ni mabhuku. (Kolose 1:15, 16) Jezú wambe ngó: “Batamenu, mu dixibhe!” Ihi ya bhiti? “Kitembu anga ki batama, kuma ku kala kutululuka kwa nzungule.”—Marku 4:35-39

Mawuhaxi: Jezú a mwijidile kyambote mukonda dya uhete wa kusaka o ifôfo, inema ni yó oso exile mu tala hadi mukonda dya uhaxi wa kikonya, dibhute mba mawuhaxi engi. ‘Mwene wa sake oso akexile mu tala-hadi.’—Matesu 4:23, 24; 8:16; 11:2-5.

Kukamba Kudya: Bhu kaxi ka kutena kwa mu bhana Tat’ê, Jezú wa dikila o nzala ya athu avulu ni kudya kwa tolo, kifwa wa kuvudisa. O Bibidya yamba kwila, mwene wadisa mazunda a athu bhu kaxi ka madiwanu mu veji jiyadi.—Matesu 14:14-21; 15:32-38.

Kufwa: O mawufukunukinu atatu a bhange Jezú kala kyo soneke mu Bibidya, alondekesa kyambote o kutena kwa Nzambi kwa kufukununa o athu afu kyá. Ku kitatu kiki umoxi wa kexile kya izuwa iwana mu mbila tundé kya mu fundile.—Marku 5:35-42; Luka 7:11-16; Nzwá 11:3-44.