“Anweba Yehoba, bimye binga byo nkajila na kukeba bukwasho, ne anweba kumvwa ne? Bimye binga byo nkakeba bukwasho na mambo a bukapondo, ne anweba ne kunkwasha ne?” (Habakuka 1:2, 3) Ano o mepuzho aipwizhe Habakuka, wajinga mulunda ne Lesa. Nanchi ano mepuzho alumbulwile’mba kechi wajinga na lwitabilo nenyi? Ine, kwalepeshatu. Lesa wakumbwile Habakuka amba watongola kimye kyo akapwisha bya malwa byonse.—Habakuka 2:2, 3.

Inge anweba nangwa muntu ye mwatemwa ubena kuyanda, kyapeela kulanguluka’mba Lesa ubena kubanda kwimukwasha. Bino Baibolo waamba’mba: “Yehoba kechi wabanda kufikizha mulaye wanji, byonka byo balanguluka bantu bamo ne, pakuba aye wimutekenya mambo kechi usaka muntu nangwa umo amba akafwe ne, bino ukeba’mba bonse balapile.”—2 Petelo 3:9.

Katatakatu! Yesu waambile’mba kukekala kisemi kimo kikamona bintu bikamwekanga mu ntanda bikekala kiyukilo kya kuba’mba twafika ku “mpelo ya buno bwikalo.” (Mateo 24:3-42) Buno bungauzhi bwaambile Yesu bubena kufika ano moba, kabiji bumwesha’mba katatakatu Lesa afumyepo buyanji bubena kupitamo bantu. *

Pano Lesa ukafumyapo byepi buyanji? Yesu byo ajinga pano pa ntanda, waubile bya kukumya bimwesha’mba Lesa uji na bulume bwa kupwisha makatazho abena kupitamo bantu. Akimonai bintu bimo byo aubile.

Bya Malwa Bipulumukatu Bine: Yesu ne batumwa banji byo bajinga mu bwato pa Kalunga ka Ngalilea, kwaishile luvula mukatampe kya kuba ne bwato bwakebelenga kuloba. Bino Yesu wamwesheshe’mba aye ne Bashanji baji na bulume bwa kuzhindamika luvula. (Kolose 1:15, 16) Yesu waambijile luvula amba: “Zhindama!” Ki ka kyamwekele? “Luvula walekele, pabwela pauba ne nzoo.”—Mako 4:35-39.

Bikola: Yesu wayukanyikilwe bingi amba wabukanga bampofu ne bilema, kubikapotu ne bajinga na kishimu, kalepu, ne bikola byapusana pusana. “Wabukile bonse bajinga na bikola.”—Mateo 4:23, 24; 8:16; 11:2-5.

Bipowe bya Nzala: Yesu waingijishe bulume bwamupele Shanji kuvuzha kajo. Baibolo waambapo bimye bibiji Yesu po avuzhizhe kajo ne kujiisha bantu bavula bingi.—Mateo 14:14-21; 15:32-38.

Lufu: Baibolo waambapo bimye bisatu Yesu po asangwile bantu bafwile, kabiji bino bimwesha’mba Yehoba uji na bulume bwa kusangula bafwa. Umo pa bano bo asangwile wafwile pa moba ana.—Mako 5:35-42; Luka 7:11-16; Yoano 11:3-44.