“HOMPA, dogoro ezuvake na hepa ame kukuga ekwafo, nye ove nokupurakena nge si, o tu parure kepiyagano?” (Habakuku 1:2, 3) Edi kuna kara nonkango daHabakuku, mugara ogu nga limburukwa Karunga. Elikwambero lyendi kwa likidire asi kapi ga kere nepuro ndi? Hawe. Karunga kwa tumbwidilire Habakuku asi ga tura po nare siruwo esi nga hagekesa po ruhepo.—Habakuku 2:2, 3.

Nsene nyove ono kuhepa ndi muntu ogu wa diva, ureru kugazara asi Karunga kapi ana kurugana ko yuma. Nye Bibeli kutanta asi: “Hompa kapi a katapeke kusikisa mo etumbwidiro lyendi, moomu vana kuyitwaredera vamwe kekatapo. Nye age nkenda ana mu retere. Kapi ga hara asi ngapa zonauke nampili gumwe, age kwa hara asi navenye ngava litezurure.”—2 Peturusa 3:9.

Ntaantani tupu! Jesus kwa uyungire asi vantu ava vantaantani ngava mona maruha gosidiviso esi ngasi likida mazuva gouhura “wouzuni” ou. (Mateusa 24:3-42) Esikiliromo lyouporofete waJesus momazuva getu, kuna kulikida asi Karunga ntaantani a rugane ko yuma. *

Nye ngapi omu Karunga nga ka gusa po ruhepo? Apa ga kere Jesus pevhu, kwa likidire nonkondo daKarunga dokukagusa po ruhepo. Koneka yihonena yimwe.

Yimpagwa: Apa Jesus novapositoli vendi va gendere mefuta lyaGalireya, emukundungu kwa pindukire nokudamesa wato. Jesus ga yi likidire asi nage noGuhwe va kara nononkondo dokupangera mukarompepo. (Vakorosi 1:15, 16) Jesus kwa tente asi: “Mwena, mwena tee-te.” Yitundwamo? “Mpepo tazi litura, tazi mwena tee-tee-tee.”—Marukusa 4:35-39.

Mauvera: Jesus kwa divikwilire kononkondo dendi dokuverura vatwiku noyirema nava ngava hepa koyingondwe ntani nomauvera gamwe. Age “ta verura vaveli navenye.”—Mateusa 4:23, 24; 8:16; 11:2-5.

Erumbu: Jesus kwa vhukisire nondya pokuruganesa nonkondo edi va mu pere oGuhwe. Bibeli kutanta asi apa ga zuvhisire, age kwa kutikire vantu mayovi yikando yivali.—Mateusa 14:14-21; 15:32-38.

Nomfa: Mavhumbuko gatatu aga ga rugene Jesus kulikida asi Jehova ga kara nononkondo dokukagusa po nomfa. Gumwe ogu ga pindwire koufe, kwa kere montoko mazuva gane.—Marukusa 5:35-42; Rukasa 7:11-16; Johanesa 11:3-44.