“Shukulu Kalunga, bisimbu byabingi njinakala na kutambeka kuli yobe ngeci unjikwase. Simbu mukajo ukanjitolilila? Simbu mukajo ukatwamena ku banu baje bashaka kulinga byuma bya muka kuli yetu?” (Hambakuke 1:2, 3) Awa akewo majwi endekele Hambakuke, munalume uje wapwile wamubwa, uje lalo wawanene bibezikiso kuli Njambi. Kuma kulinyenyeta kwendi kwamwesele ngwabo kakele na likulahelo ndi? Embwe. Njambi wamukulahesele ngwendi nabwahesa simbu yakamanesa tuyando twoshe.—Hambakuke 2:2, 3.

Nga yeni nambe munu imwazema ali na kuyanda, munasa kusinganyeka ngweni Njambi neshwala kumanesa tuyando. Oloni Mbimbiliya yatuzembeleka ngwayo: “Mwene kesi kwishwala kulinga cije canakulahesa, ngwe mubakayongola banu. Oloni muka-lukakateya hali yeni, omwo kashaka umo akanyonge, oloni ashaka ngeci boshe batenguluke kutunda ku bibi byabo.”—2 Petulu 3:9.

Ololo. Yesu wendekele ngwendi kukakala banu baje bakalimwena byuma bya kukasamesa bije bimwesa “kukotoka kwa kaye.” (Mateo 24:3-42) Kulishulisilila kwa bupolofweto bwa Yesu matangwa ano, kumwesa ngwabo Njambi ololo amanesa tuyando ku banu. *

Oloni Njambi akamanesa bati tuyando twoshe? Yesu mwakele hano hasi, wamwesele ngwendi Njambi ali na nzili ya kumanesa tuyando ku banu. Tucimoneni ha myanja eyi.

Bukalu bwa Kulizila: Omwo Yesu na tupositolo bendi bakele na kujabuka na bwato mu Kalunga-ndonga wa Ngalileya, kwakatukile lihunzi lyakama lije lyashakele kubombeka bwato. Oloni Yesu wamwesele ngwendi ikeye na Ishe bali na nzili ya kumanesa bukalu bwa kulizila. (Kolose 1:15, 16) Yesu wendekele lika ngwendi: “Oloka kulu.” Co “lihunzi lyemanene, co kwolokele kulu.”—Mako 4:35-39.

Mishongo: Yesu wakele na cashu ca kukangula tupuputwa na bilema na baka-kushinya na baka-mbumba na mishongo ya kuliseza-seza. “Wakangwisile boshe baje babinjile.”—Mateo 4:23, 24; 8:16; 11:2-5.

Njala ya Lyangengela: Yesu wapangesele nzili yamwanene Ishe mu kwana banu byakulya byabingi. Mbimbiliya yamwesa bisimbu bibali bije byashukile maunzi a banu.—Mateo 14:14-21; 15:32-38.

Butsi: Tuzibuka ngwetu Yehova ali na nzili ya kusangula batsi, mwafwa Yesu wasangwile banu ha bisimbu bitatu. Umo wa baje basangwile watsile ha matangwa awana.—Mako 5:35-42; Luka 7:11-16; Yowano 11:3-44.