“Jehovah ô, mandra-pahoviana no iantsoako vonjy, nefa tsy henoinao? Mandra-pahoviana no iantsoako vonjy aminao noho ny herisetra, nefa tsy vonjenao?” (Habakoka 1:2, 3) I Habakoka no niteny an’izany, nefa izy olona nankasitrahan’Andriamanitra. Tsy ampy finoana ve izy? Tsia. Nanome toky azy Andriamanitra hoe efa nifidy fotoana hamaranana ny fijaliana izy.—Habakoka 2:2, 3.

Rehefa isika na ny havantsika no mijaly, dia mora amintsika ny miteny hoe ela be Andriamanitra vao manao zavatra. Manome toky anefa ny Baiboly hoe: “Tsy mba ela i Jehovah raha ny amin’ny fampanantenany, araka izay heverin’ny sasany ho fahelana, fa manam-paharetana aminareo izy, satria tsy tiany hisy ho ringana fa mba ho tonga amin’ny fibebahana kosa ny rehetra.”—2 Petera 3:9.

Tsy ho ela intsony! Nilaza i Jesosy fa hisy taranaka iray hahita ny famantarana hoe efa akaiky ny faran’izao tontolo izao. (Matio 24:3-42) Efa tanteraka izany amin’izao, ka hita hoe tsy ho ela intsony Andriamanitra dia hanao zavatra. *

Inona no hataon’Andriamanitra mba tsy hijaly intsony ny olona? Nasehon’i Jesosy tamin’izy tetỳ an-tany fa mahavita manafoana ny zavatra mampijaly antsika Andriamanitra. Anisan’izany ireto:

Loza: Tratran’ny rivo-doza i Jesosy sy ny apostoliny, rehefa niampita ny Ranomasin’i Galilia. Nasehon’i Jesosy tamin’izay fa mahavita mifehy ny herin’ny natiora izy sy ny Rainy. (Kolosianina 1:15, 16) Niteny fotsiny izy hoe: “Mangìna! Mitonia!” Dia “nitsahatra ny rivotra ka nanjary tony dia tony ny andro.”—Marka 4:35-39.

Aretina: Nanasitrana ny jamba sy ny kilemaina ary ny boka i Jesosy. Vitany koa ny nanasitrana ny olona voan’ny androbe, na aretina hafa. “Nanasitrana izay rehetra narary” izy.—Matio 4:23, 24; 8:16; 11:2-5.

Mosary: Tantarain’ny Baiboly fa indroa i Jesosy no nanome sakafo olona an’arivony, tamin’izy tetỳ an-tany. Afaka nampitombo an’izay sakafo nisy teo am-pelatanany izy tamin’ireo fotoana ireo, noho ny hery nomen’ny Rainy azy.—Matio 14:14-21; 15:32-38.

Fahafatesana: Intelo i Jesosy no nanangana olona tamin’ny maty, ary efa maty efatra andro aza ny iray tamin’izy ireo. Hita avy amin’izany fa afaka manangana ny maty koa i Jehovah.—Marka 5:35-42; Lioka 7:11-16; Jaona 11:3-44.