“O Irooj, ewi toon aõ naaj kũr ñan eok kõn jipañ ak kwõjjañin uwaak im lo̦mo̦o̦ren kõm jãn jorrããn kein?” (Habakkuk 1:2, 3, UBS) Naan kain rej naan ko an Habakkuk, juon em̦m̦aan eo me Anij ear buñbũruon ippãn. Jar in an ear ke kaalikkar bwe edik an tõmak? Ejjab ñan jidik! Anij ear kallim̦uri Habakkuk bwe ewõr juon iien em̦õj an karõke bwe enaaj kõjem̦l̦o̦k eñtaan.​—Habakkuk 2:2, 3, UBS.

Ñe kwe ak juon eo kwepaake ej iioon eñtaan, enaaj pidodo am̦ bõk l̦õmn̦ak eo bwe Anij erum̦wij an jol̦o̦k eñtaan, im bwe ej aikuj jipañ kõj kiiõ. Bõtab, Baibõl̦ ej jiroñ kõj im ba: “Irooj ejjab rum̦wij kõn an kallim̦ur, ãinwõt jet rej watõk rum̦wij, a ej meanwõd ñan kom̦, im jab kõn̦aan bwe jabdewõt en jako, a bwe ren otemjej itok im ukel̦o̦k ippãer.”​—2 Piter 3:9.

M̦õttan wõt jidik! Jesus ear kwal̦o̦k bwe enaaj wõr juon epepen in armej enaaj lo aolepen men ko renaaj wal̦o̦k im rej kõkal̦l̦en raan ko ãliktata an jukjukun pãd in. (Matu 24:3-42) An jejjet kũtien kanaan eo an Jesus ilo raan kein ad, men in ej kaalikkar bwe m̦õttan wõt jidik Anij enaaj jipañ ilo men ko rej wal̦o̦k ñan armej. * (Lale kõmel̦el̦e eo itulal̦.)

Ak ewi wãween Anij enaaj jol̦o̦k eñtaan otemjej? Ke Jesus ear pãd ijin ioon lal̦, ear kwal̦o̦k joñan kajoor eo an Anij ñan jol̦o̦k eñtaan ko armej rej iiooni. Jen etale jet waanjoñak ko kõn men in.

M̦akũtkũt Lal̦ im L̦añ ko Rel̦l̦ap: Ke Jesus im rijjilõk ro an rar jerak ilo lom̦al̦o in Galili, rar iioon juon l̦añ el̦ap me ebaj kadouj wa eo wõt jidik. Bõtab Jesus ear kwal̦o̦k bwe e ekoba Jemãn ewõr aerro maroñ ioon l̦añ ko. (Kolosse 1:15, 16) Jesus ear ba: “Kwõn jab m̦akũtkũt, kwõn lur,” innem ta eo ear wal̦o̦k? ‘Kõto eo ear jako, im el̦ap an lur.’​—Mark 4:35-39.

Nañinmej: Ear buñbuñ Jesus kõn an wõr an maroñ ñan kõmour armej ro jãn aer pilo, kirro, nañinmej in dibũbbũb, lõba, ak nañinmej ko jet. Ear “kõmour ro otemjej rar nañinmej.”​—Matu 4:23, 24, UBS; 8:16; 11:2-5.

Jabwe M̦õñã: Ilo iien ko ear jabwe m̦õñã, Jesus ear kõjerbal kajoor eo Jemãn ear lel̦o̦k ñane ñan an kabwe m̦õñã ko. Baibõl̦ eo ej kwal̦o̦k bwe ruo alen an kar naajdik to̦ujin armej ro ilo iien ko ear jerbalin kwal̦o̦k naan.​—Matu 14:14-21; 15:32-38.

Mej: Baibõl̦ ej kwal̦o̦k bwe ewõr jilu alen an kar Jesus kõmour armej ro jãn mej, im men in ej kaalikkar bwe ewõr an Jeova maroñ im kajoor ñan jol̦o̦k mej. Juon iaan ro me ear kõmouri, ear mej ium̦win emãn raan.​—Mark 5:35-42; Luk 7:11-16; Jon 11:3-44.