Wẽnd na n kɩtame tɩ namsgã fãa sa ka la bilfu
Daar a ye, wẽn-sakd a Habakuk soka Wẽnd yaa: “Mam na n kelem n boola yãmb n kos sõngr tɩ ta dabʋre, tɩ y yaool n kelg-ma? Mam na n kelem n boola yãmb tɩ y fãag-d ne wõr-taabã tɩ ta dabʋre, tɩ y yaool n fãag-do?” (Habakuk 1:2, 3) Yaa a sẽn pa tar tẽeb bɩ? Ayo. Wẽnnaam yeel-a lame t’a bas a yam tɩ yẽ yãka wakat n na n kɩt tɩ namsgã sa.—Habakuk 2:2, 3.
Tõnd wall d ned sã n namsdẽ, d tõe n wa getame tɩ Wẽnnaam maasame, la t’a ra pa segd n bas tɩ namsgã ket hal ne masã ye. La ad Biiblã sẽn yete: “Wẽnnaam ka basd tɩ bãmb sẽn kãabã kaoos n pids wa neb kẽer sẽn tagsdã ye. La yaa tɩ bãmb maanda sũ-mar ne yãmba, b sẽn ka rat tɩ ned baa a yembr sãama yĩnga. Bãmb ratem yaa tɩ yãmb fãa tek yam n kos sugri.”—2 Pɩyɛɛr 3:9.
DABƲR LA WẼND NA N KƖT TƖ NAMSGÃ SA?
Ka ne ka bala! A Zeezi ra yeelame tɩ neb n na n yã bũmb toor-toor sẽn na n wilg tɩ dũniyã saab kolgame, n wʋm a võore. A wilgame tɩ na n yɩɩ zãmaan a ye neba. (Matye 24:3-42) A Zeezi gomdã sẽn pidsd rũndã-rũndã wã wilgdame tɩ ka la bilfu, Wẽnnaam na n kẽesa a toog tɩ namsgã sa. *
La wãn to la Wẽnnaam na n maan tɩ namsgã sa? A Zeezi sẽn wa n be tẽngã zugã, a sẽn maan bũmb ninsã wilgdame tɩ Wẽnnaam tara pãng n tõe tɩ ninsaalbã paam b mens ne namsgã. Ad makr a wãna:
Sabab-wẽnsã: Vugri, a Zeezi ne a tʋm-tʋmdbã ra bee batayo pʋgẽ, Galɩle mogrã zugu, tɩ sob-kẽeng wa sɩng fugbu, hal tɩ batayo wã rat n bõre. La a Zeezi maana bũmb sẽn wilgd tɩ yẽ ne a Ba wã tara tõog n tõe n kɩt tɩ koomã, sobgã, la tẽngã bũmb a taabã tũ b raabã. (Koloos-rãmbã 1:15, 16) A lenga sobgã, n yeel-a t’a “bas bʋʋr la a sĩndi!” Bõe n maane? “Sobgã yõkame tɩ zĩigã lebg sɩddd.”—Mark 4:35-39.
Bãasã: Nebã wʋsg ra miime t’a Zeezi tara tõog n tõe n kɩt tɩ zoens nin puki, tɩ koms-rãmb paam laafɩ, la a sãoog neb sẽn bẽed kisĩnkĩiri, wãoodo, la bãas buud fãa. A ‘maaga neb nins fãa sẽn ka laafɩ wã.’—Matye 4:23, 24; 8:16; 11:2-5.
Komã: Ne pãng ning a Ba wã sẽn kõ-a wã, a Zeezi maana yel-solemd tɩ rɩɩb bilf sek neb wʋsgo. Hal naoor a yiib la b wilg Biiblã pʋgẽ t’a maana woto n dɩlg neb tusa.—Matye 14:14-21; 15:32-38.
Kũumã: Neb sẽn ki t’a Zeezi vʋʋg-b tɩ Biiblã gomd a yell taa neb a tã. Woto wilgdame t’a Zeova tara tõog n tõe n vʋʋg sẽn ki-bã. Ned a ye a Zeezi sẽn vʋʋg ra maana kaalem tɩ rasem a naas menga.—Mark 5:35-42; Luk 7:11-16; Zã 11:3-44.
^ sull 5 Y sã n dat n paam vẽenem dũniyã yaoolem wakatã zug n paase, bɩ y ges Bõe la d tõe n bãng Biiblã pʋgẽ? sebrã sak a 9 wã. A Zeova Kaset rãmbã n yiis seb-kãnga. Y tõe n paam-a-la www.pr418.com pʋgẽ me.
Découvrez aussi…
GŨUSG GASGÃ
D sẽn mi tɩ d yell paka Wẽndã nafda tõndo
Biiblã sõngda tõnd tɩ d kɩs sɩd tɩ Wẽnnaam sẽn pʋlem tɩ manegr n watã na n pidsame.
SOGSG BIIBLÃ SẼN LEOKDE
Bõe la Wẽnnaam Rĩungã na n maane?
Bao-y n bãng-y bũmb nins y sẽn tõe n paame, Wẽnnaam Rĩungã sã n wa rɩt naam dũniyã gill zugu.
