“ToTeko, ¿hasta kema tlamis nimitstsajtsilis xinechpaleuiki uan axtinechtlakakilis? ¿Hasta kema tlamis nimitstsajtsilis para ayok ma mosisinikaj tlakamej, uan axaka ualas para techmakixtis?” (Habacuc 1:2, 3). Kej ni kiijtok Habacuc, se kuali tlakatl katli toTeotsij kuali kiitayaya. ¿Kej ni kiijtok pampa amo kuali tlaneltokayaya? Amo. ToTeotsij kiiljuik kiixtlalijtoya se tonal kema kitlamiltiskia tlaijiyouilistli (Habacuc 2:2, 3).

Kema tojuantij o se katli tikixmatij tlaijiyouia, uelis nimantsi timoiljuiaj toTeotsij amo tleno kichiua. Maske kiampa timoiljuiaj, Biblia techiljuia: “ToTeko axkiilkajtok tlen kiijtojtok keja sekij moiljuiaj. Techtenkauilijtok para sampa ualas, uan temachtli ualas. Pero ama yajaya kichia pampa nelia kipia iyolo ika tojuantij uan kineki nochi ma timoyolpatlakaj uan tijkauasej totlajtlakoljuaj. Axkineki niyon se ma poliui para nochipa” (2 Pedro 3:9).

ToTeotsij nechka kitlamiltis tlen amo kuali. Jesús kiijtok tlake tlamantli panoskia ipan itlamia tonali uan maseualmej katli itstoskiaj ipan sanse tonali kiitaskiaj nopa tlamantli (Mateo 24:3-42). Ipan ni tonali moaxitijtok ni tlajtolpanextili, nopa kinextia toTeotsij nechka kitlamiltis nochi tlen amo kuali. *

Uan, ¿toTeotsij uelis kitlamiltis tlaijiyouilistli? Kema Jesús itstoya ipan Tlaltipaktli kinextik toTeotsij kena ueliskia kitlamiltis. Ma tikitakaj se keski tlamantli tlen kichijki.

Kema se tlamantli tetlasojsoljuilia. Se tonali, kema Jesús uan itokilijkauaj itstoyaj ipan se akali ipan ueyi atl tlen Galilea, pejki tlauel chikauak tlaajaka uan nechka kiatsonpoliuiltiskia nopa akali. Jesús kinextik ya uan iTata uelij kinauatiaj ajakatl uan sekinok tlamantli (Colosenses 1:15, 16). Jesús san kiijtok: “Amo ximolini, san xielto. Uan nopa ajakatl moketski uan nopa ueyi atl ayok mojmolinik” (Marcos 4:35-39).

Kokolistli. Miakej maseualmej kimajtoyaj Jesús kinchikauayaya katli amo ueliyayaj tlachiaj, katli amo nejnemiyayaj, katli tlapolouayayaj, katli kipixtoyaj lepra uan sekinok katli nojkia mokokouayayaj. Biblia kiijtoua Jesús “kinchikajki nochi tlen mokokouayayaj” (Mateo 4:23, 24; 8:16; 11:2-5).

Mayantli. Kema Jesús tlajtolmoyajki, ompa kitekiuik nopa chikaualistli tlen iTata kimakatoya uan kiampa kichijki ma onka miak tlakualistli uan kintlamakak miakej maseualmej (Mateo 14:14-21; 15:32-38).

Mikilistli. Kema itstoya ipan Tlaltipaktli, Jesús kinyolkuik eyij maseualmej, se ya miktoya naui tonali. Nopa kinextia Jehová uelis kinyolkuis katli miktokej (Marcos 5:35-42; Lucas 7:11-16; Juan 11:3-44).