“¿Hasta keman Jehová moneki nimitstsajtsilis techpaleui pero te amo techkaki? ¿Hasta keman moneki nimitstsajtsilis techmakixti itech neteuilistli pero te amo itlaj tikchiua?” (Habacuc 1:2, 3). Ijkon okijto se tlakatl tlen okiyolpaktiaya toTajtsin Dios. ¿Kijtosneki amo otlaneltokaya? Amo. Porque toTajtsin Dios okinankili ajsis tonal ijkuak kitlajtlamis tlajyouilistli (Habacuc 2:2, 3).

Ijkuak titlajyouiaj noso tlajyouia ikaj tlen tiktlasojtlaj, xamo tikijtoaj toTajtsin Dios amo itlaj kichiua. Pero Biblia kijtoa: “Amo kijtosneki Dios yokilka tlan okisentlali kichiwas, kemi sikimeh yowejka kiyejyekoliah, yej techchixtok iwa amo kineki aka mamoixpolo, yej tinochteh matimoyolpatlakah inawak” (2 Pedro 3:9).

Ayakmo miak poliui uan toTajtsin Dios kitlajtlamis tlajyouilistli. Porque Jesús okijto tlen tlamantli panoskia itlamian tonalmej uan se generación noijki kitaskiaj tlen panoskia (Mateo 24:3-42). Axkan mochijtok nin profecía uan nin kiteititia toTajtsin Dios yikitlajtlamis tlen techtlajyouiltia. *

Pero ¿uelis toTajtsin Dios kitlajtlamis tlajyouilistli? Ijkuak nikan okatka Jesús, okiteititi iTajtsin uelis kitlajtlamis tlajyouilistli. Ma tikitakan seki tlamantli.

Ijkuak tlaxixini: Se tonal ijkuak Jesús oyaya iuan imachtijkauan itech mar de Galilea, opejki ejekakiaui uan barco yiapolakiskia. Pero Jesús okiteititi iTajtsin kiketsaltia ejekakiauitl (Colosenses 1:15, 16). Jesús okilui ejekakiauitl: “¡Ximoyekmana! Iwa n ejekatl omóketski iwa nochi san owaltlamoka” (Marcos 4:35-39).

Kokolistli: Miakej okimatkej Jesús okinpajtiaya akinmej amo otlachiayaj, koxomej, akinmej omimikiayaj, akinmej okipiayaj lepra uan okseki tlamantli. Biblia kijtoa Jesús “okimpajti nochteh non omokokoayah” (Mateo 4:23, 24; 8:16; 11:2-5).

Apistli: Noijki kanaj ome uelta toTajtsin Dios okimakak chikaualistli Jesús para ma kimiaktili tlakuali uan ijkon sapanoa miakej kintlamakaskia (Mateo 14:14-21; 15:32-38).

Mikilistli: Jesús okinyoliti eyi uan se yokipiaya naui tonal omikik. Nin okiteititi Jehová kinyolitis akinmej yomikej (Marcos 5:35-42; Lucas 7:11-16; Juan 11:3-44).