Sekuseduze Ukuthi UNkulunkulu Aqede Ukuhlupheka
“Koze kube nini, awu Jehova, ngicela usizo, kodwa ungalaleli na? Loba ngimemezela kuwe ngisithi, “Udlakela!” kodwa ungangihlengi na?” (UHabakhukhi 1:2, 3) La ngamazwi kaHabakhukhi indoda elungileyo eyayithandwa nguNkulunkulu. Kambe wayengelakholo yini? Ngitsho lakancane. UNkulunkulu wamqinisekisa uHabakhukhi ukuthi wayelesikhathi asibekileyo sokuqeda ukuhlupheka.—UHabakhukhi 2:2, 3.
Nxa wena kumbe omunye umuntu omthandayo ehlupheka kulula ukucabanga ukuthi uNkulunkulu uyaphuza ukulungisa izinto ezisihluphayo. Kodwa iBhayibhili liyasiqinisekisa ukuthi: “INkosi kayiphuzi ukugcwalisa isithembiso sayo, njengokuqedisiswa ngabanye ngokuphuza. Iyalibekezelela ingafuni lamunye abhubhe, kodwa ukuba umuntu wonke aphenduke.”—2 UPhetro 3:9.
UNKULUNKULU UZAKUKHIPHA NINI UKUHLUPHEKA?
Sekuseduze. UJesu wacacisa ukuthi isizukulwane esithile sasizabona izenzakalo ezitshiyeneyo ezazizatshengisa ukuthi sekuzinsuku ‘zokucina kwesikhathi.’ (UMathewu 24:3-42) Ukugcwaliseka kwesiphrofetho sikaJesu kutshengisa ukuthi sekuseduze ukuthi uNkulunkulu alungise inhlupho ezikhona emhlabeni. *
Kodwa uNkulunkulu uzakuqeda njani konke ukuhlupheka? Ngesikhathi uJesu esemhlabeni watshengisa ukuthi uNkulunkulu ulamandla okuqeda konke ukuhlupheka. Cabanga ngezibonelo ezilandelayo.
Izingozi Zemvelo: Ngelinye ilanga uJesu labafundi bakhe behamba ngesikepe eLwandle lwaseGalile kwaba lesiphepho esilamandla esaphosa sacwilisa isikepe. Kodwa uJesu watshengisa ukuthi yena loyise bayenelisa ukuqondisa imvelo. (KwabaseKholose 1:15, 16) UJesu waphonguthi: “Zwi! Pholani!” Kwasekusenzakalani? “Yikho umoya wasuthula kwasekuphola nya.”—UMakho 4:35-39.
Ukugula: UJesu wayedume ngokwelapha abantu abayiziphofu, abagogekileyo, lalabo ababelezithuthwane kanye lababelobulephero. Wayeselapha yonke imihlobo yezifo. “Wasilisa bonke abagulayo.”—UMathewu 4:23, 24; 8:16; 11:2-5.
Indlala: UJesu wasebenzisa amandla ayewaphiwe nguyise ukuthi anike abantu ukudla. IBhayibhili lisitshela ukuthi ngesikhathi eseselapha emhlabeni wanika abantu abanengi ukudla futhi lokhu kwenzakala izikhathi ezimbili.—UMathewu 14:14-21; 15:32-38.
Ukufa: UJesu wavusa abantu abathathu futhi lokhu kutshengisa ukuthi uJehova ulamandla okuqeda ukufa. Wavusa omunye owayeselamalanga amane efile.—UMakho 5:35-42; ULukha 7:11-16; UJohane 11:3-44.
^ indima 5 Ukuze ufunde okunengi ngezinsuku zokucina bala ibhuku elithi IBhayibhili Lisifundisani? esahlukweni 9 elidindwe ngoFakazi bakaJehova njalo ungalidawuniloda mahala ku-www.pr418.com.