“Ophiyerya lini, Pwiya, kineraka kovekeni nikhaviheryo ni muhikiwiriyanne, kilokohe owali nave nyuwano muhikikhaviheryaka?” (Habakukhi 1:2, 3) Masu ala ta Hapakukhi, mulopwana yoowo aari ooreera murima nave ari nthamwene a Muluku. Apwanne aapanke makoho yaala nthowa nawi aarino nroromelo vakhaani? Hooye! Muluku aamuroromeliha Hapakukhi wi, owo aathala elukuluku yoophwanelela wi amalihe makacamiho.—Habakukhi 2:2, 3.

Vaavaa nyuwaano naari muchu yoowo munamusivelaanyu onnahooxeya, ti wookhweya wuupuwela wi Muluku onnalekela weeravo echu. Nyenya Piipiliya onnaniroromeliha: “Tahi wi Apwiya anamulekela weriha nroromelo naya, ntoko akina anupuwelaya, Nto awo ari òvilela ni nyuwo, wona wi hanakhwela wi mutxhu arimele, nto wi othene erukunuse mirima.”—2 Pedro 3:9.

Moohilekela! Yesu aaloca sa nloko nenlo nahaala weerela onamoona ichu sahaala weereya sooniheryaka eneneeryo “yomaliha elapo.” (Mateu 24:3-42) Saweereya seiha sineereya mmahiku ahu yaala. Ela enooniherya wi ehanle elukuluku vakhaani wi Muluku eerevo echu ni omaliha makacamiho a elapo yeela. *

Vano, Muluku oni amalihe hai makacamiho oothene? Naakhulo nnaphwanyeya mu yeeyo Yesu aapankeiye ari veelaponi yavathi. Muluku amvaha owerya Yesu, wi amalihe ohooxeya wa achu. Hankooni noone sootakiherya sa vakhaani.

Ipahu sa Maphacuwelo: Ekwaha emoha, Yesu aari ni oohuserya awe mmwaaceyani mu eniya ya o Kalileya. Nave yaapacerya woopa echeku etokweene yeeyo yakhala ntoko wi yaahaala ompwiniha mwaaceya. Mu elukuluku yeele, Yesu aahooniherya wi owo vamoha ni Atiithi awe, annawerya ovareryela ikuru sa maphacuwelo. (Kolosi 1:15, 16) Pahiru Yesu aariye: “Omàle, okhurumuwe!” Tiivi yaari yookhumelela? “Etxheku yàmàla ni wàkhalavo okhurumuwa otokotoko.”—Marko 4:35-39.

Ireca: Yesu aatepa osuweliwa nthowa na waapenuxa eevaasi, oorakala, yaale yaarino ereca ya ecilecile, mareca ni ireca ikina. Achu ancipale yaanaya wa Yesu nave owo “àhapenusa atxhu othene yari ni iretxa.”—Mateu 4:23, 24; 8:16; 11:2-5.

Othowa wa Yoolya: Yesu aahaakhela owerya wa Atiithi awe wi atatuxe yoolya yavakhaani wi ekhale yawaaca. Nave tho Piipiliya, onnooniherya wi ikwaha piili vaavaa aareiye veelaponi yavathi, Yesu ahaavakulela achu ancipale.—Mateu 14:14-21; 15:32-38.

Okhwa: Piipiliya onnaloca saweereya raru sa oviihiwa mookhwani seiho seeriweno ni Yesu moorweela wa ikuru sa Muluku. Ela ennooniherya wi Muluku ookhalano owerya wa omaliha okhwa. Mmoha a yaawo Yesu amvihaleiye mookhwani aamalinhe mahiku maxexe akhwile.—Marko 5:35-42; Luka 7:11-16; Yohani 11:3-44.