Lö Ara Tö Ihori Fefu Wamakao Lowalangi
”Hawaʼara saʼae uʼandrö tolo khöu, yaʼugö Yehowa, ba lö öfondrondrongo; hawaʼara saʼae muʼaodo khöu: Famakao!” (Habakuki 1:2, 3) Daʼa wehede Habakuki, enoni Lowalangi si sökhi amuata. Hadia ambö famatinia? Löʼö! Ifabuʼu khönia Lowalangi wa no itatugöi ginötö ba wangeheta ngawalö wamakao.—Habakuki 2:2, 3.
Na tefakao ita mazui niha niʼomasiʼöda, tola manö tumbu ba wangera-ngerada wa moguna iʼanemaiʼö itolo ita Lowalangi. Hizaʼi, ifaduhuʼö khöda Sura Niʼamoniʼö, ”Lö iʼaragö Yehowa ginötö ba wamalua si no ifabuʼu, simane niwaʼö niha ösa. Hizaʼi, ebolo dödönia khömi börö me lö omasi ia na tekiko fazamösa. Omasi ia enaʼö dozi lafalalini gera-erara.”—2 Fetero 3:9.
HAWAʼARA IFALUA DAʼÖ LOWALANGI?
Lö ara tö! Ifatunö Yesu wa so ngaʼötö zangila ngawalö zalua dania si tobali tandra gamozua ”götö daʼa”. (Mataiʼo 24:3-42) Alua fefu daʼö ba ginötö si fagölö. Niwaʼö Yesu andrö alua ba ginötöda iadaʼa. Daʼö zangoromaʼö wa lö ara tö so nifalua Lowalangi. *
Hewisa wangohori Lowalangi ngawalö wamakao? Me so Yesu ba gulidanö, iforomaʼö wa tola iheta Lowalangi ngawalö wamakao nitaögö niha. Nehegö atö duma-dumania.
Bencana Alam: Me so Yesu hegöi ira sinengenia ba dalu Nasi Galilaia, alua mbade sabölö-bölö irege arakhagö ahöndrö göfara. Hizaʼi, iforomaʼö Yesu wa so kuaso khönia hegöi khö Namania ba wamatörö waʼabölö mbanua si yawa awö danö. (Kolose 1:15, 16) Ha imane Yesu, ”Böi hede-hede! Honogöʼö!” Ba iʼanemaiʼö ”tebato nangi ba ahono sibai”.—Mareko 4:35-39.
Fökhö: Laʼila niha wa tola ifadöhö Yesu niha sauʼa, sakela-kela, saniri, sobou auri ba fökhö tanö böʼönia. ”Ifadöhö fefu zofökhö.”—Mataiʼo 4:23, 24; 8:16; 11:2-5.
Faʼambö Soguna: Iʼogunaʼö Yesu kuaso nibeʼe Namania ba wamalua tandra sahöli-höli dödö ba wameʼe ö ba niha sato. Mututunö ba Zura Niʼamoniʼö wa no dua kali ibeʼe Yesu gö niha si hauga ribu faʼato.—Mataiʼo 14:14-21; 15:32-38.
Faʼamate: So kuaso khö Yehowa ba wangorifi niha si no mate. No tesura ba Zura Niʼamoniʼö wa so datölu niha si no mate nisusugi Yesu. Samösa ba gotaluara nisusugi me no öfa hari mate ia.—Mareko 5:35-42; Luka 7:11-16; Yohane 11:3-44.
^ par. 5 Enaʼö öʼila danö böʼönia nasa sanandrösa ba waʼatua danö, faigi wamahaʼö 32 moroi ba mbuku Lala ba Wanöndra Faʼohahau Dödö Sagötö Faʼara! nifazökhi ndra Samaduhuʼö Yehowa. No tehenaigö ba situs www.pr418.com/nia, tola öhalö lö muʼandrö mböli.
Te Göi Adöni Dödöu
MANURIAIGÖ
Bua Nitemau me Iʼameʼegö Tödö Ndraʼugö Lowalangi
Sura Niʼamoniʼö zanolo yaʼita ba wangokhögö famati saro ba nifabuʼu Lowalangi ba zi so föna.
