Nakai Leva ti Utakehe he Atua e Tau Matematekelea Oti Kana
“Iehova na e, ke ui atu au kia koe ato a fe, ka e nakai fanogonogo mai a koe? Kua tagi atu ai au kia koe ha ko e favale, ka e nakai fakamoui mai e koe.” (Hapakuka 1:2, 3) Ko e tau kupu ha Hapakuka anei, ko e tagata mitaki ne talia he Atua. Fakakite kia he olelalo haana kua nakai tua a ia? Nakai! Fakamafana he Atua a Hapakuka kua kotofa e Ia e magaaho ke utakehe e matematekelea.—Hapakuka 2:2, 3.
Ka matematekelea a koe po ke taha ne tata ki a koe, mukamuka ke talahau kua fakatuai e Atua ke taute taha mena, ha kua lata a ia ke fitā he lagomatai. Ka e fakamafana he Tohi Tapu a tautolu: “Kua nakai mule mai e Iki [Iehova] ke he mena kua talahaua mai, tuga he manatu he falu ke he mule; ka e fakauka mai a ia kia tautolu, he nakai finagalo a ia ke malaia taha, ka kia hohoko oti kana ke he tokihala.”—2 Peteru 3:9.
TO FAKAHOKO HE ATUA HE MAGAAHO FE?
Tata lahi mahaki tuai! Fakakite e Iesu to ha ha i ai e atuhau pauaki ka kitia e tau tutūaga matakehe ka fakamailoga e tau aho fakahiku “he lalolagi.” (Mataio 24:3-42) Ko e fakamooliaga he perofetaaga ha Iesu he magahala ha tautolu kua fakakite e tata lahi mahaki ke putoia mai e Atua ke he tau gahua he tagata. *
Ka e utakehe fēfē he Atua e tau matematekelea oti kana? He nofo a Iesu he lalolagi, ne fakakite e ia e malolō he Atua ke fakatotoka aki e matematekelea he tau tagata. Manamanatu ke he falu fakataiaga he mena nei.
Tau Matematekelea Tutupu Pauaki: He o atu a Iesu mo e tau aposetolo haana he Tahi a Kalilaia, ne tō e afā ti teitei tomo e foulua ha lautolu. Ka e fakakite e Iesu na maeke a ia mo e haana Matua ke tautaofi e tau tufugatia pauaki. (Kolose 1:15, 16) Pehē ai a Iesu: “Fakamate a kia milino a.” Ko e fua? “Mate ai e matagi kua milino lahi tuai.”—Mareko 4:35-39.
Gagao: Iloa lahi a Iesu ha kua maeke ke fakamaulu e tagata matapouli mo e kulikuli, pihia foki mo lautolu ne matematekelea he fitikeleu, lepela, po ke ha mamahi foki. Ti “fakamalolo foki e ia a lautolu oti ne gagao.”—Mataio 4:23, 24; 8:16; 11:2-5.
Kū e Mena Kai: Fakaaoga e Iesu e malolō ne foaki age he haana Matua ke fakaloga e tau mena kai. Talahau he Tohi Tapu, lagaua he fekafekauaga haana ne fagai e ia e tokoafe.—Mataio 14:14-21; 15:32-38.
Mate: Ha ha ia Iehova e malolō ke utakehe e mate ha kua fakakite fakamaaliali he tolu e liu tu mai ne fakamau kua taute e Iesu. Taha ai ko e fakaliu tu mai kua fā e aho ne mate.—Mareko 5:35-42; Luka 7:11-16; Ioane 11:3-44.
^ para. 5 Ma e falu vala tala ke he tau aho fakahiku, kikite e fakaakoaga 32 he tohi Fiafia e Moui Tukulagi! ne taute fakailoa he Tau Fakamoli a Iehova mo e moua noa mai he www.pr418.com.