“Bóhólníihii [Jiihóvah] nílíinii, haash nízáagi chʼééh nánooshkąąhgo doo shíísíníłtsʼą́ąʼ da doo? Doodaiiʼ tʼáá naʼníleʼdii áhooníiłii biniinaa nánooshkąąhgo doósh tʼáá kʼad yisdáʼíínínil da?” (Habakkuk 1:​2, 3) Díí Habákak bizaad. Diné yáʼátʼéhígíí nilı̨́ı̨́ ńtʼééʼ éí God yił hóshǫ́. Jííkeedígíísh hweʼoodląʼ doo bidziilgóó bee ííshjání ájiilaa? Ndagaʼ! God éí Habákak ííłní achʼįʼ nahwiiʼná tʼáá nideeshtʼih.—Habakkuk 2:​2, 3.

Ni doodaiiʼ náánáłaʼ bééhonísinígíí bichʼįʼ nahwiiʼnáago, íiznízin łeh haash yitʼéego God doo tsxı̨́įłgo łaʼ yileeh da, kʼad shika eelwodgo neʼ jinízin łeh. Ákondi Diyin Bizaad ánihiłní: “Bóhólníihii [Jiihóvah] kóhodoonííł nínę́ę doo hąh yiʼdoolíił da lá. Nidi yee haadzíiʼii tsʼídá yiʼdoolíiłgo yee hasʼą́. Jó, nízaadgóó nihichʼįʼ haʼólní, tsʼídá doo łaʼ ázhdoodįįł da nízingo, nidi tʼáá ádzíłtso łahgo átʼéego tsíńdazdookosgo habąąhági átʼéii bitsʼáhizhdookah hóʼní.”—2 Peter 3:9.

Koshídę́ę́ʼ! Daʼ oochíłígíí bił béédahodoozįįł áhootʼéhígíí bee ééhózin ‘nihoolzhíshígíí’ bichʼįʼ nihiyoołkááł Jesus ííshjání áyiilaa. (Matthew 24:​3-42) Jesus náasdi áhodoonííł níigo yaa chʼíhwiizʼánę́ę áko God éí diné yaa íinízinígíí koshídę́ę́ʼ bichʼįʼ hoolzhish. *

Haitʼéego God tʼáá átʼé achʼįʼ nahwiiʼná niidoołtʼih? Jesus nahasdzáán yikáaʼgi tádííyáhą́ądą́ą́ʼ, God bee adziil ííshjání áyiilaa éí bílaʼashdlaʼii bichʼįʼ nidahwiiʼnánígíí nahjįʼ kwíidoolííł. Díí baa nitsíníkees.

Ayóó Ádahooníiłii: Jesus índa daalʼaadii Gálilii tónteel bikáaʼgi hoł ooʼoł ayóó átʼéego deeyol bitsinaaʼeeł bił taah dooltsʼił. Jesus dóó Bizhéʼé éí nihokááʼgóó ayóó ádahodooníłígíí tʼáá íídą́ą́ʼ bił bééhózin. (Colossians 1:​15, 16) Jesus kódííniid: “Kʼadí! Hashtʼedítʼeeh!” Haash hoodzaa? “Ííyol, índa tʼáá íiyisí hodiiyeel.”—Mark 4:​35-39.

Naałniih: Jesus éí tʼáá íiyisíí náʼáłdziih bee bééhoʼdílzin doo daʼooʼíinii índa nidaʼniłhodígíí, nááná tsiʼnídadikahígíí, łóód atsʼíís yiyáanii naałdzidii, doodaiiʼ ałʼąą átʼéego naałniih. “Diné bitah dahoneezgai tʼáá ałtso hadaałtʼé áńdajiidlaa.”—Matthew 4:​23, 24; 8:16; 11:​2-5.

Dahodichin: Jesus éí Bizhéʼé adziil bee níláago tsʼídá tʼóó ahayóí chʼiyáán hazlı̨́ı̨́ʼ. Diyin Bizaad ání, naakidi nahalneʼgo tádííyáhą́ądą́ą́ʼ, miil ánéelą́ą́ʼ daʼííyą́ą́ʼ.—Matthew 14:​14-21; 15:​32-38.

Anoonééł: Diyin Bizaad áníigo, Jesus éí tááʼ diné daneeznáádę́ę́ʼ nínéiidiyiiłjéeʼgo binahjįʼ Jiihóvah bibee adziilii yee anoonééł nahjįʼ kwíidoolííł. Łaʼ néidiisáhígíí éí dı̨́ı̨́ʼ jı̨́ ádin ńtʼééʼ.—Mark 5:​35-42; Luke 7:​11-16; John 11:​3-44.