“Alo nalupi Jeova ndyina okuliyavela okuita ombatelo, iya ove ohanthehelela? Alo nalupi mandyiliyavela kuove undyakulile koungangala, iya ove ohandyovola?” (Habacuque 1:2, 3) Onondaka ombu o mba Habakuke, omulume umwe ankho ukahi nawa, epanga lya Huku. Okuti walingile omapulo oo mokonda ekoleleyo liae ankho kaliapamene? Au. Huku wapamekele Habakuke etyi ati, pena omuvo makamanako ononkhumbi mbatyo ambuho.—Habacuque 2:2, 3.

Tyina onthue ine o umwe tuhole ekahi nokulambela movitateka, tupondola okusoka okuti Huku ukahi nokuseta opo etukuateseko. Mahi Ombimbiliya itulaa okuti: “Jeova kekahi nokuseta konthele yomulao wae, ngetyi vamwe vasoka okuti waseta. Mahi, oe wapua elundo no onwe, mokonda kahande nawike ahanyueko, mahi uhanda ovanthu aveho velivele.”—2 Pedro 3:9.

Apa katutu! Jesus wapopile ovipuka mavimoneka, mavilekesa okuti tuli kononthiki mbahulilila, “onthyulilo youye.” (Mateus 24:3-42) Omaulo Jesus apopile ekahi nokufuiswapo mononthiki mbetu, alekesa okuti apa katutu Huku mamaneko ovipuka viatyo aviho vietela ovanthu ononkhumbi. *

Mahi oñgeni Huku mamaneko ononkhumbi mbatyo ambuho? Etyi Jesus ankho ali pano pohi, walekesile epondolo lya Huku etyi akuatesileko ovanthu ankho vekahi nokulambela mononkhumbi. Tala Onongeleka mbumwe ngo ombo.

Ovinimawe: Nthiki imwe Jesus no noapostolu mbae etyi ankho vekahi mo mbaluku melunga lyo ko Galileia, kueile epuku-puku limwe enene iya owato aihande okunyingila kohi yomaande. Mahi Jesus walekesile okuti oe na Tate yae vapondola okuyunga ovipuka vietela ovanthu ononkhumbi. (Colossenses 1:15, 16) Jesus wapopilile epuku-puku nelunga okuti: “Uhaviele! Tula!” Apamoneka-tyi? “Epuku-puku alitalama, iya elunga alitulu.”—Marcos 4:35-39.

Omauvela: Jesus wiwe nawa mokonda younongo ankho ena, wokuhakula ovamphoki, nokuvelula ovilema, novipuka ankho vimonesa ononkhumbi ovanthu, ngetyi otyilundu, nomauvela omakuavo vali. “Wavelula aveho ankho vavela.”—Mateus 4:23, 24; 8:16; 11:2-5.

Ondyala: Jesus waundapesile epondolo apewa na Tate yae opo okulia kuhehi kukale okunyingi. Ombimbiliya ipopia okuti mokueenda kuovilinga viae viokuivisa etyi ali pano pohi, ovikando vivali waavelele okulia ovanthu ovanyingi-nyingi.—Mateus 14:14-21; 15:32-38.

Ononkhia: Ombimbiliya ipopia ovikando vitatu Jesus atutilisile vokuankhia kepondolo lya Jeova. Umwe povanthu ovo vatutiliswa etyi ankhia, ankho palambale ononthiki ononkhuana. Otyo tyilekesa nawa okuti Jeova una epondolo liokumanako ononkhia.—Marcos 5:35-42; Lucas 7:11-16; João 11:3-44.