“Ai Mukama, ndyahitsya hi okukutakira, okanga kumpurira? Nari okukutakira ahabw’okukorwa kubi, otanjune?” (Habakuuki 1:2, 3) Ebi n’ebigambo bya Habakuuki, omuheereza wa Ruhanga omwesigwa. Mbwenu shi ebigambo bye nibyoreka ngu akaba ataine kwikiriza? Ngaaha buzima. Ruhanga akahamiza Habakuuki ngu akaba yaataireho obwire obu araamareho okubonabona.​—Habakuuki 2:2, 3.

Waaba niiwe orikubonabona nari mugyenzi waawe, kyorobi kuteekateeka ngu Ruhanga tarikurahuka kugira eki yaakora ahonaaho. Kwonka, Baibuli neetuhamiza eti: “Mukama tatuuzayo ki yaaraganiise, nk’abamwe oku barikuteekateeka, kureka agumisiriza ahabwanyu atarikwenda muntu weena kuhwerekyerera, kureka naayenda ngu boona bahikye aha kweteisa.”​—2 Petero 3:9.

Ruhanga ari haihi kutaaha omu nshonga! Yesu akooreka ngu abantu b’obusingye obumwe bakaba nibaija kureeba ebintu by’omutaano ebirikworeka ngu turi omu biro by’emperu y’ensi egi embi. (Matayo 24:3-42) Okuhikiirira kw’obunabi bwa Yesu omu bunaku bwaitu, nikworeka ngu Ruhanga ari haihi kutaaha omu nshonga z’abantu. *

Kwonka shi Ruhanga naija kumaraho ata okubonabona kwona? Obu Yesu yaabaire ari omu nsi, akooreka ngu Ruhanga aine amaani g’okumaraho okubonabona. Yetegyereze bimwe aha bi yaakozire.

Ebihikiirizi: Obu Yesu n’entumwa ze baabaire nibagyendera omu bwato aha nyanja ya Galilaaya, eihunga ry’amaani rikateeraho kureetera obwato kutobera. Kwonka Yesu akooreka ngu we na Ishe nibabaasa kutegyeka ebihikiirizi. (Abakolosai 1:15, 16) Yesu akagira ati: “Reka, cureera!” Hakabaho ki? ‘Eihunga rikacureera; haabaho obucureera bwingi.’​—Mako 4:35-39.

Endwara: Yesu akaba naamanywa gye ahabw’okukiza empumi, abamugire, abarikugwa entsimbo, ababembe, n’ezindi ndwara. ‘Akakiza boona abaabaire barwaire.’​—Matayo 4:23, 24; 8:16; 11:2-5.

Eibura ry’Eby’okurya: Yesu akakoresa amaani agu Ishe yaamuhaire kukanyisa otw’okurya tukye tukarugamu bingi. Baibuli neegira ngu emirundi ebiri omu buheereza bwe, akariisa abantu nyamwingi.​—Matayo 14:14-21; 15:32-38.

Okufa: Abantu bashatu abu Yesu yaazoire abarikugambwaho omu Baibuli, n’obuhame oburikworeka ngu Yehova aine amaani g’okwihaho okufa. Omwe ahari abo abu yaazoire akaba amazire ebiro bina afiire.​—Mako 5:35-42; Luka 7:11-16; Yohaana 11:3-44.