«О Йеговӕ, цӕйбӕрцӕ ма дӕмӕ дзиназдзӕн, цӕмӕй мӕ фегъосай? Цӕйбӕрцӕ ма дӕмӕ седдзӕн ӕнхусмӕ, цӕмӕй мӕ аци фуддзийнадӕй фӕййервӕзун кӕнай?» (Аввакум 1:2, 3). Аци дзурдтӕ загъта Аввакум, Хуцауи хуарзӕнхӕ ка иссирдта, уӕхӕн адӕймаг. Цума ӕ дзурдтӕ уобӕл дзорӕг адтӕнцӕ, ӕма имӕ фагӕ ӕууӕндундзийнадӕ н’ адтӕй? Нӕъ. Хуцау Аввакумӕн зӕрдӕ байвардта, ӕ афонӕ ку ’рцӕуа, уӕд зиндзийнӕдтӕн кӕрон ке искӕндзӕй (Аввакум 2:2, 3).

Дӕхуӕдӕг кенӕ дӕ хеуӕнттӕй еске зиндзийнӕдтӕ ку февзаруй, уӕд, ӕвӕдзи, уотӕ фӕссагъӕс кӕнис, ӕма Хуцау нуриуӕнгӕ дӕр гъӕуама ести бакодтайдӕ. Фал нин Библи нифс ӕвӕруй: «Йеговӕ, зӕрдӕ цӕмӕй байвардта, уой исӕнхӕст кӕнунбӕл фӕстиат нӕ кӕнуй, кӕд еуӕй-еуетӕ уой фӕстиатбӕл нимайунцӕ, уӕддӕр, фал уин бухсуй, уомӕн ӕма ’й нӕ фӕндуй, цӕмӕй еске фесӕфа, фал ӕй фӕндуй, цӕмӕй алкӕмӕндӕр уа ӕрфӕсмон кӕнуни фадуат» (2 Петури 3:9).

Хъӕбӕр тагъд! Йесо балӕдӕрун кодта, аци «цардӕвӕрди» кӕрон ци дессаги хабӕрттӕ цӕудзӕй, уой цӕхуӕндӕр фӕлтӕр ке фӕууиндзӕй. Ӕма еци хабӕрттӕй бӕрӕг уодзӕй, «аци цардӕвӕрдӕн ӕ кӕрон ке ӕрхъӕрдтӕй» (Матфеййи 24:3–42). Йесой дзурдтӕ фӕстаг бӕнтти туххӕй куд ӕнхӕст кӕнунцӕ, уой абони мах уинӕн. Е ба уобӕл дзорӕг ӕй, ӕма тагъд Хуцау адӕни гъуддӕгтӕмӕ равналдзӕй. *

Фал Хуцау зиндзийнӕдтӕн кӕрон куд искӕндзӕй? Йесо зӕнхӕбӕл ку адтӕй, уӕд бавдиста, Хуцаумӕ еци хъаурӕ ке ес, цӕмӕй адӕни сӕ зиндзийнӕдтӕй фӕййервӕзун кӕна. Ӕркӕсӕн цалдӕр цӕветтонемӕ.

Ӕрдзон бӕллӕхтӕ. Еухатт Йесо ӕ апостолти хӕццӕ Галилейи денгизи лодкай адтӕнцӕ, уотемӕй тухдунгӕ исистадӕй ӕма минкъийтӕбӕл дони буни нӕ фӕцӕнцӕ. Фал Киристе бавдиста, ӕхе бон дӕр ӕма ӕ Фиди бон дӕр ке ӕй ӕрдзон хъауритӕ ӕрсабур кӕнун (Колоссӕгтӕмӕ 1:15, 16). Йесо загъта: «„Банцайӕ! Ниссабур уо!“ Дунгӕ банцадӕй, ӕма бӕстӕ ниссабур ӕй» (Марки 4:35–39).

Незтӕ. Адӕн ӕй зудтонцӕ, Киристей бон ке ӕй хъӕрӕути, къулухти, хъотургинти ӕма берӕ ӕндӕр незтӕй сӕйгӕ ка адтӕй, уони дзӕбӕх кӕнун. Киристе «сдзӕбӕх кодта сӕйгити се ’гасей дӕр» (Матфеййи 4:23, 24; 8:16; 11:2–5).

Стонг. Хуцауи хъаури фӕрци Йесой бон адтӕй минкъий хуӕруйнагӕй берети бафсадун. Библий финст ӕй, Киристе зӕнхӕбӕл ку лӕггадӕ кодта, уӕд дууӕ хатти мингай адӕнӕн ке бахуӕрун кодта (Матфеййи 14:14–21; 15:32–38).

Мӕлӕт. Йеговӕн мӕлӕтбӕл дӕр ӕ барӕ ке цӕуй, е бӕрӕг ӕй Библий хабӕрттӕй, зӕгъӕн, Йесо ке райгас кодта, еци ӕртӕ адӕймагей хабарӕй. Сӕ еу си мардӕй фӕцӕй цуппар бони! (Марки 5:35–42; Лукай 7:11–16; Иоанни 11:3–44).